សម្លប្រូងរបស់ជនជាតិភាគតិចនៅខេត្តរតនគិរី

Описание: គ្រាន់តែឃើញឈ្មោះម្ហូបនេះ យើងអាចស្មានបានថាប្រហែលមិនមែនជាម្ហូបដែលគេស្គាល់ជាទូទៅទេ។ លុះពិនិត្យលទ្ធផលមកក៏ឃើញថាជាសម្លដែលមិនធ្លាប់ឃើញថាខ្មែរស្លដូច្នោះ មែន ដ្បិតសម្លនេះជាម្ហូបជនជាតិដែលរស់នៅក្នុងខេត្តមណ្ឌលគីរី, ក្រចេះនិងត្បូងឃ្មុំ។ ជនជាតិព្នងហៅថា «ត្រាវព្រូង» រីឯជនជាតិស្ទៀងដែលរស់នៅស្រុកមេមត់ក្នុងខេត្តត្បូងឃ្មុំឬក៏នៅស្រុកស្នួលក្នុងខេត្តក្រចេះវិញហៅថា «ឈឺប្រូង ឬប្រូង»។

គេអាចពោលថាសម្លនេះមិនមែនជាមុខម្ហូបដែលទទួលទានរាល់ថ្ងៃឬក៏ញឹកញាប់ឡើយ ដ្បិតគេច្រើនស្លតែក្នុងឱកាសជួបជុំគ្នាឬទទួលភ្ញៀវប៉ុណ្ណោះ។

ដើម្បីស្លគេមិនប្រើឆ្នាំងទេ គឺគេស្លដោយប្រើបំពង់ឫស្សី។ ដំបូងគេត្រូវរកឫស្សីពក ប្រវែង ពី៧០ស.ម. ឡើងទៅ យកមកកាត់ថ្នាំងខាងគល់សម្រាប់ធ្វើមាត់បំពង់ និងទុកផ្នែកខាងចុងជាបាត គឺថាធ្វើលំនាំតាមបំពង់ទឹកត្នោតឬបំពង់ឫស្សីសម្រាប់ដុតក្រឡានដូច្នោះ។ បន្ទាប់មកទៀតគេត្រូវរកឈើពីរកំណាត់ មានចំពាមខាងចុង សម្រាប់ទ្រឈើត្រង់មួយទៀតដែលជាបង្អែកបំពង់ឫស្សី និងរកផ្តៅ ឬកូនឈើវែងមួយសម្រាប់បុកបន្លែនិងសាច់ដែលគេបានញាត់បញ្ចូលក្នុងនោះហើយជាស្រេច។