ថៃទម្លាក់កំហុសមកលើកម្ពុជាថា ជាអ្នកបាញ់ផ្លោងគ្រាប់ចូលទឹកដីឡាវ, អ្នកនាំពាក្យក្រសួងការពារជាតិកម្ពុជា...

Описание: ថៃទម្លាក់កំហុសមកលើកម្ពុជាថា ជាអ្នកបាញ់ផ្លោងគ្រាប់ចូលទឹកដីឡាវ, អ្នកនាំពាក្យក្រសួងការពារជាតិកម្ពុជា ថ្កោលទោសយ៉ាងដាច់អហង្ការ និងទាត់ចោលទាំងស្រុងនូវការចោទប្រកាន់របស់ថៃ

(ភ្នំពេញ)៖ មិនត្រឹមតែឈ្លានពានទឹកដីកម្ពុជាប៉ុណ្ណោះទេ ប៉ុន្ដែភាគីថៃបានទម្លាក់កំហុស និងចោទប្រកាន់មកកម្ពុជាថា ជាអ្នកបាញ់ផ្លោងគ្រាប់ចូលទឹកដីឡាវថែមទៀតនៅថ្ងៃទី២៦ ខែកក្កដា ឆ្នាំ២០២៥នេះ។ ឆ្លើយតបចំពោះការចោទប្រកាន់បែបនេះ អ្នកនាំពាក្យក្រសួងការពារជាតិកម្ពុជា បានចេញមកថ្កោលទោសយ៉ាងដាច់អហង្ការ និងទាត់ចោលទាំងស្រុង។

តាមរយៈសន្និសីទសារព័ត៌មាន នៅរសៀលថ្ងៃទី២៦ ខែកក្កដា ឆ្នាំ២០២៥នេះ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានអះអាងថា ថៃប្រឌិតព័ត៌មានចោទប្រកាន់កម្ពុជា ហើយកម្ពុជាមិនអាចទទួលយកបានឡើយ និងទាត់ចោលទាំងស្រុងចំពោះអ្វីដែលបានលើកឡើងថា កម្ពុជាអ្នកបាញ់ផ្លោងគ្រាប់ចូលទឹកដីឡាវ។

បើតាមអ្នកនាំពាក្យក្រសួងការពារជាតិកម្ពុជា, មកទល់ពេលនេះ អាជ្ញាធរឡាវមិនទាន់ស៉ើបអង្កេតករណីបាញ់ផ្លោងគ្រាប់ចូលប្រទេសគេនោះទេ ប៉ុន្ដែថៃទំនងមានខ្លួនបានចេញមកចោទប្រកាន់ និងទម្លាក់កំហុសមកលើកម្ពុជាមុនទៅវិញ។

លោកស្រីឧត្តមសេនីយ៍ឯក ម៉ាលី សុជាតា បានបញ្ជាក់យ៉ាងដូច្នេះថា «ក្រសួងការពារជាតិកម្ពុជា សូមច្រានចោលទាំងស្រុង និងថ្កោលទោសយ៉ាងដាច់អហង្ការចំពោះការចោទប្រកាន់ភូតភរ ចេតនាព្យាបាតពីភាគីថៃដែលថា កម្ពុជាបានបាញ់គ្រាប់ផ្លោងចូលទឹកដីឡាវ ទាំងដែលអាជ្ញាធរឡាវមិនបានធ្វើការចោទប្រកាន់ ឬក៏មិនទាន់បើកការស៉ើបអង្កេតលើករណីនេះនៅឡើយ ប៉ុន្ដែភាគីថៃបានធ្វើការចោទប្រកាន់មកលើកម្ពុជា»។

អ្នកនាំពាក្យក្រសួងការពារជាតិកម្ពុជា បានយល់ឃើញថា ការបញ្ចេញព័ត៌មានរបស់ភាគីថៃ នៅលើផេករបស់អ្នកនាំពាក្យជើងគោកថៃ និងផេករបស់យោធភូមិភាគទី២ មិនស៉ីសង្វាក់ជាមួយគ្នាឡើយ ពោលយោធភូមិភាគទី២ថៃ ចោទប្រកាន់កម្ពុជា តែអ្នកនាំពាក្យជើងគោកថា មិនទាន់មានព័ត៌មានច្បាស់លាស់។ ដូច្នេះថៃមិនឯកភាពគ្នា មិនស៉ីសង្វាក់គ្នាសូម្បីការបញ្ចេញព័ត៌មាន៕