قصيدة ادور عليك يبن امي الرادود المرحوم ياسين الرميثي

Описание: اللهم صل على محمد وآل محمد الطيبين الطاهرين
والعن قتلت أهل البيت عليهم السلام والعن اعداؤهم
من الأولين والآخرين الى قيام يوم الدين
القصيده للشاعر المرحوم الشيخ هادي القصاب
قصيدة ادور عليك يبن امي
الرادود المرحوم ياسين الرميثي

ادور عليك يبن أمي
للرادود الحسيني ياسين الرميثي
القصيده للشاعر المرحوم الشيخ هادي القصاب
-----------
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
**********
جيتك من قلب مكسور أنه أختك المهضومة
جيت بروح لهفانه أدور عليك بالحومه
جيتك خويه حاجيني أعليك أمك المظلومة
وين بيا كتر مطروح جسمك هم بعد بي روح
يبن أمي صدك مذبوح وين الي ينظر لحالي
ويم جسمك يوديني
**********
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
*********
صدك نايم على التربان خويه وعلى وجه مقلوب
صدك سحكت عليك الخيل بالميدان من كل صوب
صدك خويه نزف دمك وكلبك بالسهم مصيوب
ولــمــن ياصــبي العين طلعت السهم يحسين
مــن كلبك طلع ثلثين وهذا السهم هو الحال
ما بينك وما بيني
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
********
حر وعطش وبجسمك ألف وتسعمية صواب
فوك جروحك ودمك قلبك بالســهم ينصاب
بعد شلون تتمــكن تنهضلي وترد جواب
وأدري ياضوه عيناي لو ما هل المصايب هاي
متقصر يخويه وياي وحاشاك بمثل هاليوم
محتاره تخليني
**********
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
*********
حالك هذا وأنته أنوب خويه أسمع بعد حالي
بأيتام وحـرم كـلــــبي تمحن وأنشده بالي
وين أنطي الوجه وانه أخوتي مذبحه أكبالي
وكلسا طفل من عندي يروح وينفطر جبدي
وأنه بكربله وحدي صواويني خذتها النار
والعيله وصواويني
*********
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
*********
هجمت فرد هجمه الخيل خويه وشبت النيران
وهامت عيلتك كلها من النيران للميدان
لجن ياضوه عيوني ضلت بالخيم رضعان
وأنه تمحنت بيها شلون النار أطب ليها
وأخلصها يواليها رضعانك بوسط النار
وانه العده مسلبيني
***********
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
***********
خويه محيره ضليت وأتلفت يمين يسار
أعوف الخيم رضعان تتحركـَ صغار كبار
أطب للنار أخلصها أخاف أنه أحتركـَ بالنار
والأيتام ملتمه هاي تصيح ياعمه وين حسين ابو اليمه
وهاي تصيح يازينب حر العطش ماذيني
*************
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
****************
رضعن تـضفط نيران وأيتام بحوافر خيل
ماتت بالسحك وعيال ماتت والدموع تسيل
وأنه وحيده مظلومه بيه بعد ماضل حيل
وعباس الاجيت ويه هسه من كمت أنخاه
أضن كلي يزينب أه عليج شبيدي يعيوني
يزينب وين جفيني
****************
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
****************
خذاك الدهر من عندي يخويه وأكَطعت بيه
مصايب كربله يحسين مدري أمنين أجت ليه
من الخدر والصيوان تــالــيه لــبـني أميه
هيجي الدهر خلاني وضيهم وقهر راواني
صرت من عكب ولياني أرد السوط بيساري
وأستر وجهي بيميني
*****************
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
*****************
ها شتكول يبن أمي ردلي بصوتك أجوابي
تقبل بعد أشكـيـلـك هضمي وجمرة امصابي
أنته بالسهم مصيوب وانه فراكك أصوابي
أنته بروحك بجسمك وانه مجرحه بهضمك
يخويه خلي اجي يمك أداوي جسمك بروحي
وانته بشوفتك داويني
******************
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
*****************
يخويه ان جان ماعندك هـمــه تكوم لعيالك
لاتهتم يــاماي الـعين أنــه خلافك بدالك
أحمي عـيـلتك أنـــه يخويه واحرس أطفالك
لجن يحسين أخاف أعليك ضامي ومحد يرويك
خلي أعتني وأقصد ليك أقدم ألك ماي العين
وأشرب يابعد عيني
***************
أدور عليك يبن امي ولا واحد يدليني
عاد أنته بضعيف الصوت يامظلوم حاجيني
***************