فرحان محمد العازمي في حفل مهرجان قبيلة العوازم في الكويت ( غربي الدمام )

Описание: فرحان محمد العازمي في حفل مهرجان قبيلة العوازم في الكويت


ياراسي لو أحنّك من مصادم الايام
لقيتك مع اللي تنصفق مع علابيها

أبضرب بك الدنيا وصكاتها مادام
وجيه الرجال تموت من دون طاريها

الإنسان يطلع من حياته بقطعة خام
وأنا والله إني ماني بطامع ٍفيها

أجنّب عن الشعار والشعر والإعلام
وتبلاني الشعار بعلوم ما أبيها

وجيه ٍترزز فالمنابر طوال العام
بهالشارب إني مستعد ٍلأسرّيها

صهيلي يجفّلها وأنا غربي الدمام
أجل كيف لاسمعت صهيلي حواليها

لكن الحياه أكبر من مطاول الأقزام
ومن عالم ٍللطيب مالله بهاديها

سعينا وطفنا والمقادير والأحلام
ماغير الله اللي عالم ٍفي خوافيها

دروب المراجل والوفا تتعب الأقدام
وحنا على سلم الرياجيل نحفيها

أقوله وأنا صدري لياهبت الأنسام
يشرّع لها عوج الضلوع ويحيّيها

سرى الليل كله والعرب كلها نيّام
وأنا أسوي بيوت القصايد وأغنيها

طراة الفتى لاقامت أوجيه ربعه قام
ماهوب يتصدد فاللزوم ويخليها

وأنا كنت وأبموت وأنا لهم خدام
على العز وعلوم ٍتشرّف مباديها

هلا مرحبا ترحيبة العرف والإسلام
هلا مرحبا نبدابها ثم نثنيها

أرحب بإسم شيخ العوازم بشكل ٍعام
لو ضيوفنا تستاهل إنا نسميها

من كمومنا المفسوره لعصبة البسام
يدور السطر من روس ربعي لأياديها

بني عمي اللي مجدهم حطم الأرقام
قبل لا الجزيره ترجع لحكم راعيها

ملاذ الضعيف وفاللقاء مقبرة الاخصام
تطيّر قلوب القوم لجّت عزاويها

على أم السبيب وفي ظهور أمهات إخطام
ترد الخشوم الطايله عند أذانيها

سمانا شهب وترابنا للحريب ألغام
ومن جاء يدوّر نكبته يب يلاقيها

بلا مفخره حنا سبب كثرة الأيتام
يوم ان الطمع فالناس والجهل معميها

لكنّا على ردع المعادين ماننلام
يحدوننا لأشياً مانبغى نسويها

ليا من عطينا بالكرم نتعب الأكرام
ولا من بطشنا مانحسّب تواليها

نشوف الدواير والرمك رحلة إستجمام
مانجفل لامن الخيل ثقلت مواطيها

نحفظ العهود ونظرة عيوننا قدام
ونحشم القبايل كلبوها ونغليها

جبال الجزيره من حدود اليمن للشام
تهب الهبوب ولاتغيّر مراسيها

مكاسيبنا ترفع لها البيض والأعلام
على الجمه اللي تروي عروق ضاميها

مع إخوان مريم في الكويت ومع الإمام
مواقيفنا التاريخ للحين يرويها

كتبنا الفخر بالسيف ماهوب بالأقلام
وحمينا البلد من برها لي شواطيها

وبعد ما استتب الوضع والأمر للحكام
سمينا .. وخلينا المياه لمجاريها

تحت ظلهم ستر ومعزه ووصل أرحام
وعدوان الأمه روسها بين رجليها

يموت الجهل لافرفت راية الإسلام
عسى الله يعز الدار ويعز راعيها