မရှိဝမ်းစာ ရှိတန်ဆာ မဖြစ်စေတော့တဲ့ အလျော့တွက် | People's Spring

Описание: မရှိဝမ်းစာ ရှိတန်ဆာ မဖြစ်စေတော့တဲ့ အလျော့တွက်

မတ် - ၁၈ ၊၂၀၂၆

ရွှေဟာ အခြေခံလူတန်းစားတွေ ငွေပိုငွေလျှံရှိိလာချိန် ပိုက်ဆံမပွန်းမပဲ့အောင် ဝယ်ယူစုဆောင်းထားဖို့ ဒီနေ့အချိန်မှာမသင့်တော်တော့ပါဘူး။

အကြောင်းရင်းကတော့ စစ်ကောင်စီထိန်းချုပ်မှုအောက်မှာရှိတဲ့ ရန်ကုန်တိုင်းရွှေလုပ်ငန်းရှင်များအသင်း(YGEA) က သတ်မှတ်လိုက်တဲ့ အလျော့တွက် သတ်မှတ်ချက်ကြောင့်ပါ။

YGEA ရဲ့ အလျော့တွက် သတ်မှတ်ချက်အရ ၁၅ ပဲရည်လို့ခေါ်တဲ့ ရွှေထည်လက်ဝတ်လက်စားတွေ ဝယ်မယ်ဆိုရင် အလျော့တွက်ကို တဝက်နီးပေးရတော့မှာပါ။ YGEA က ရွှေထည်တွေထဲ အဝယ်များတဲ့ ဆွဲသီး၊ နားကပ်၊ ကလစ်၊ လက်စွပ်၊ လက်ကောက်၊ ဆွဲကြိုးနဲ့ ဟန်းချိန်း စတဲ့ ရွှေထည်တွေကို အလျော့တွက် အသီးသီး သတ်မှတ်ပေးလိုက်တာဖြစ်ပါတယ်။ အဲဒီသတ်မှတ်ချက်ကို ရွှေဆိုင်တွေက လိုက်နာရမှာပါ။

အလျော့တွက်ဆိုတာကတော့ ရွှေထည်ကို ပန်းတိမ်မှာ လက်ဝတ်လက်စားအဖြစ် ပန်တိမ်ဆရာက ပုံဖော်တဲ့အခါ တံစဉ်းစားလို့ဖြစ်စေ ၊ အပူပေးလို့ဖြစ်စေ လျော့ပါးသွားတဲ့ ရွှေအလေးချိန်ရဲ့တန်ဖိုးကို ဝယ်ယူဘက်က ပေးရတဲ့ ငွေကြေးကိုပြောတာပါ။

ဉပမာအနေနဲ့ ပြောရရင် တစ်ကျပ်သားရွှေလက်ကောက်အထည် ပန်းတိမ်မှာပြုလုပ်ချိန်က ရွှေ၂ ရွှေးကုန်ကျခဲ့ရင် ဝယ်ယူဘက်က ၂ ရွှေးဖိုး ပေးရပါတယ်။ အလျော့တွက်တန်ဖိုး တွက်ချက်ရယူရာမှာ ရွှေဆိုင်အလိုက် အနည်းငယ်ကွာခြားတာရှိပါတယ်။ ပြည်တွင်းမှာ ရွှေအလေးချိန်ကို ချိန်တွယ်ရာမှာ ကျပ် ၊ပဲ ၊ မူး၊ ရွေးစနစ် ကို သုံးတာဖြစ်ပြီး ရွှေတစ်ကျပ်သား မှာ ၁၆ ပဲ ရှိပါတယ်။ တစ်ပဲ မှာတော့ ရှစ်ရွေးရှိတာပါ။
အခုတော့ YGEA က ရွှေဆိုင်အားလုံးတပြေးတည်းလိုက်နာရမ​ယ့်အလျော့တွက်နှုန်းထားဆိုပြီး မတ်လ ၁၄ ရက်မှာ ထုတ်ပြန်ပါတယ်။

