任劍輝 白雪仙 趙五娘 琵琶記之廟遇 唐滌生.撰曲 片.妻嬌郎更嬌 1960

Описание:    • 汪明荃 文千歲 白雪仙 任劍輝 趙五娘  

   • 文千歳 歌曲  

任劍輝 白雪仙:    • 任劍輝 白雪仙  

琵琶記之廟遇
任劍輝 白雪仙演唱
唐滌生撰曲

五娘: (千里琵琶)
千里夢，已盡空，
孤燈照住劫後容，
風吹雨打都未算兇，
偷偷分開淚暗湧，
賣唱獨行千里，
今生再休說重逢，
佢為了感恩深重，
我沿路叫賣冇中用，
話裡實多悲痛，
夫君也不懂，
一心一意，但愛新寵，
糟糠撇下，重結鴛夢，
願他一生顯貴，得恩師器重，
做個簪花進士，佳客乘龍，
千里夢，已盡空，
曲終線斷，風掃落紅

(一才詩白)
死後多應夢裡逢，謾勞孝婦寫遺踪，只怕蔡郎不識年來面，趙女空描別後容，

伯喈: (別鶴怨引子)
夜鶯碎客夢，
血淚迷濛，
哀箏聲細弄，
一切恨怨在指中，
歌聲不似夢，
泣怨透簾櫳，
誰個琴弦乍送，
琵琶寄痛，
夜深深伴寒蟲，
正是雪壘霜濃，
破廟煙籠，
不堪記舊寵，
一生多悲痛，
風箏斷線處處也難逢，
相思也是空，
恩深也是空，
孤燈照愁容

(慢板板面浪白)
唉，我未對新人笑，已聞舊人哭囉，想我伯喈不是負義忘恩之人，試問孰令切齒呢，正是恨從別後恩千重，一夜相思兩處同，我對唔住五娘囉

(慢板下句)
怎奈草木有花旁，
連理無枝傍，
忍令桃花泣血，
染我狀元紅。
嫦娥剪就綠雲衣，
我已成名卿老死，
一個斜插宮花，
一個天涯淚湧；
說什麼鳳凰池，
說什麼龍鳳配，
又知否才郎游上苑

(二王)
險些兒跨鳳乘龍。
一片花飛故苑空，
隨風飄泊到簾櫳，
花落憶前程，
夢不見陳留愛寵；

(白)
唉，幾難得孝婦題真，但又不能重圓破鏡，唉，算叻，見亦好，唔見亦好啦，總望有日能夠束髮歸林，守雙親墓，了此殘生，於願足矣，(一才慢反才白) 哎吔，點解有個道姑暈系破庵裡面呢嚇 (白) 呀，大底是故鄉天旱，婦人無以聊生，流浪到京師抄化，真係可憐可憫，道姑，嗱，我畀錠銀你去買碗飯食嚇，

五娘: (醒轉介白)
哦

(花下句)
誰收白骨回故土，
夢醒微聞古寺鐘。
煙迷古廟夜沉沉，
何以有影在佛簾微閃動；

(白)
多謝，哎吔，哦！

伯喈: (白)
哎吔，五娘，五娘乜原來係你呀

五娘: (白)
你呀！

伯喈: (口古)
五娘，五娘，你係相府見到我，難怪你迴避我唧，而家系破廟見到我，為乜野事幹你重要迴避我呢，五娘，你既然唔願見我，又何苦不畏千里遙遙，到來京師走動呢；

五娘: (口古)
伯喈，假如唔係婆婆吩咐我千里尋夫，我就算系冷死，餓死，我都唔會嚟嘅，你估我唔知道，令夫婿難為，係有虧婦德，拋頭露面，乃係有損婦容咩。

伯喈: (口古)
五娘，我朝思暮想都係望你嚟 (一才) 希望你將爹娘嘅消息帶畀我 (一才) 五娘，唔通你除咗迴避我，同埋回答我之外，連半句說話都冇得同我講咩，三載相逢，估不到相逢如夢囉；

