Jo vetem mode/ Marion e morem vesh, po qe Kim-i desh beri valixhet gati per Tirane?! (02.06.2018)

Описание: Të pasmet e famshme të Kim Kardashian mund t’i kishim parë live tek Pallati i Kongreseve, po të mos kishte qenë për çmimin e kripur prej 1 milion eurosh.
“Jo Vetëm Modë” zbuloi se ylli i internetit, ka qenë në negociata për ta shoqëruar bashkëpunëtorin e saj më të afërt, Mario Dedivanovic, gjatë Masterclass-it të tij në Tiranë.
Ketrina Jarazi dhe Agnesa Hadërgjonaj, dy organizatoret e eventit të shumëpërfolur, shpjeguan se arsyeja që e mbajti Kim-in larg shqiptarëve, ishte çmimi i biletave.
“Kim Kardashian zakonisht kërkon 1 milion euro për të qenë pjesë e një eventi. Përveç kësaj, kërkon edhe avion privat. Plus që nuk është vetëm, duhet të ketë edhe pjestarë të stafit me vete.
Nëpërmjet Marios, negociuam për një çmim pak më të ulët. Por, pastaj do të kishim më shumë punë me sponsorat. Gjithashtu, i binte që çmimi i biletave të mos ishte kaq i ulët, sepse do të duhet të mbulonte 1 milion eurot që kërkonte Kim-i”, tha Jarazi.
Siç edhe e shprehu motra e Marios, Marina Dedivanovic, i vëllai bëri çmos që të siguronte koston më të ulët për shqiptarët, në mënyrë që sa më shumë bashkëatdhetarë të mund të ishin të pranishëm në Masterclass-in e tij.
“Dëshirën për të realizuar një masterclass këtu, vëllai im e ka patur prej vitesh. Kështu, ai vendosi të ulë çmimet e biletave, në mënyrë që të ishte e përballueshme për këdo nga Shqipëria dhe vendet përreth.”, u shpreh Marina për “Jo Vetëm Modë”.
E në fakt, në krahasim me çmimin prej 749 dollarësh që kushton bileta Exclusive VIP për Masterclass-in e Marios në Neë York, 350 euro për biletë me status VIP në Tiranë apo 50 euro për biletën “standarte”, duhet t’u jenë dukur hiçmosgjë 2,100 fansave të Marios që pushtuan Pallatin e Kongreseve. Jo vetëm shqiptarë, por edhe shumë të huaj nuk e lanë rastin t’u shpëtonte duke i zhdukur nga qarkullimi brenda muajit, biletat për Masterclass-in në Tiranë.
Po atëherë, si i bëhet për të sjellë Kim-in mes admiruesve më të nxehtë të saj nga Ballkani? Çmimi i biletave zor se mund të ulet, por ca njerëz të privilegjuar mund të kenë shansin ta shijojnë Kim-in prej mishi e kockash në kryeqytetin shqiptar, veçse duhet të presim pak.
“Ndoshta në të ardhmen, mund ta sjellim edhe Kim-in në Tiranë, por në një sallë më të vogël”, kështu tha organizatorja Ketrina për “Jo Vetëm Modë”.