အခု YGEA ထုတ်ပြန်လိုက်တဲ့ အလျော့တွက်နှုန်းထားအရဆိုရင် အလေးချိန် ၂ ပဲ ရှိတဲ့ ရွှေဆွဲသီး၊ရွှေနားကပ် ဝယ်ရင်အလျော့တွက် အဖြစ် ၁ ပဲ ၁ ရွေး ၊ အလေးချိန် လေးပဲတင်နဲ့အောက် ရွှေဆွဲကြိုး ၊ ဟမ်းချိန်းဝယ်မယ်ဆိုရင်လည်း အလျော့တွက်က ၂ ပဲပေးရတော့မှာပါ။ ဒါက ရွှေထည်တန်ဖိုးရဲ့ ထက်ဝက်နီးပါး အလျော့တွက်ပေးရမယ့်သဘောမျိုးအဓိပ္ပါ​ယ်သက် ရောက်နေတာပါ။

လက်ရှိမှာ ရွှေစျေးက သိန်းတစ်ရာကျော်နေပါတယ်။ ၁၅ ပဲရည်တစ်ကျပ်သားကို ကျပ်သိန်းတစ်ရာနဲ့တွက်မယ်ဆိုရင် ၂ ပဲ ရှိတဲ့ ရွှေဆွဲသီးတန်းဖိုးက ကျပ် ၁၂ သိန်း ခွဲ ကျမှာဖြစ်ပြီး အလျော့တွက် တစ်ပဲဖိုး ကျပ်ခြောက်သိန်းကျော်ကိုဝယ်သူဘက်က ရွှေဆိုင်ကို ပေးရမှာပါ ။

ရွှေတစ်ကျပ်သားရှိတဲ့ ဘယက်ဆွဲကြိုးဆိုရင် YGEA ရဲ့သတ်မှတ်ချက်အရ အလျော့တွက်က ၇ ပဲ ပေးရမှာပါ။ ၇ ပဲဆိုရင် အခုခေတ်ရွှေစျေးနဲ့ အကြမ်းဖျင်းတွက်ရင် အလျော့တွက်ဖိုး ကျပ်သိန်းလေးဆယ်ထက်မနည်း ကျသွားမှာဖြစ်ပါတယ်။

အခုလို အလျော့တွက်ဖိုး ရွှေဆိုင်တွေက တိုးယူရတာက စစ်ကောင်စီက ရွှေစျေးကို ပြင်ပ ပေါက်စျေးအတိုင်းမဟုတ်ဘဲ သတ်မှတ်နှုန်းထားအတိုင်း ရောင်းချခိုင်းတာကြောင့် ရွှေလုပ်ငန်းလုပ်ကိုင်သူအချို့က ဖေ့ဘွတ်ခ်မှာရေးသားပါတယ်။

ပြင်ပစျေးတန်းကျပ်သိန်းတစ်ရာကျော်နေချိန်မှာ စစ်ကောင်စီက ကျပ်သိန်း ၇၀ စျေးနှုန်းနဲ့ ရောင်းခိုင်းထားတာလို့ သိရပါတယ်။ဒါကြောင့် ဘောက်ချာမှာ စစ်ကောင်စီသတ်မှတ်စျေးအတိုင်းရေးပြီး ကျန်တဲ့ ပမာဏကို အလျော့တွက်အဖြစ် ရွှေဆိုင်တွေက ယူနေကြတာပါ။ အဲလိုနည်းနဲ့ ယူနေရတဲ့အလျော့တွက်ကို တရားဝင်အောင် YGEA က သတ်မှတ်ပေးလိုက်တာဖြစ်ပါတယ်။

ဒါပေမယ့် ရက်ပိုင်းအကြာမှာပဲ YGEA က သူတို့ရဲ့ဖေ့ဘွတ်ခ်မှာ ကြေညာထားတဲ့ အလျော့တွက် နှုန်းထားသတ်မှတ်ချက်ကို ပြန်ဖြုတ်သွားတာတွေ့ရပါတယ်။

YGEA ရဲ့ အလျော့တွက် နှုန်းထားရင် ရွှေထည်လက်ဝတ်လက်စားဝယ်မယ့်သူတွေအတွက်တော့မကိုက်တော့ပါဘူး။ အလျော့တွက်ဆိုတာ ဝယ်ယူထားတဲ့ ရွှေထည်ကို ဆိုင်မှာ ပြန်ရောင်းလည်း ပြန်မရဘဲ ဝယ်သူဘက်က ရှုံးမြဲဖြစ်ပါတယ်။

အခုတော့ YGEA ရဲ့ သတ်မှတ်ချက်ကြောင့် ရွှေဝယ်မယ့်သူတွေ ပိုအထိကြီးတော့မှာပါ။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #gold #YGEA #ရွှေ #Yangon