حنا البقوم مزعزعة كل طابور 2023 | محمد خالد بن ضحيان - شبل الدواسر

Описание: يوم القمر غايب ومع فجة النور
والليل الاسود قام ينزح ظلامه

نور الصبح غطا على كل ديجور
كنه يودع صاحبه بـ ابتسامه

دعيت ربٍ جابراً كل مكسور
انه يوفقنا الهدى والسلامه

واللي تناسى الله خايب ومعثور
بكره تشوفه يم ريع الندامه

والشعر طرقه صعب له عدة بحور
وانا اسبحه لو كان ٩٠ قاااااامه

و الشاعر اللي كل ما وصله الدور
وقف على المنبر وجود حزامه

هذا نقول انه مجمل و مشكور
ترفع له البيضا بروس العدامه

والشاعر اللي ما يعبر من شعور
لا و خسارة كشخته بالعمامه

وانا انتظر هالحفل من ٦ شهور
وعطيت للموضوع كل اهتمامه

يامرحبا ترحيب بيّن و منشور
يا مرحبا على حلال الكرامه

يامرحبا ترحيب بالعز معمور
قدام حتى الضيف يبدي سلامه

في حفل منهو للصعيبات مذخور
اللي فرض على الجميع احترامه

عبدالعزيز اللي بالافعال مشهور
راسه تقادح بالسطر و القرامه

لو دمه يوزع على الناس بالدور
ماعاد تلقى طاريٍ للرخامه

ماهو من اللي دايم يلف ويدور
من يعرفه يعرف وش الاستقامه

يا كم فرج عن كل ضايق و مقهور
يشوفها روتين يشبه دوامه

ماقدم الاعذار لو كان معذور
ما يعتذر حتى تقوم القيامه

ومبروك وانته نسل من يحكم الشور
في كل شان وراي يحسب كلامه

‏يوم العرب ما بين منهي ومامور
ابوي بين الناس عالي مقامه

يارب تجعل مسكنه جنة الحور
في عالي الفردوس تجعل عظامه

وعمانك تفرج على كل معسور
اللي تعلو واعتلو كل هامه

منهو زهمهم وقّفو له على الفوز
لو يشتكي قل الزمن و انعدامه

وخوالك شيوخً على ماض العصور
قبل الخليفه يحكمون المنامه

شيخه لها ماضي وقد جاء لها دور
ذولا الحناتيش الفخر و الزعامه

قلت الصحيح ولاني بشاهد الزور
يثبت كلامي من فـ قصر اليمامه

دغافله عدونا دوم مدحور
نركز بيارقنا ونحمى الجهامه

حنا البقوم مزعزعة كل طابور
خصيمنا ما يهتني في منامه

تاريخنا دايم يسجل لنا حضور
في صفحة التاريخ بصمة بهامه

يوم الردي ماهوب يصبر على الجور
المجد حزنا منه ذروة سنامه

اليا تعلينا على السرج والكور
والحرب فالميدان زاد احتدامه

محظرينٍ للقى كل مدجور
لا غطرفن بيض البني باللثامه

ندحم وصوت الحق بالحق منصور
ولا يلحق الطيّب بفعله ملامه

اطرب على اللي مجدهم دوم مذكور
ماطرب على صوتك يا راغب علامه