五娘: (口古)
系，系嘅，伯喈，我應該有好多說話要同你講，但係我都不知從何說起囉，(白) 系，伯喈，我要話畀你聽嘅，就係我到咗京師之後，我從來都未曾對人認過係你嘅糟糠之妻，我更從來未曾對人講過你嘅淒涼家世㗎 (喊白) 因為婆婆佢臨死嘅時候，佢一路喊，一路吩咐我，佢話五娘子，慈母愛子之心，無微不至，伯喈在年荒親死都尚不回門，我都一樣唔怪佢㗎，佢話你呢次千里尋夫，若見蔡郎，你一不可說千般苦，二不可說喪雙親，三不可說裙包土，四不可說剪香魂，佢，佢話恐防他人聞之，有損你嘅尊嚴體面，耽誤你，耽誤你步上南宮喎，

伯喈: (長花下句)
血淚已迷濛，
痛定還思痛，
三年一覺家鄉夢，
寡恩難許詐癡聾，
玉宇瓊樓誰與共，
忍拋父母喪貧窮，
父死倩誰築墓塚，
母死誰家殮遺容，
千里尋夫千里痛，
誰贈盤川助你有相逢。
嗟莫是白骨暴荒丘 (一才)
紅顏天作弄；

五娘: (四季相思引子)
殊沉痛，
別離後沉痛，
任良田無耕種，
家翁死去無人肯相送，

(四季相思)
婆婆老，
佢難忍飢凍，
中秋個晚夜長別了，
也為貧窮，

伯喈: (喊介攝白)
咁你邊處有錢嚟葬我阿媽？

五娘: (續唱)
我無錢殮，
憑誰將棺送，
淒淒風雨夜，
誰為我建荒塚，

伯喈: (攝白)
咁我阿媽死咗棺材都冇囉噃？

五娘: (續唱)
我千聲悲慟，
哭叫全無用，
無奈去大街，
願將髮賣求殮婆婆用，

伯喈: (攝白)
咁你賣唔賣得去呀？

五娘: (續唱)
我賣賣賣髮谁愿，
那堪廟裡逢，
但願一切辛酸不語中，
你莫看儂，

(白)
你睇下啦

伯喈: (續唱)
五娘、五娘能盡孝，
真悲痛，
青絲一縷剪去實沉痛，

五娘: (白)
伯喈，你最愛嘅都冇埋囉

伯喈: (續唱)
重逢重逢殘廟裡，
相擁抱，
你犧牲一切為郎把青絲送

五娘: (乙反長二王下句)
忍將蘆席殮姑翁，
我賣髮為供棺木用，
歷盡山長水遠萬千重，
誰料你背負糟糠另諧鸞鳳，
忍拋名教博榮封，
我繡閣留書殊慘痛，
正是恩消義絕，
何必又似夢相逢。
莫賣此片刻溫存，
你厚待新歡忘舊寵；

伯喈: (白)
五娘，五娘，你賣髮為殮翁姑，你睇，你睇我斷髮為誰效命呀，

五娘: (一才白)
嚇，你又斷髮，

伯喈: (白)
你睇下啦，

五娘: (白)
哦，蔡郎，蔡郎，咁你，你到底又為誰而斷髮呢？

伯喈: (白)
唉，五娘，

五娘: (白)
你講啦你，

伯喈: (乙反中板下句)
不忍棄枕邊情，
不忍背夫妻義，
我寧甘斷髮，
不願再乘龍。
一自白馬簪花，
避得過擲果盈車，
避不了相門愛寵；
佢欲把新弦替舊弦，
強我秋涼忘舊扇，
荷池偷泣訴，
牛氏佢未寬容。
身披禦荷衣，
雖則金榜掛名時，
避不了強權操縱；
聖旨竟為媒，
迫我重婚娶，
我哀哀求赦免，
鑾階血尚紅。
我削去煩惱三千，
做一個望帝逃禪，
也不願棄糟糠為世諷；
我在金鑾經剃度，
怨一句帝主昏庸。

(花)
五娘你賣髮為酬親，
伯喈斷髮為報妻情重；

五娘: (感極而泣白)
蔡郎，夫呀，

(花下句)
幾見得志不忘堂上婦，
我雖云慘淡也歡容。