Жұлдыз Сүлейменова: Отандық кітап баспаларын салықтан босату – мәдени және идеологиялық қажеттілік

Описание: Мәжіліс депутаты, «AMANAT» партиясы фракциясының мүшесі Жұлдыз Сүлейменова фракцияның кеңейтілген отырысында Премьер-Министрдің орынбасары – Ұлттық экономика министрі Серік Жұманғаринге кітап баспаларына қатысты өзекті мәселе көтерді. Оның айтуынша, соңғы үш жылда қағаздың, бояу мен логистикалық шығындардың күрт өсуі отандық баспагерлерді тығырыққа тіреп отыр.

«Бүгінгі таңда отандық баспагерлер кітап бағасының қымбаттауына басты себеп ретінде қосылған құн салығы мен импорттық салықтар секілді фискалдық жүктемелерді атап отыр. Отандық көркем әдебиет, ғылыми-көпшілік, балалар және оқу әдебиеттерін шығарумен айналысатын баспалар үшін қосылған құн салығынан толық босату немесе 0 пайыздық мөлшерлемені енгізу ұсынылады»,– деді депутат.

Депутат сондай-ақ қағаз, бояу және баспа жабдықтарына қатысты импорттық салықтарды азайту қажеттігін айтты.

Министр Серік Жұманғарин бұл ұсыныстармен келісетінін білдірді.

«Жалпы, айтқанда мен сізді қолдаймын. Жеңілдіктер беру – дұрыс идея. Бірақ толығымен босату емес, екінші оқылымға дейін тағы талқылайық», – деді министр.