LILU KING IMFITTEX B’RABTA MA’ AKKUŻI SERJI FIL-LIBJA

Описание: ONE.COM.MT •
KITBA: RUSLANA BARBARA
FILMATI: ARKIVJI

Mohamed Ali Ahmed Elmushraty, magħruf aħjar bħala Lilu King, huwa mfittex mill-awtoritajiet Libjani b’rabta ma’ akkużi ta’ qtil u traffikar tad-droga.

Dan intqal fil-Qorti, ippreseduta mill-Maġistrat Donatella Frendo Dimech, nhar it-Tnejn.

Intqal kif l-Uffiċċju tal-Interpol fil-kapitali Libjana, Tripli, kien talab informazzjoni fuq ċertu Mohammed Ali El Musrati, b’rabta ma’ akkużi serji, fosthom qtil, traffikar tad-droga u sustanzi illegali, u għax kien membru fi gruppi perikolużi.

Aktar tard irriżulta li dan kien l-imputat.

F’pajjiżna, Elmushraty qed jiġi mixli b’ħasil ta’ flus, evażjoni tat-taxxa u parteċipazzjoni fi gruppi ta’ kriminalità organizzata. Dan flimkien ma’ ksur tal-kundizzjonijiet imposti fuqu mill-Qorti u sewqan mingħajr liċenzja.

Elmushraty huwa rrappreżentat mill-avukat Franco Debono.

ĦATI LI ĦEBB GĦAL MARA GĦAX MA ĠABRITX IL-ĦMIEĠ TAL-KELB

Elton Buckingham ingħata sentenza ta’ 18-il xahar ħabs sospiżi għal 28 xahar wara li nstab ħati li ħebb għal mara u darabha ħafif.

Huwa ħebb għall-mara, ta’ nazzjonalità Brażiljana, għax din ma ġabritx il-ħmieġ li ħalla l-kelb tagħha quddiem id-dar tiegħu, f’Ħ’Attard.

Buckingham, li huwa pulizija, ġie mixli wkoll li beżżagħha u ħebb għaliha, li kiser il-paċi pubblika, u li wettaq reat li bħala uffiċjal pubbliku kellu jara li ma jseħħx.

Il-vittma xehdet li kienet mart l-akkużat li qabditha minn idha, u mbagħad kompla r-raġel. Dan filwaqt li pprova jirriversja l-karozza għal fuqha meta bdiet tieħu ritratti tal-karozza.

Il-Maġistrat Frendo Dimech qalet li temmen lill-vittma, u mhux lill-imputat, għax din baqgħet dejjem konsistenti.

Hu biss minħabba l-fatt li jidher li dan l-għemil kien out of character u seħħ minħabba li l-imputat u familtu kienu ilhom jiġu soġġettati għall-għemil illegali u moqżież, li l-Qorti ma tatx piena aktar ħarxa.