“အာဆာဟာ စကတည်းက သန္ဓေမကောင်းဘူး၊ စစ်တပ်ကျရှုံးလို့ အာဆာကျရှုံးတာဖြစ်တယ်”

Описание: “အာဆာဟာ စကတည်းက သန္ဓေမကောင်းဘူး၊ စစ်တပ်ကျရှုံးလို့ အာဆာကျရှုံးတာဖြစ်တယ်”
-------------
အာရကန်လွတ်မြောက်ရေးတပ် (ARSA) အဖွဲ့ဟာ ရခိုင်ပြည်နယ်မှာဘယ်လိုအစပြုပြီး လှုပ်ရှားနေခဲ့ပါသလဲ။ ဒီအဖွဲ့ရဲ့ ထိပ်တန်းခေါင်းဆောင်ဖြစ်သူ အတာဥလာနဲ့ အဖွဲ့ဝင်တစ်ချို့ကို ဘင်္ဂလားဒေ့ချ်အာဏာပိုင်တွေက လွန်ခဲ့တဲ့ မတ်လ ၁၇ ရက်နေ့မှာ ဖမ်းဆီးလိုက်ပါပြီ။

အောက်တိုဘာ ၁၆ ရက် ၂၀၁၆ ခုနှစ်မှာ ယုံကြည်ရာလှုပ်ရှားမှုလို့ အဓိပ္ပါယ်ရတဲ့ ဟာရက်အယ်ရင် လှုပ်ရှားမှုနာမည်နဲ့ ရိုဟင်ဂျာလက်နက်ကိုင်တစ်ချို့ဟာ ဒုတ်၊ ဓား တွေကိုင်ဆောင်ပြီး မောင်တောမြို့နယ်က နယ်ခြားစောင့်ရဲကင်းသုံးခုကို ဝင်စီးခဲ့ပြီး ရဲကိုးဦးကို သတ်ခဲ့ပါတယ်။ စစ်တပ်က လက်တုံ့ပြန်လို့ ရိုဟင်ဂျာ ကိုးသောင်းကျော် တစ်ဖက်ဘင်္ဂလားဒေ့ချ်ကို ထွက်ပြေးခဲ့ရပါတယ်။

ဒီလှုပ်ရှားမှုကိုဦးဆောင်သူ အတာဥလာနဲ့ ရိုဟင်ဂျာတွေဟာ အာဆာဆိုတဲ့အဖွဲ့ကို ဖွဲ့ပြီး ၂၀၁၇ သြဂုတ်လ ၂၅ ရက်မှာ နယ်ခြားစောင့်ရဲကင်းစခန်းတွေကို တပြိုင်နက်တိုက်ခိုက်ခဲ့ပါတယ်။ အဲဒီနေ့ဟာ ကုလသမဂ္ဂအထွေအတွင်းရေးမှုးချုပ်ဟောင်း ကိုဖီအာနန်ဦးဆောင်တဲ့ နိုင်ငံတကာအချက်အလက်ပြုစုရေးအဖွဲ့က ရခိုင်ပြည်နယ်အရေး၊ ရိုဟင်ဂျာအရေးတို့နဲ့ပတ်သက်ပြီး အစီရင်ခံစာထုတ်ပြန်ဖို့ စီစဥ်ထားတဲ့နေ့ပါ။ ကိုဖီအာနန်အဖွဲ့ကို စစ်တပ်နဲ့ စစ်တပ်ရဲ့ ကျောထောက်နောက်ခံ ကြံ့ခိုင်ဖွံ့ဖြိုးရေးပါတီက ပြင်းပြင်းထန်ထန်ဆန့်ကျင်နေတဲ့အချိန်ပါ။

အာဆာအဖွဲ့က နယ်ခြားစောင့်ရဲကင်းတွေကို တပြိုင်နက်တိုက်ခိုက်တယ်ဆိုပြီး စစ်တပ်ကလက်တုံ့ပြန်တဲ့အနေနဲ့ ရိုဟင်ဂျာရွာတွေကို ဝင်ရောက်စီးနင်းမီးရှို့သတ်ဖြတ်မှုတွေကျူးလွန်ခဲ့ပါတယ်။

ဒါပေမယ့်လည်း အမှန်တကယ်ပဲ အာဆာက ရဲကင်းတွေကိုတိုက်ခိုက်ခဲ့တယ်ဆိုတာ သံသယဖြစ်ဖွယ်ရာတွေနောက်ပိုင်းပေါ်ပေါက်လာခဲ့ပါတယ်။ ဘာ့ကြောင့်လဲဆိုတော့ စစ်တပ်ရဲ့ ၂၀၁၇ သြဂုတ်လ ရခိုင်ပြည်နယ်က စစ်ဆင်ရေးတွေဟာ လပေါင်းများစွာကြိုတင်စီမံနေတာဖြစ်ပြီး ဒါ့အပြင် ၂၀၂၁ စစ်တပ်က အာဏာမသိမ်းခင် ကတည်းက အာဆာနဲ့စစ်တပ် လျှို့ဝှက်လှုပ်ရှားမှုတွေရှိနေခဲ့လို့ပါ။

ရိုဟင်ဂျာတွေအရေးလို့ခံယူထားတဲ့အာဆာဟာလည်း အခုဆိုစစ်တပ်နဲ့ လူသိရှင်ကြားလှုပ်ရှားနေပြီး ရခိုင်ပြည်နယ်မှာ စစ်တပ်က စစ်ရှုံးလို့ အာဆာဟာလည်း ကျရှုံးခန်းရောက်တဲ့အခြေအနေဆိုက်နေပါပြီ။

ဒီအခြေအနေတွေနဲ့ပတ်သက်လို့ ရိုဟင်ဂျာတိုင်းရင်းသားတစ်ဦးဖြစ်ပြီး အမျိုးသားညီညွတ်ရေးအစိုးရ NUG ရဲ့ လူ့အခွင့်အရေးဝန်ကြီးဌာန ဒုဝန်ကြီးဖြစ်တဲ့ ဦးအောင်ကျော်မိုးကို Myanmar Now က ဆက်သွယ်မေးမြန်းထားပါတယ်။