Նեղություններ, Հալածանքներ եւ Ավերումներ - Մատթեոս 24

Описание: Մատթեոս 24 - Նեղություններ, Հալածանքներ եւ Ավերումներ
Կարդաց` Էդգար Ալեքսանյանը
Երաժշտությունը` Էդգար Ալեքսանյանի

Նեղություններ, հալածանքներ եւ ավերումներ
(Մտ 10.17-23, Մր 13.3-13, Ղկ 21.7-19)

3 Եվ մինչ Հիսուսը նստած էր Ձիթենյաց լեռան վրա, աշակերտներն առանձին եկան եւ նրան հարցրին.
Ասա՛ մեզ, ե՞րբ կպատահի այդ. ի՞նչ նշանով կիմանանք, թե ե՛րբ կլինի քո գալուստը եւ այս աշխարհի վախճանը։*
4 Հիսուսը պատասխանեց նրանց.
Զգո՛ւյշ եղեք, չլինի թե մեկը ձեզ խաբի, 5 որովհետեւ շատերը կգան իմ անունով եւ կասեն, թե՝ «Ես եմ Քրիստոսը», ու կմոլորեցնեն շատերին։ 6 Դուք լսելու եք պատերազմների ձայներ եւ պատերազմների լուրեր. զգո՛ւյշ եղեք, չխռովվեք, որովհետեւ պետք է, որ դրանք պատահեն։ Բայց դա չի նշանակում, որ աշխարհի վախճանն է։ 7 Ազգերն ազգերի դեմ են կռվելու, եւ թագավորությունները՝ թագավորությունների դեմ։ Զանազան վայրերում սով, համաճարակ եւ երկրաշարժեր են լինելու.* 8 բայց այս ամենը դեռ երկունքի սկիզբն է։ 9 Այն ժամանակ ձեզ նեղության պիտի մատնեն ու սպանեն, եւ բոլոր ազգերն իմ պատճառով պիտի ատեն ձեզ։* 10 Այն ժամանակ շատերն իրենց հավատը պիտի կորցնեն, միմյանց պիտի մատնեն եւ միմյանց ատեն։ 11 Ապա բազում սուտ մարգարեներ պիտի ելնեն եւ շատերին մոլորեցնեն։ 12 Անօրենության շատանալուց շատերի սերը պիտի ցամաքի։ 13 Բայց ով որ մինչեւ վերջ դիմանա, նա պիտի փրկվի։* 14 Արքայության Ավետարանը պիտի քարոզվի ամբողջ աշխարհում՝ իբրեւ վկայություն բոլոր ժողովուրդների, եւ ապա պիտի գա վախճանը։