សម្រស់ធម្មជាតិនិងប្រាសាទ (ចៅសាយទេវតា)

Описание: ចៅសាយទេវតា ជាប្រាសាទល្អប្រណីតក្នុងសិល្បៈស្ថាបត្យកម្មសម័យអង្គរវត្ត

សៀមរាប៖ ប្រាសាទចៅសាយទេវតា មានចម្ងាយប្រមាណ៤៨៣ម៉ែត្រ ពីខ្លោងទ្វារជ័យក្រុងអង្គរធំ។ នៅសងខាងផ្លូវនេះ មានប្រាសាទធម្មនន្ទ និងប្រាសាទចៅសាយទេវតា ដែលត្រូវបានកសាងក្នុងសតវត្សរ៍ទី១២ ក្នុងរាជ្យព្រះបាទសូរ្យវរ្ម័នទី២ ដែលជាព្រះមហាក្សត្រ កសាងប្រាសាទអង្គរវត្ត។

បើតាមអាជ្ញាធរជាតិអប្សរា ប្រាសាទទាំងពីរនេះ មិនមានសិលាចារឹកអ្វីនិយាយអំពីប្រវត្តិនោះទេ ប៉ុន្តែអ្នកជំនាញបុរាណវិទ្យា សិក្សាតាមរយៈសិល្បៈស្ថាបត្យកម្ម និងចម្លាក់នៃប្រាសាទទាំងពីរនេះ ដើម្បីដឹងពីសាវតាខ្លះៗ និងសតវត្សរ៍ នៃការកសាងប៉ុណ្ណោះ។ លោក អន សុភាព បុរាណវិទូ នៃអាជ្ញាធរជាតិអប្សរា បានថ្លែងថា ប្រាសាទចៅសាយទេវតា ត្រូវបានកសាងនាដើមរាជ្យព្រះបាទសូរ្យវរ្ម័នទី២ ដែលមានកំពែងព័ទ្ធជុំវិញប្រាសាទប្រវែង៥០ម៉ែត្រ គុណនឹង ៤០ម៉ែត្រ។ ប្រាសាទនេះ មានច្រកចេញចូលចំនួន៤ តួប៉មប្រាសាទមួយ និងមណ្ឌលតភ្ជាប់ទៅបណ្ណាល័យចំនួន២។

ស្ពានហាលប្រាសាទចៅសាយទេវតា មានទម្រង់ដូចស្ពានហាលចូលប្រាសាទបាភួន។ ចម្លាក់លម្អ និងរូបអប្សរា ជាស្នាដៃសិល្បៈស្ថាបត្យកម្ម ដូចប្រាសាទអង្គរវត្ត។ អាជ្ញាធរជាតិអប្សរា បានបញ្ជាក់ថា ប្រាសាទនៅអមផ្លូវទាំង២នេះ អាចជាគំរូនៃការធ្វើសាលាសំណាក់នៅតាមផ្លូវបុរាណ ក្នុងដើមរាជ្យព្រះបាទសូរ្យវរ្ម័នទី២ និងព្រះបាទជ័យវរ្ម័នទី៧៕