Serqirra ijodkor, baxshi hamda shoir - Ustoz Shoberdi baxshi!

Описание: Shoberdi baxshi serqirra ijodkor, baxshi hamda shoir hisoblanadi!

Shoberdi baxshi (taxallusi; asl ismi Boltayev Shoberdi, 4-sentyabr 1944-yil, Munchok qishlogʻi, Boysun tumani, Surxondaryo viloyati, OʻzSSR, SSSR – 25-avgust 2025-yil) – sovet va oʻzbek xonandasi, baxshi. Oʻzbekiston Respublikasi xalq baxshisi, Oʻzbekiston Respublikasining Faxriy yorligʻi va „El-yurt hurmati“ ordeni sohibi.

Shoberdi Boltayev 1944-yil 4-sentyabrda Surxondaryo viloyati Boysun tumanining Munchok qishlogʻida baxshi Bolti baxshi Aliev oilasida tavallud topgan. 1968—1972-yillarda Termiz davlat pedagogika institutining pedagogika fakultetida taxsil olgan[1].

Shoberdining ilk ustozlari otasi va amakisi boʻlib, ular unga dutor chalish va baxshilik sanʼatini oʻrgatgan. Keyinchalik viloyat va respublika miqyosidagi koʻplab baxshichilik tanlovlarida qatnashgan. 1983-yilda Shahrisabzda oʻtkazilgan respublika baxshilar tanlovida bronza medali, 1989-yilda esa Denovda boʻlib oʻtgan respublika tanlovida gʻolib boʻlgan. 1990-yilda Qozogʻistonda oʻtkazilgan „Oltin olma“ festivalida mukofot olgan. 1991-yilda Toshkentda oʻtkazilgan Markaziy Osiyo baxshilari tanlovida laureat boʻlgan. 1999-yilda Termizda „Alpomish“ dostoni ming yilligi munosabati bilan oʻtkazilgan Markaziy Osiyo baxshilari tanlovida gʻolib boʻlgan[2].

Shoberdi baxshi xalq ogʻzaki ijodini targʻib qilish maqsadida koʻplab xorijiy mamlakatlarda ham ijro etgan. 1988-yilda Fransiyada oʻtkazilgan „Markaziy Osiyo xalqlari madaniyat kunlari“da ishtirok etib, Parijda „Alpomish“ dostonini kuylagan. 2002-yilda Karl Rayxel tomonidan „Alpomish“ dostonining nemis tiliga tarjimasi taqdimot marosimida qatnashgan. 2003-yilda esa Fransiyada oʻtkazilgan Osiyo mamlakatlari (Eron, Pokiston, Afgʻoniston, Turkmaniston, Tojikiston, Qirgʻiziston va Oʻzbekiston) sanʼatkorlari ishtirokidagi konsertda sahnaga chiqgan.

Shoberdining repertuarida „Alpomish“, „Oltin qovoq“, „Ollanazar Olchinbek“, „Kuntugʻmish“, „Suluvxon“, „Sanam gavhari“, „Sariq savdogar“, „Oyparcha“, „Mening dutorim“, „Mehmon“ kabi dostonlar, shuningdek, „Istak“, „Nega“, „Bilmayman“, „Oypari“ kabi termalari mavjud[3].

1999-yildan Oʻzbekiston Yozuvchilar uyushmasi aʼzosi. Termiz shahridagi 22-sonli bolalar musiqa, sanʼat va baxshichilik maktabining faxriy direktori boʻlgan.

Shoberdi baxshi 2025-yil 25-avgust kuni 80 yoshida vafot etgan[4].