Norvegiyadagi o‘zbeklar: “Registon” restorani, oyliklar, yolg‘onlar

Описание: “Vatandoshlarni izlab” “Baxtli odamlar o‘lkasi” yoki iqtisodiy jihatdan “Shimoliy istiqbol namunasi”
deb ataluvchi taraqqiy etgan mamlakat Norvegiyada bo‘ldik. Dunyoning eng qimmat top 10 shaharlaridan biri sanalgan Oslo faqatgina ma’muriy markaz emas. Bu shaharda siz ertalab fordda suzib, tushdan keyin o‘rmonda chang‘i uchishingiz va kechqurun dunyodagi eng qimmat restoranlardan birida ovqatlanishingiz mumkin. U bir vaqtning o‘zida ham zamonaviy megapolis, ham sokin qishloq muhitini o‘zida jamlagan.

Toshkentlik Asad Mahmudov 2008-yildan beri Norvegiyada yashaydi. Oilali. Muhojirlarga xos barcha sinovlarni boshdan o‘tkazgan. Savdo do‘konlarida ishlagan. Keyinchalik oshxonalarda ishlab, tajriba orttirgan. Bu tajriba Oslo shahridagi ilk o‘zbek restoranining ochilishiga turtki bo‘ldi. Uch yil avval ochilgan “Registon” bugun nafaqat yurtimiz milliy taomlarini, balki o‘zbek madaniyatini ham norvegiyaliklarga tanityapti.

Osloda restoran va oshxonalar juda ko‘p, raqobat har qadamda. Ana shunday sharoitda mutlaqo notanish bo‘lgan millat tamaddixonasini ochish katta tavakkalchilik. Buni tushungan Asad va uning hamkorlari zamonaviy piar texnologiyalariga emas, ko‘proq restorandagi taomlarning sifatiga urg‘u berib, e’tibor qozonishga harakat qilgan. Bu urinishlar samara berib, mashhur mahalliy nashr “Aftenposten” gazetasi muxbirlarining e’tiboriga tushgan...