စစ်ခေါင်းဆောင် လေယာဉ်တစ်စီးရယူပြီးနောက် MAI လေယာဉ် တစ်စီး ဖြည့်တင်း | People's Spring

Описание: စစ်ခေါင်းဆောင် လေယာဉ်တစ်စီးရယူပြီးနောက် MAI လေယာဉ် တစ်စီး ဖြည့်တင်း

ဇွန်-၂၅၊ ၂၀၂၅/ People's Spring

အာဏသိမ်းစစ်ခေါင်းဆောင်က သူရဲ့ ပြည်ပခရီးစဉ်တွေအတွက်သီးသန့် အသုံးပြုဖို့ အပြည်ပြည်ဆိုင်ရာ မြန်မာလေကြောင်း(MAI) ပိုင် လေယာဉ်တစ်စီး ရယူလိုက်ပြီးနောက် လပိုင်းအကြာမှာ MAI က လေယာဉ်နောက်တစ်စီး ဖြည့်တင်းလိုက်ပါတယ်။

စစ်ခေါင်းဆောင်ရယူသွားတဲ့ Air Bus 319 အမျိုးအစားကိုပဲ MAI လေကြောင်းလိုင်းမှာ နောက်တစ်စီး ထပ်မံ ဖြည့်တင်းလိုက်တာပါ။

MAI ရဲ့ ဖေ့စ်ဘွတ်ခ် စာမျက်နှာမှာ လေယာဉ်အသစ် ထပ်ရောက်လာတဲ့ သတင်းကို မနေ့ ဇွန်လ ၂၃ ရက် ညပိုင်းမှာ ထုတ်ပြန်ထားပြီး အဲဒီလေယာဉ်အသစ်ကို “ပုဂံ” လို့ အမည်ပေးထားပါတယ်။

အာဏာသိမ်းစစ်ခေါင်းဆောင်ရဲ့ ပြည်ပခရီးစဉ်အတွက် သီးသန့် အသုံးပြုလိုက်ရတဲ့ လေယာဉ်ကတော့ လေယာဉ်မှတ်ပုံတင်အမှတ်XY-ALK ဖြစ်ပြီး အမေရိကန် အခြေစိုက် Aviation Capital Group ဆီက ၂၀၁၉ ခုနှစ်မှာ MAI စတင်ငှားရမ်း အသုံးပြုနေတာပါ။

ဌားရမ်းထားတဲ့ လေယာဉ်ကို ပြန်မအပ်တော့ဘဲ အပြီးပြတ်ဝယ်ယူဖို့ ပြီးခဲ့တဲ့ ဖေဖော်ဝါရီလ ၁၁ ရက်က စစ်ကောင်စီက ညွှန်ကြားခဲ့တာပါ။ စစ်ခေါင်းဆောင်ရဲ့ တရုတ် ၊ ရုရှား ၊ ဘီလာရုဇ်ခရီးစဉ်တွေမှာ အဲဒီလေယာဉ်ကို တောက်လျှောက်အသုံးပြုခဲ့တာရှိပါတယ်။

စစ်ကောင်စီခေါင်းဆောင်​ရယူသွားတဲ့ လေယာဉ်ဟာ ပုံမှန်လေကြောင်းခရီးစဉ်တွေကိုပါ ပျံသန်းပြေးဆွဲပြီး မှတ်တမ်းတွေအရ စင်ကာပူ၊မလေးရှား ၊ဘန်ကောက်နဲ့တောင်ကိုရီးယားတို့ကို ပျံသန်းတာတွေ့ရပါတယ်။

MAI လေကြောင်းလိုင်းကို အာဏာသိမ်းစစ်ခေါင်းဆောင်နဲ့ နီးစပ်တဲ့ ခရိုနီ ဦးအောင်အောင်ဇော် ကပိုင်ဆိုင်ပါတယ်။ ယခင်စစ်အာဏာရှင်ဟောင်းဗိုလ်ချုပ်မှုးကြီး သန်းရွှေလက်ထက်ကတည်းက ဦးအောင်အောင်ဇော် ဟာ စစ်တပ်နဲ့ပေါင်းပြီး လုပ်ပိုင်ခွင့်တွေရခဲ့တာပါ။

သူရဲ့ 24 Hour Group ကုမ္ပဏီအုပ်စုလက်အောက်မှာ အိမ်ခြံမြေနဲ့ ဆောက်လုပ်​ရေးလုပ်ငန်း၊ သတ္တုတူးဖော်ရေး၊ လျှပ်စစ်ထုတ်လုပ်ရေး၊ လောင်စာဆီတင်သွင်းမှု၊ ဟိုတယ်ဝန်​ဆောင်မှုလုပ်ငန်း၊ ဆီအုန်းစိုက်ပျိုး​ရေးလုပ်ငန်းစတဲ့ လုပ်ငန်းကြီးတွေပါဝင်သလို တနင်္သာရီတိုင်းမှာ ​ကျောက်မီး​သွေးလျှပ်စစ်ဓါတ်အား​ပေးစက်ရုံတည်​ဆောက်ဖို့လည်း စီစဥ်ခဲ့တယ်လို့ သိရပါတယ်။

သူပိုင်ဆိုင်တဲ့ MAI လေကြောင်းလိုင်းမှာ အသစ်ရောက်လာတဲ့ လေယာဉ်အပါအဝင်လေယာဉ် စုစုပေါင်း ၁၁ စီး ရှိပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring