ធ្លាយព័ត៌មានថា អាមេរិកបានត្រៀមខ្លួនរួចហើយ សម្រាប់ប្រតិបត្តិការយោធាយូរសប្តាហ៍ ជាមួយអ៊ីរ៉ង់

Описание: 🔥 ធ្លាយព័ត៌មានថា អាមេរិកបានត្រៀមខ្លួនរួចហើយ សម្រាប់ប្រតិបត្តិការយោធាយូរសប្តាហ៍ ជាមួយអ៊ីរ៉ង់

ស្របពេលស្ថានការណ៍កាន់តែតានតឹងនៅតំបន់មជ្ឈិមបូព៌ា ពេលនេះមន្ត្រីអាមេរិកបានទម្លាយព័ត៌មានថា ទីក្រុងវ៉ាស៊ីនតោន បានត្រៀមលក្ខណៈរួចហើយសម្រាប់ប្រតិបត្តិការយោធាយូរសប្តាហ៍ លើអ៊ីរ៉ង់។
មន្ត្រីអាមេរិក២រូបសុំមិនបញ្ចេញឈ្មោះ ត្រូវបានដកស្រង់សម្តីដោយសារព័ត៌មាន Reuters ដែលនិយាយកាលពីថ្ងៃសៅរ៍ទី១៤ខែកុម្ភៈថា៖ «កងទ័ពអាមេរិកកំពុងត្រៀមលក្ខណៈសម្រាប់ប្រតិបត្តិការយោធាយូរសប្តាហ៍ប្រឆាំងនឹងអ៊ីរ៉ង់ ប្រសិនបើប្រធានាធិបតី ដូណាល់ ត្រាំ បញ្ជាឲ្យមានការវាយប្រហារមែន។ យុទ្ធនាការយោធាប្រឆាំងអ៊ីរ៉ង់អាចនឹងរីកធំទៅជា ជម្លោះដ៏ធ្ងន់ធ្ងរជាងមុនឆ្ងាយណាស់ បើធៀបនឹងអ្វីដែលធ្លាប់កើតមានរវាងប្រទេសទាំងពីរនាពេលកន្លងមក»។
មន្ត្រីម្នាក់ក្នុងចំណោមនោះបានលើកឡើងថា ជាផ្នែកមួយនៃយុទ្ធនាការដែលអាចកើតមាន ទីក្រុងវ៉ាស៊ីនតោនអាចនឹងបើកការវាយប្រហារលើមូលដ្ឋានសន្តិសុខ និងស្ថាប័នរដ្ឋរបស់អ៊ីរ៉ង់ មិនមែនត្រឹមតែរចនាសម្ព័ន្ធនុយក្លេអ៊ែរប៉ុណ្ណោះទេ ហើយទីក្រុងវ៉ាស៊ីនតោនគិតទុកជាមុនថា ទីក្រុងតេហេរ៉ង់នឹងវាយបកវិញ ដែលនឹងបង្កឲ្យមាន ការវាយប្រហារតបតគ្នាទៅវិញទៅមកនិងការសងសឹកក្នុងរយៈពេលវែង»។
រឿងនេះកើតឡើងបន្ទាប់ពីលោក ត្រាំ បានព្រមានទៅអ៊ីរ៉ង់ម្តងទៀតថា ប្រទេសនេះនឹងទទួល «លទ្ធផលខ្លោចផ្សា» បើគ្មានកិច្ចព្រមព្រៀងនុយក្លេអ៊ែរទេ។
ថ្លែងប្រាប់អ្នកសារព័ត៌មានកាលពីថ្ងៃព្រហស្បតិ៍ទី១២ខែកុម្ភៈឆ្នាំ២០២៦ ពោលគឺមួយថ្ងៃបន្ទាប់ពីជំនួបពិភាក្សាជាមួយនាយករដ្ឋមន្ត្រីអ៊ីស្រាអែល Benjamin Netanyahu, លោកត្រាំព្រមានថា៖ «យើងត្រូវតែឈានដល់កិច្ចព្រមព្រៀងមួយ បើមិនដូច្នោះទេ វានឹងក្លាយជារឿងដ៏ខ្លោចផ្សា។ ខ្ញុំអត់ចង់ឲ្យរឿងអ៊ីចឹងកើតឡើងទេ ប៉ុន្តែយើងត្រូវតែមានកិច្ចព្រមព្រៀង។ វានឹងក្លាយជារឿងដ៏ខ្លោចផ្សាបំផុតសម្រាប់អ៊ីរ៉ង់ ប្រសិនបើពួកគេមិនព្រម»។
លោក ត្រាំ បន្តថា៖ «យើងនឹងរង់ចាំមើលថាតើយើងអាចសម្រេចបានកិច្ចព្រមព្រៀងជាមួយពួកគេដែរឬទេ ហើយប្រសិនបើយើងមិនអាច យើងនឹងត្រូវឈានទៅដល់ដំណាក់កាលទីពីរ ដែលនឹងធ្ងន់ធ្ងរបំផុតសម្រាប់ពួកគេ»។
ការព្រមាននេះទៀតសោតកើតឡើងមិនបានប៉ុន្មានថ្ងៃផង បន្ទាប់ពីលោកត្រាំ ប្រកាសថា សហរដ្ឋអាមេរិកនឹងបញ្ជូនកងនាវាចម្បាំងដ៏មហិមាទីពីរ ទៅកាន់តំបន់មជ្ឈិមបូព៌ា ពោលគឺសំដៅទៅអ៊ីរ៉ង់តែម្តង៕
លោកត្រាំ ចង់ឲ្យមានការ «ផ្លាស់ប្តូរអ្នកដឹកនាំ» ខណៈបញ្ជូននាវាចម្បាំងទៅក្បែរអ៊ីរ៉ង់
«ជារឿងដ៏ល្អបំផុតដែលនឹងអាចកើតមានឡើង»។ នេះគឺជាសម្តីត្រឹមតែប៉ុន្មានម៉ាត់របស់ប្រធានាធិបតី ដូណាល់ ត្រាំ ដែលចង់ឲ្យមានការផ្លាស់ប្តូរប្រមុខរដ្ឋាភិបាលថ្មីនៅក្នុងប្រទេសអ៊ីរ៉ង់។
ចេញផ្សាយនាថ្ងៃទី១៤ខែកុម្ភៈឆ្នាំ២០២៦ សារព័ត៌មាន BBC បានឲ្យដឹងថា លោកត្រាំបានលើកឡើងថា អស់រយៈពេល៤៧ឆ្នាំមកហើយ ដែលមានតែការ «និយាយហើយនិយាយទៀត» រហូតដល់មានការបាត់បង់ជីវិតមនុស្សជាច្រើន ដូច្នេះវាដល់ពេលហើយដែលត្រូវផ្លាស់ប្តូរអ្នកដឹកនាំបច្ចុប្បន្ន ដោយលោកបន្ថែមថា «មានមនុស្ស» ដែលត្រៀមខ្លួនរួចជាស្រេចដើម្បីមកដឹកនាំជំនួស។
ដើម្បីបង្ហាញពីអំណាច សហរដ្ឋអាមេរិកកំពុងបញ្ជូនគ្រឿងយោធាដ៏ខ្លាំងបំផុតរបស់ខ្លួនទៅក្បែរប្រទេសអ៊ីរ៉ង់។ នាវា USS Gerald R. Ford ដែលជានាវាផ្ទុកយន្តហោះធំជាងគេ និងថ្មីបំផុតក្នុងលោក កំពុងធ្វើដំណើរទៅកាន់មជ្ឈិមបូព៌ា ដើម្បីចូលរួមជាមួយនាវាចម្បាំងមួយទៀតគឺ USS Abraham Lincoln។ ការបញ្ជូនកម្លាំងដ៏ធំនេះ គឺដើម្បីដាក់សម្ពាធឲ្យអ៊ីរ៉ង់បញ្ឈប់កម្មវិធីនុយក្លេអ៊ែរ និងបញ្ឈប់ការបង្ក្រាបលើក្រុមអ្នកតវ៉ានៅក្នុងប្រទេស។
សំណួរសំខាន់នៅពេលនេះគឺថា តើកិច្ចព្រមព្រៀងថ្មីអាចកើតឡើងដែរឬទេ? លោកត្រាំ ចង់ឲ្យអ៊ីរ៉ង់បោះបង់ការចម្រាញ់នុយក្លេអ៊ែរ និងឈប់ជួយក្រុមប្រដាប់អាវុធក្នុងតំបន់នានា។ ចំណែកប្រធានាធិបតីអ៊ីរ៉ង់ លោក Masoud Pezeshkian និយាយថា លោកចង់ឲ្យអាមេរិកដកទណ្ឌកម្មសេដ្ឋកិច្ចចេញ ប៉ុន្តែលោក «នឹងមិនចុះញ៉ម» ចំពោះការទាមទារដែលលោកយល់ថាហួសហេតុនោះឡើយ៕