ဒီနေ့ခေတ်ဘောလုံးသမားတွေ သိဖို့ကောင်းတယ် | ဦးစိုးမြင့် ရွှေခေတ်လက်ရွေးစင်

Описание: ၁၉၆၆ ခုနှစ် Asian Games ဗိုလ်လုပွဲတွင် အီရန်လက်ရွေးစင်ဘောလုံးအသင်းကို တဂိုး၊ ဂိုးမရှိဖြင့် အနိုင်ရခဲ့သည့် ပွဲစဉ်နှင့်ပတ်သက်၍ တွေ့ကြုံခဲ့ရပုံများကို ရွှေခေတ် မြန်မာလက်ရွေးစင် ဘောလုံးသမားတဦးဖြစ်သည့် အသက် ၈၃ နှစ်အရွယ် ဦးစိုးမြင့်က ပြန်ပြောင်းပြောပြနေခြင်း ဖြစ်သည်။ အဆိုပါပွဲစဉ်တွင် ကျောနံပါတ် ၄ ဂျာစီကိုဝတ်ဆင်ပြီး အီရန်တိုက်စစ်ကို ပွဲသိမ်း ခရာမမှုတ်မချင်း အသင်းဖော်များနဲ့အတူ ကြံ့ကြံ့ခံရင်ဆိုင်ခဲ့ရကြောင်း ဦးစိုးမြင့်က ဆိုသည်။

တောင့်တင်းကြံ့ခိုင်သည့် ခန္ဓာကိုယ်ဖွဲ့သည်းပုံ၊ သန်မြန်ဆဲ သွားလာလှုပ်ရှားပုံတို့က အသက် ၈၀ ကျော်အရွယ်မှ ဟုတ်ပါလေစဟုပင် သံသယဝင်မိပေလိမ့်မည်။ ၅ ပေ ၁၁ လက်မခန့်ရှိသော အရပ်အမောင်းနှင့် အသက် ၈၃ နှစ်အရွယ်ထိတိုင် ခါးမကိုင်းသေး။ လေးလံတုန်ရီမှုမရှိ။

မြန်မာဘောလုံးလောက၏ ဂန္ထဝင်တဦးဖြစ်လာမည့် မောင်စိုးမြင့်ကို အဖ ဦးအောင်သိန်း၊ အမိ ဒေါ်မြဒင်တို့က ၁၉၄၀ ပြည့်နှစ် မတ်လ ၂၃ ရက်တွင် မော်လမြိုင်မြို့ ၌ မွေးဖွားခဲ့သည်။ မွေးချင်း ၉ ဦးအနက် သားကြီးသြရသဖြစ်သည်။ မောင်စိုးမြင့်သည် ငယ်ရွယ်စဉ်ကပင် ဘောလုံးအားကစားကို ရူးသွပ်စွဲလမ်းခဲ့၏။ ရပ်ကွက်ပွဲများတွင် မောင်စိုးမြင့် မပါလျှင် မပြီးပေ။ ရပ်ကွက်ပွဲ၊ ကျောင်းပွဲများမှတဆင့် မော်လမြိုင် ခရိုင်လက်ရွေးစင်အဖြစ် ရွေးချယ်ခံခဲ့ရသည်။ သူပညာသင်ကြားနေသည့် အမှတ် (၁) အခြေခံပညာအထက်တန်းကျောင်းလက်ရွေးစင်အဖြစ် ရွေးချယ်ခံခဲ့ရပြီး ၁၉၅၉ အခြေခံပညာကျောင်းပေါင်းစုံ ဘောလုံးပြိုင်ပွဲတွင် ချန်ပီယံဖြစ်ခဲ့သည်။

