حنا عتيبه والعتيبي لا يلف ولايدور | عيضه الثبيتي & فايز الدوسري | حصرياً 2025

Описание: الصيف حامي والصدور تفور والدله تفور
في جال نارٍ تلتهب و النار من شبّابها

بريّةٍ تجلا عماس الراس وتزين الامور
فالديره اللّي يشوي طيور السماء ملهابها

فنجالها الاشقر يجيب اللّي بتفكيري تدور
اسبوع تقرع جوف صدري والله اللّي جابها

فرديةٍ في ساحة الميدان مطغيها الغرور
صكّوا عليها عتيبه الهيلا وزاد اعجابها

لا شافها التاجر ماخلا في حساب البنك سور
يحذف لها الشيكات والتجار فوق اعصابها

لاصار ماوردتها ميراد شيبان النحور
تحرم علي الشاذليه حُرم ياصبّابها

اشطّب على عذرٍ يعذّرني ولا ني بمعذور
فالساعة اللّي يحسبون الغانمين احسابها

ميعادنا فالكرنفال اللّي يزيد النور نور
من طيب روسٍ تفتخر بـ احسابها وانسابها

فايز و فواز الرجال اللّي مايلحقهم قصور
اجزل بيوت الشعر فيهم هاجسي غنّابها

طيبٍ يفوح ولا نعدّه شي مع طيب الصدور
في ليلةٍ وصلت ليا حد النجوم أطيابها

و الزحمه اللّي حاصله متوقّعه عند المرور
من قبل لا تحصل تراهم خابرين اسبابها

يامشعل ابن عايض التاريخ في مثلك فخور
رحّب و ربعك في يمينك ضافيٍ ترحابها

عمرت حفلٍ شرف عتيبه وبالعز معمور
ياحي راسٍ لا بغى له حاجةٍ ماهابها

مشعل حزام اللي لحقه من الزمن ضدّه وجور
حزامنا يوم الظروف مكشّرات انيابها

اليا نصيته في طلب لو حاجتك سد البحور
الوقفه اللّي ماتعز الراس مايرضابها

منصى ومرسى للرجال وطيب راس وطيب شور
اهل الركايب صوب ابو فايز تعن اركابها

خدام دولتنا على عهد وولاء طول العصور
ال السعود اهل السيوف الساطيه ونصابها

بلادنا رمز الفخر واترابها كنّه فخور
من حيث ما هب الهواء ياطيب ريح اترابها

اخوانه حزام السعد وحزامنا اللي مايبور
مثل سيوفٍ يجرح كبود العدا مضرابها

من ذخر شيخٍ سمعته حيّه واله فالطيب دور
ياحي ابن معتق والامداح انعرف كسّابها

راسٍ نماريبه ونفخر فيه بالصوت الجهور
مجالسه من طيب راسه مايقفّل بابها

من روس قومٍ طيبهم يبقى على مرّ الشهور
ذوي خزام خزام روسٍ صابها ماصابها

مع طاري الصفيّان ياكثر المشاعر والشعور
قبيلةٍ كن القصايد ماتزين الااا بَها

ياحظ منهم محزمه لاجات للحزام الظهور
واللي براسه مطمعه عساه مايبلابها

تقدم على الموت ولا تستعرف بممنوع العبور
ولا توخذ اللي وسمهم فعضودها وارقبها

((حنا عتيبه والعتيبي لا يلف ولا يدور))
نقدم على وضح النقا و الخيل من ركابها

حتى لو يبور الزمن راس العتيبي مايبور
شوق الهنوف اللي مايملا عينها خطّابها


عيضه الثبيتي