කාන්තා අයිතිය ගැන රජය ඉහළින් කතා කළාට ඒ කතා කළ කිසිවක් ක්‍රියාවෙන් ඔප්පු කරලා නැහැ.

Описание: කාන්තා අයිතිය ගැන රජය ඉහළින් කතා කළාට ඒ කතා කළ කිසිවක් ක්‍රියාවෙන් ඔප්පු කරලා නැහැ - විපක්ෂ නායක සජිත් ප්‍රේමදාස මහතා

ජාත්‍යන්තර කාන්තා දිනය සමඟ කාන්තාවට සුරැකුම් ආර්ථිකය, ජාතික සුරැකුම් ප්‍රතිපත්තිය ක්‍රියාත්මක කළ යුතුය යන යෝජනාව වැදගත් හා වටිනා අදහසක් බවත් මේ වටිනා අදහස ප්‍රතිපත්තිමය වශයෙන් පිළිගත්තත් රජය ප්‍රකාශයට පත් කරන දේ ක්‍රියාත්මක කරනවාද කියා ගැටලුවක් ඇති බවත් ජාතික කාන්තා කොමිසමක් ස්ථාපිත කරනවා කියූ රජය Dr. රමනි ජයසුන්දර මහත්මිය එහි සභාපති ලෙස පත් කළත් මේ මොහොතේ එයද බරපතල අර්බුධයකට ලක්ව ඇති බවත් විපක්ෂ නායකවරයා පැවසීය.

කාන්තා කොමිසමක් ඇති කරන්නේ කාන්තා අයිතිය සුරක්ෂිත කිරීමට සහ කාන්තාවන්ට එරෙහි ගැටලුවලට නිරවුල් විසඳුමක් ලබා දීමට නමුත් රජය මේ කාන්තා කොමිසම කාන්තා කටයුතු අමාත්‍යාංශයෙ රූකඩයක් බවට පත් කරන්න උත්සාහ කළ බවත් මේ ආකාරයෙන් නම් කාන්තා අයිතිය සුරක්ෂා නොවන බවත් විපක්ෂ නායක සජිත් ප්‍රේමදාස මහතා අද පාර්ලිමේන්තුවේදී පැවසීය.

විපක්ෂ නායකවරයා මේ බව කියා සිටියේ අද පාර්ලිමේන්තුවේ පැවැති කාන්තා දිනයට සමගාමී විවාදය හා එක්වෙමිනි.

බඩුමිල වැඩිවන විට කාන්තාව සුරක්ෂිත වන්නේද කියා ගැටලුවක් ඇති බවත් තෙල් මිල ගෑස් මිල වැඩි වී ඒවාට පොලිම්වල සිටිනා විට, විදුලි බිල වැඩි කරන විට කාන්තාව සුරක්ෂිත වන්නේද කියා ගැටලුවක් ඇති බවත් අද වන විට ශ්‍රම බලකායේ සහභාගීත්වය 32%ක් බවත් ඒ තුළින්ද කාන්තාව කොන් වී ඇති බවත් උසස් පෙළ සමත් කාන්තාවන් 8.2%ක් විරැකියාවෙන් පෙළෙන විට පුරුෂයන් 4.2%ක් බවත් යෞවනියන්ගේ විරැකියා ප්‍රතිශතය 27.3%ක් බවත් සුරැකුම් ආර්ථිකය ගැන කතා කරනවා සේම කතාව ක්‍රියාවට නංවා ගුණාත්මක හරාත්මක ධනාත්මක වටිනාකමක් කාන්තාවට එකතු කරන ප්‍රායෝගික වැඩපිළිවෙළක් අවශ්‍ය බවත් විපක්ෂ නායකවරයා මෙහි දී පැවසීය.

කාන්තාව සුරක්ෂිත කරනවා කියූ රජය කාන්තාව සවිබල ගන්වන ප්‍රජා මූල සංවිධාන නියාමනය කරනවා

කාන්තාව සුරක්ෂිත කරනවා කියූ රජය ගම්වල නගරවල ප්‍රජාමූල සංවිධාන ස්වේච්ඡා සංවිධාන ගොඩනගා කාන්තාව මුල් වූ ක්ෂුද්‍ර මූල්‍ය ණය පහසුකම් ලබා දීම නියාමනය කළ බවත් බිස්නස් එකක් වූ ක්ෂුද්‍ර මූල්‍ය ණය පහසුකම් නියාමනය කරනවා වෙනුවට ගමේ නගරයේ ඇති කාන්තාව මූලික කර ගත් සංවිධාන නියාමනය කරන්න රජය කටයුතු කරන බවත් කාන්තා අයිතිය ගැන කතා කරන රජය ඊයේ කාන්තාවන්ගේ අයිතිය ඉවත් කළ බවත් විපක්ෂ නායකවරයා වැඩිදුරටත් පැවසීය.

ගිණි පොලී මුදලාලිලාගේ වින්දිතයන් බවට කාන්තාව පත් වෙලා

අද ගිනි පොලී ණය මුදලාලිලාගේ වින්දිතයන් බවට කාන්තාව පත්ව ඇති බවත් කොල්ලකාරී මූල්‍යමය සූරාකෑමට කාන්තාව ලක්ව ඇති බවත් මාර්ගගත ක්‍රමයට ණය ක්‍රමවේද ආරම්භ කර මේ මාෆියාව තුළ කාන්තාව වින්දිතයන් බවට පත්ව ඇති බවත් මෙහි දී විපක්ෂ නායකවරයා පෙන්වා දුන්නේය.

ළමා හා මාතෘ මන්දපෝෂණය අද වැඩි වෙලා

අද වන විට මාතෘ මන්දපෝෂණය වර්ධනය වී ඇති බවත් එය ගණනය කරන ශරීර ස්කන්ධ තත්ත්වය නොමැති මව සුරක්ෂා කරන්න ජාතික වැඩපිළිවෙළක අවශ්‍යතාව ඇති බවත් මෙහි දී ළමුන් දරුවන් අමතක කළ නොහැකි බවත් අද කාන්තාව මව දරුවන් හඳුන්වන්නේ සමාජයේ දැඩි අවදානමට ලක්වූවන් ලෙස බවත් බඩු මිල වැඩි වීම දුප්පත්කම වැඩිවීම තුළ වසර කිහිපයක් තුළ රට මුහුණ දුන් ඛේදවාචක 4 තුළ නිර්මාණය වූ බරපතල දුප්පත්කම තුළ මන්දපෝෂණය වර්ධනය වී ඇති බවත් මේ නිසා නීරක්තිය රක්ත හීන තාව අඩුබර දරුවන් ආදී ගැටලු රැසක් මතුව තිබෙන බවත් විපක්ෂ නායකවරයා පැවසීය.

රු. 16730කින් මාසයක් ජීවත් වෙන්නේ කොහොමද?

සුරැකුම් ආර්ථිකය ගැන කතා කරන මොහොතේ ජන සංඛ්‍යා ලේඛන දෙපාර්තමේන්තුවට අනුව එක් පුද්ගලයකුට මාසයක් ජීවත් වෙන්නේ රු.16730ක් ඇති බවට පවසන බවත් ආහාර හා ආහාර නොවන වියදම් පිරිමහගන්න මෙය ප්‍රමාණවත් නොවන බවත් වැරදි දත්ත මත නිර්මාණය වන ප්‍රතිපත්තින් අසාර්ථක ප්‍රතිපත්තීන් බවට පත්වන බවත් කාන්තා මූලික ගෘහ ඒකක විශාල ප්‍රමාණයක් ඇති නමුත් ඔවුන් සවිබල ගන්වන්න පැහැදිලි වැඩපිළිවෙළක් නොමැති බවත් විපක්ෂ නායකවරයා පැවසීය.

සෑම තැනකම කාන්තාවට අභියෝග මතු වෙලා

සුහුරු අධ්‍යාපනය ගැන කතා කළත් මාර්ගගත ක්‍රමවේද හරහා කාන්තාව ඇතුළු දරු පරපුර බරපතල අවදානමට ලක්ව ඇති නිසා මේ වෙනුවෙන් ගත යුතු පියවර ගත යුතු බවත් ළමා විවාහ කර දීම ද අද බරපතල ගැටලුවක් වී ඇති නිසා ඒවා වළක්වා ලීමට දැඩි නීතිරිති ගෙන ආ යුතු බවත් ගෘහයේත් මහපාරේත් වැඩබිමේදීත් හිංසනයට ලක්වන කාන්තාවන් ආරක්ෂා කිරිමට පියවර ගත යුතු බවත් ජාතික සුරැකුම් ප්‍රතිපත්තිය පිළිගත්තත් අප රටට නිර්මාණය වූ අභියෝග හා හානිය තුළ කවදාවත් කාන්තාවට සුරැකුම් ආර්ථිකයක් නිර්මාණය කළ නොහැකි බවත් බාල ගල් අගුරු නිසා විදුලි බිල වැඩි කිරීම නිසා කාන්තාවන් ඇතුළු සමාජයම අසහනය පත්වන බවත් විපක්ෂ නායකවරයා පැවසීය.