၁၉၆၀ ပြည့်နှစ်တွင် ဆယ်တန်းအောင်ပြီးနောက် မော်လမြိုင်ကောလိပ်သို့ တက်ရောက်ခဲ့သည်။ မော်လမြိုင် ကောလိပ်လက်ရွေးစင်အသင်းတွင်ကစားစဉ် မြန်မာ့လက်ရွေးစင်အသင်းတွင် ကစားဖော်ဖြစ်လာမည့် အောင်ခင်နှင့်ဆုံခဲ့ကြသည်။ အောင်ခင်ဆိုသည်မှာ ၁၉၆၆ ခုနှစ် Asian Games ဗိုလ်လုပွဲတွင် အီရန်အသင်းဘက်သို့ တလုံးတည်းသောအနိုင်ဂိုး သွင်းယူခဲ့သည့် ရွှေဂိုးအောင်ခင်ပင်ဖြစ်သည်။ ၁၉၆၂ ခုနှစ်တွင် ရန်ကုန်တက္ကသိုလ်သို့ ပြောင်းရွှေ့တက်ရောက်ခဲ့ပြီးနောက် ရန်ကုန်တက္ကသိုလ် လက်ရွေးစင်များ ဖြစ်လာခဲ့၏။ တက္ကသိုလ်တက်နေစဉ် ၁၉၆၃ ခုနှစ်တွင် မြန်မာလက်ရွေးစင် ဖြစ်လာခဲ့သည်။

ဆက်လက်ပြီး မော်လမြိုင်ကောလိပ်မှ ရန်ကုန်တက္ကသိုလ်သို့ ပြောင်းရွှေ့တက်ရောက်သည့်အချိန်တွင် ကံကြမ္မာက မျက်နှာသာပေး၍ သူ၏ လက်ဦးဆရာဖြစ်လာမည့် ဆရာငြိမ်းနှင့် တွေ့ဆုံခဲ့၏။ ဆရာငြိမ်း၏ သွန်သင်ပြသမှုတို့က ကစားသမားဘဝအထွဋ်အထိပ်သို့ရောက်ရှိစေရန်အတွက် ကြီးမားသော အထောက်အပံ့ကောင်းများဖြစ်လာခဲ့သည်။ ရန်ကုန်တက္ကသိုလ် လက်ရွေးစင်အသင်း၏ အသင်းခေါင်းဆောင်အဖြစ် မောင်စိုးမြင့် တာဝန်ယူခဲ့ရသည်။

၁၉၆၃ ခုနှစ်တွင် မလေးရှားနိုင်ငံ ပီနန်မြို့တွင်ကျင်းပခဲ့သည့် အာရှလူငယ်ဘောလုံးပြိုင်ပွဲနှင့် ဘန်ကောက်တွင်ကျင်းပခဲ့သည့် ကျွန်းဆွယ်ပြိုင်ပွဲ၊ ၁၉၆၄ မာဒေးကားဖလား၊ ၁၉၆၅ ကျွန်းဆွယ်ပြိုင်ပွဲ (ယခု Sea Games) ပြိုင်ပွဲ၊ ၁၉၆၆ မာဒေးကားဖလားပြိုင်ပွဲေတွေမှာ ဗိုလ်စွဲခဲ့ပြီး မြန်မာအသင်းရဲ့ ခံစစ်ကျောက်ဆောင်အဖြစ် စိုးမြင့်ပါဝင်ခဲ့သည်။

မျက်မှောက်ခေတ်ဒေသတွင်း ဘောလုံးအဆင့်အတန်းတိုးတက်ပါသည်ဆိုသော ထိုင်း၊ ဗီယက်နမ်၊ အင်ဒိုနီးရှားတို့ပင် မရရှိသေးသည့် အာရှအားကစားပြိုင်ပွဲ ချန်ပီယံ၊ အာရှဖလား ဒုတိယဆုတို့ကို မြန်မာအသင်းကရရှိခဲ့သည်မှာ အိပ်ရာဝင်ပုံပြင်မဟုတ်။ သမိုင်းစစ်စစ်များဖြစ်သည်။

#NewsWatch #myanmar #football
#soccer #sports