(ប្រសាសន៍ដើម)៖ សម្តេចមហាបវរធិបតី ហ៊ុន ម៉ាណែត៖ មិនគួរឱ្យការរៀបចំព្រឹត្តិការណ៍សង្ក្រាន្តឆ្នាំថ្មី...

Описание: សម្តេចមហាបវរធិបតី ហ៊ុន ម៉ាណែត៖ មិនគួរឱ្យការរៀបចំព្រឹត្តិការណ៍សង្ក្រាន្តឆ្នាំថ្មី ធ្វើឱ្យបែកបាក់សាមគ្គីជាតិនោះទេ (Video inside)

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងដូចនេះថា មិនគួរឱ្យការរៀបចំព្រឹត្តិការណ៍សង្ក្រាន្តឆ្នាំថ្មី ធ្វើឱ្យបែកបាក់សាមគ្គីជាតិនោះទេ គួរតែបង្កើតឱ្យមានការយន្តការឈ្នះឈ្នះ កុំឱ្យរកការចាញ់ឈ្នះរៀងៗខ្លួន ជាខ្មែរដូចគ្នា ប្រពៃណីតែមួយ ដើម្បីជាតិខ្មែរតែមួយនោះទេ យើងគួរនាំគ្នាអបអរសាទរទៅ បើគ្រាន់តែរៀបចំអង្គរសង្ក្រានដើម្បីអបអរបុណ្យប្រពៃណីជាតិនេះធ្វើឱ្យខ្មែរបែកបាក់ហើយនោះ យើងនឹងកាន់តែទន់ខ្សោយ។

សម្តេចមហាបវរធិបតី ហ៊ុន ម៉ាណែត បានថ្លែងដូចនេះនៅរសៀលថ្ងៃទី៦ ខែមីនា ឆ្នាំ២០២៦នេះ នាឱកាសដែលសម្តេចអញ្ជើញជាអធិបតីបិទសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅបន្ដរបស់អាជ្ញាធរជាតិប្រយុទ្ធប្រឆាំងគ្រឿងញៀន។

សម្តេចមហាបវរធិបតី ហ៊ុន ម៉ាណែត បានបញ្ជាក់ថា ការយកប្រធានបទ ការរៀបចំព្រឹត្តិការណ៍សង្ក្រាន្តឆ្នាំថ្មីនេះ គួរបង្កើតឱ្យមានយន្តការឈ្នះឈ្នះ កុំឱ្យរកការចាញ់ឈ្នះរៀងៗខ្លួន គួរអបអរសាទរទៅ ជាខ្មែរដូចគ្នា ប្រពៃណីតែមួយ ប្រជាជន ទឹកដី ជនភៀសសឹក កងទ័ព យើងត្រូវតែគិតគូរដូចគ្នា គ្រាន់តែវិធីសាស្ត្រខុសៗគ្នា។ សម្រាប់សម្តេច គឺគាំទ្រឱ្យមានការរៀបចំព្រឹត្តិការណ៍សង្ក្រាន្តឆ្នាំថ្មី និងគាំទ្រដល់បណ្តារាជធានីខេត្ត ក្នុងការរៀបចំព្រឹត្តិការណ៍សង្ក្រាន្តឆ្នាំថ្មីនេះ។

សម្តេចមហាបវរធិបតី បានបញ្ជាក់ដែរថា យើងមិនអាចគ្រាន់តែមានបញ្ហាហើយយើងមិនធ្វើអ្វីនោះទេ យើងត្រូវតែដើរទៅមុខ និងពង្រឹងសាមគ្គីឯកភាពជាតិជាមួយគ្នា ពង្រឹងភាពធន់របស់ជាតិ និងបន្តដើរទៅមុខដោយភាពមុះមុត និងការគិតគូរបានគ្រប់ជ្រុងជ្រោយ ហើយយើងក៏មិនភ្លេចដល់វរយុទ្ធជន វរនគរបាលជាតិ ដែលកំពុងឈរជើងនៅជួរព្រំដែន និងជនភៀសសឹងនោះទេ តែផ្ទុយទៅវិញគឺការប្រមូល និងបំផុសការច​ង់ចាំ តាមរយៈរូបភាព សកម្មភាព និងការជួយទៅដល់ពួកគាត់ផ្ទាល់ ដែលនេះគឺជាអ្វីដែលហៅថា ឈ្នះឈ្នះ ក្នុងការរៀបចំព្រឹត្តិការណ៍សង្ក្រាន្តឆ្នាំថ្មីនេះផងដែរ។

ពាក់ព័ន្ធនឹងការរៀបចំព្រឹត្តិការណ៍សង្ក្រាន្តឆ្នាំថ្មីនេះ សម្តេចមហាបវរធិបតី ហ៊ុន ម៉ាណែត បានថ្លែងដូចនេះថា « ខ្ញុំសុំកុំឱ្យមានការជជែកបែកម៉ាំ បែកបាក់គ្នាទៀត គ្រាន់តែរៀបចំព្រឹត្តិការណ៍សង្ក្រាន្តឆ្នាំថ្មីនេះ យកទស្សនៈឈ្នះឈ្នះ ទាំងអស់គ្នាទៅ ដើម្បីជាតិខ្មែរតែមួយនោះទេ, បើគ្រាន់តែរៀបចំអង្គរសង្ក្រាន រៀបចំបុណ្យប្រពៃណីជាតិនេះធ្វើឱ្យខ្មែរបែកបាក់ហើយ យើងមិនគួរនោះទេ កាន់តែបែកកាន់តែខ្សោយ យើងមិនគួេនោះទេ ពេលដែលលំបាកនេះគួរតែរួមគ្នាទៅ ហើយពេលចូលឆ្នាំនេះជាឱកាសដែលយើងរួមគ្នាអបអរបុណ្យប្រពៃណីជាតិ»។

សម្តេចមហាបវរធិបតី ហ៊ុន ម៉ាណែត ក៏បានបង្ហាការគាំទ្រនូវទស្សនានរបស់សហភាពសហព័ន្ធយុវជនកម្ពុជា (ស.ស.យ.ក) ក្នុងការត្រៀមរៀបចំពិធីផ្សេងៗនាឱកាសបុណ្យចូលឆ្នាំថ្មីប្រពៃណីជាតិខ្មែរ និងចង់ឃើញតាមបណ្តាខេត្តផ្សេងៗ ត្រៀមរៀបចំកម្មវិធីផ្សេងៗ ឫមានអ្វីដែលជាភាពទាក់ទាញដល់បណ្តាញប្រជាពលរដ្ឋឱ្យបានចូលរួមឱ្យបានច្រើន ដើម្បីជាឱកាសដែលយើងរួមគ្នាអបអរបុណ្យប្រពៃណីជាតិ៕