Жаға ұстатарлық жағдай: Ақмола облысында бүтін бір отбасы өлі табылды

Описание: Ақмола облысында бүтін бір отбасы өлі табылды. Туған әке-шешесі, нағашы ағасы мен 18 жастағы жиенін айуандықпен өлтіруі мүмкін деген күдікпен осы үйің 42 жастағы баласы ұсталды. Жаға ұстатарлық жаңалық Астана маңындағы Жібек Жолы ауылының халқын есеңгіретті. Ал қанды қол қылмыстың қай уақытта және қандай жағдайда болғаны әзірге белгісіз. Оқиға орнында болып қайтқан әріптесім Серік Дәрменұлы баяндайды.
СЕРІК ДӘРМЕНҰЛЫ, тілші :
Дәл осы шаңырақтың ішінде бір отбасының өмірі қас-қағым сәтте қиылды. Тергеу дерегінше, Жібек жолы ауылының 42 жастағы тұрғыны өз әке-шешесін, мүгедек ағасы мен 18 жастағы жиенін аяусыз өлтірді деген күдікке ілінді. Қазір азаматтың қолына кісен салынып, уақытша ұстау изоляторына қамалды. Ауыл тұрғындарының айтуынша, ол психодиспансерлік есепте тұрған.
Бауырының қазасын естіген Галина Набиева бұл сұмдыққа әлі де сене алар емес. Айтуынша, марқұм сіңілісі ұлының мінезі өзгергенін бұған дейін туыстарына айтқан екен. Бірақ, жағдайдың соңы дәл осылай аяқталады деп ойламаған.
ГАЛИНА НАБИЕВА, марқұмның әпкесі:
Иә, ол психиатриялық есепте тұрған. Біздің Новороссийскте тұратын ағамыз бар. Сіңілім оған хабарласып, ұлына шағымданған екен. Неге маған айтпады? Айтқанда, мен оны тиісті жерге бірден орналастырар едім. Ол екі жыл психиатриялық ауруханада жатты. Үшінші сыныпта-ақ ақыл-есі кем деп танылған. Оны қараусыз қалдыруға болмайтын еді. Оған міндетті түрде көмек көрсетілуі керек болатын. Дәрігерлер де өз жұмысын дұрыс атқармаған.
Қанды қылмыс нақты қай уақытта жасалғаны әзірге белгісіз. Көршілерінің сөзінше, үйден айқай-шуды ешкім естімеген. Тек кейде күдікті өзімен-өзі айқайлап жүретінінін байқаған екен. Айта кетейік, қара жамылған отбасында ата-әжесімен 18 жастағы немересі және апасының сырқат бауыры бірген тұрған.
АНАРГҮЛ ИБРАЙЫМБЕКОВА, марқұмдардың көршісі:
Бір айқайлап жүрді. Бірақ былай көшелерге шықпайтын әйтеуір. Өзінің шекарасында жүретін. +Біз тек жақындарымыздан естідік. Ал былай үйден ешқайсымыз есітігенде жоқпыз. Ешқандай шу да болған жоқ. Естідік сырттан өзіміз таңқалып отырмыз қалай ондай жағдайға апарған деп. Өйткені сырттан баласын көретінбіз. Өзімен өзі жүретін.
Ал, полиция қызметкерлері тергеу амалдарының жүріп жатқанын жеткізді.
ЕРЛАН АҚБАРОВ, Ақмола облысы полиция департаментінің бірінші орынбасары:
Полиция қызметкерлері күдіктіні ізін суытпай ұстап, уақытша ұстау изоляторына қамады. Аталған факті бойынша қылмыстық іс қозғалды. Тергеу барысы ішкі істер министрлігі мен Ақмола облысы полиция департаменті басшылығының бақылауында.
Жібек жолындағы бұл қанды қылмыс ауылдың тыныштығын бұзды. Бір шаңырақтың шамы сөнді. Енді тергеу органдары қайғылы жағдайдың нақты себеп-салдарын анықтамақ.



#Информбюро #31арна #БастыЖаңалықтар #Новости #31канал