နမ့်ဆန် နဲ့ မတူပီမြို့ကို စစ်ကောင်စီ ဗုံးထပ်ကြဲ | People's Spring

Описание: နမ့်ဆန် နဲ့ မတူပီမြို့ကို စစ်ကောင်စီ ဗုံးထပ်ကြဲ

​အောက်တိုဘာ-၁၄၊ ၂၀၂၅။ People's Spring

တအာင်းအမျိုးသားလွတ်မြောက်ရေးတပ်မတော်(TNLA)ထိန်းချုပ်ထားတဲ့ ရှမ်းပြည်နယ်မြောက်ပိုင်းက နမ့်ဆန်မြို့ကို ဒီနေ့ မနက်ပိုင်းမှာ စစ်ကောင်စီက ဗုံးကြဲသွားပြီး ဒါဟာ ၁၃ရက်အတွင်း ၃ကြိမ်မြောက် လေကြောင်းတိုက်ခိုက်မှုဖြစ်ပါတယ်။

နမ့်ဆန်မြို့နယ် အုမ်းစွမ်ကျေးရွာကို ​အောက်တိုဘာ ၁၄ရက် ဒီနေ့ မနက် ၇ နာရီ ၁၅မိနစ်ခန့်မှာစစ်တပ်က ဂျက်ဖိုက်တာနဲ့ ဗုံးကြဲသွားတာလို့ TNLAက ထုတ်ပြန်ထားပါတယ်။ အသေးစိတ်အခြေအနေကို ထပ်မံအသိပေးမယ်လို့ ​ဖော်ပြထားပါတယ်။

အောက်တိုဘာ ၁၃ရက် မနေ့ နေ့ခင်းပိုင်းကလည်းနမ့်ဆန်မြို့နယ် ကယားကြီးကျေးရွာကို ဂျက်ဖိုက်တာနဲ့ ဗုံးကြဲသွားလို့ အရပ်သား၁ဦး ဒဏ်ရခဲ့ပါတယ်။ အောက်တိုဘာ ၄ ရက်ကလည်း နမ့်ဆန်မြို့နယ် ဇယ်တုန်ဟုန်းကျေးရွာကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ ကလေးနှစ်ဦးသေဆုံးပြီး ကလေးခြောက်ဦးအပါအဝင် ကိုးဦးဒဏ်ရာရခဲ့ပါတယ်။

စစ်တပ်က ပြီးခဲ့တဲ့အောက်တိုဘာ ၁ရက်မှာ ကျောက်မဲမြို့ကို ပြန်လည်ထိန်းချုပ်နိုင်ပြီးတဲ့နောက်ပိုင်း TNLA ထိန်းချုပ်ဒေသ​တွေကို လေကြောင်းကနေ နေ့စဉ် ဗုံးကြဲနေပါတယ်။ အောက်တိုဘာ ၁ရက်ကစလို့ ဒီနေ့အထိ မိုးကုတ်၊ ကျောက်မဲ၊ နမ္မတူ၊ မန်တုံ၊ နန့်ဆန်၊ မိုးမိတ်၊ မိုင်းလုံ၊ သီပေါမြို့တွေကို စစ်ကောင်စီက ဗုံးကြဲလို့ အရပ်သား ၃၀ ဦးခန့်သေဆုံးခဲ့ပါတယ်။

စစ်ကောင်စီက လေကြောင်းတိုက်ခိုက်တာတွေ ဆက်တိုက်ကျူးလွန်နေလို့ စစ်ရေးသတိရှိဖို့နဲ့ လေကြောင်းရန် ကာကွယ်ရေးဆိုင်ရာတွေ လိုက်နာကြဖို့ ဒေသခံပြည်သူတွေကို TNLAက သတိပေးထားပါတယ်။

ဒါ့အပြင် စစ်ကောင်စီတပ်က ဒီနေ့ မနက်ပိုင်းမှာပဲ ချင်းပြည်နယ်၊ မတူပီမြို့ကို လေကြောင်းကနေ ဗုံးကြဲသွားပါတယ်။ မတူပီမြို့ပေါ်ကို ဗုံးကြဲတာဖြစ်ပြီး ထိခိုက်မှုအခြေအနေကို မသိရသေးဘူးလို့ ဒေသခံသတင်းရင်းမြစ်တွေက ပြောပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring