ဂျာမနီမှာဒုတိယကမ္ဘာစစ်လက်ကျန်ဗုံးတစ်လုံးရှာတွေ့လို့ လူသောင်းနဲ့ချီရွှေ့ပြောင်းခဲ့ရ | People's Spring

Описание: ဂျာမနီမှာ ဒုတိယ ကမ္ဘာစစ်လက်ကျန် ဗုံးတစ်လုံး ရှာတွေ့လို့ လူသောင်းနဲ့ချီ ရွှေ့ပြောင်းခဲ့ရ
 
ဒုတိယ ကမ္ဘာစစ်လက်ကျန် ဗုံးတစ်လုံး ရှာတွေ့ခဲ့တာကြောင့် ဂျာမနီက မြို့တစ်မြို့မှာ လူပေါင်း သောင်းနဲ့ချီ အရေးပေါ် ရွှေ့ပြောင်းစေခဲ့ရပါတယ်။
 
၂၅၀ ကီလိုဂရမ်လောက် အလေးချိန်ရှိတဲ့ ဗုံးကြီးဟာ စစ်ကာလတုန်းက မဟာမိတ်တွေ လေကြောင်းကနေ ကြဲချခဲ့ပြီးတဲ့နောက် ဒရက်စ်ဒန် မြို့ထဲမှာ မပေါက်ကွဲဘဲ ကြွင်းကျန်နေခဲ့တာလို့ ယုံကြည်ရပါတယ်။ ၂၀၂၄ ခုနှစ်တုန်းက အယ်လ်ဘီ မြစ်ထဲ ပြိုကျခဲ့တဲ့ ကာရိုလာ တံတားဟောင်း နေရာနားမှာ အဲဒီ ဗုံးကြီးကို ရှာတွေ့ခဲ့တာ ဖြစ်ပါတယ်။
 
အခုသီတင်းပတ်ထဲမှာ ဗုံးတွေ့ခဲ့တဲ့နောက် ဒရက်စ်ဒန် မီးသတ်တပ်ဖွဲ့ဟာ တံတားတဝိုက်မှာ နေထိုင်သူတွေ၊ ကမ္ဘာလှည့် ခရီးသည်တွေ စုစုပေါင်း ၁၈၀၀၀ လောက်ကို အရေးပေါ် ရွှေ့ပြောင်းစေခဲ့သလို အဲဒီနေရာကိုလည်း အသွားအလာ ပိတ်ဆို့ထားလိုက်ပါတယ်။
 
ဒရက်စ်ဒန်ဟာ သမိုင်းဝင် ဘုရားကျောင်းတွေ၊ နန်းတော်တွေ၊ ဇာတ်ရုံတွေ အပါအဝင် ရှေးလက်ရာ အဆောက်အအုံတွေကြောင့် ကမ္ဘာလှည့် ခရီးသွား ဧည့်သည်တွေကြားမှာ လူသိများတဲ့ မြို့တစ်မြို့ ဖြစ်ပါတယ်။
 
အာဏာပိုင်တွေ အနေနဲ့ ဗုံးကို သယ်ယူရွှေ့ပြောင်းမလား၊ နေရာမှာပဲ ထိန်းချုပ်ဖောက်ခွဲမလား ဆိုတာကိုတော့ တိတိကျကျ မသိရသေးပါဘူး။ အရင်ကလည်း ဒရက်စ်ဒန်မှာ စစ်လက်ကျန် လက်နက်ဟောင်းတွေ ရှာတွေ့လို့ ဒေသခံတွေ ရွှေ့ပြောင်းခိုင်းရတာမျိုး ရှိဖူးပေမယ့် အခုတစ်ကြိမ်လောက်တော့ အတိုင်းအတာ ပမာဏ ကြီးမားတာမျိုး မကြုံဖူးပါဘူး။
 
၁၉၄၅ ခုနှစ်မှာ ဗြိတိန်နဲ့ အမေရိကန် လေတပ်တွေဟာ ဒရက်စ်ဒန် မြို့ပေါ်ကို ဗုံးတန်ချိန် ၄၀၀၀ နီးပါးလောက်ထိ ကြဲချခဲ့ဖူးပါတယ်။ အဲဒီ လေကြောင်းတိုက်ခိုက်မှုတွေကြောင့် လူပေါင်း ၂၅၀၀၀ လောက် သေဆုံးပြီး မြို့လယ်ခေါင် တဝိုက်မှာ အကြီးအကျယ် ပျက်စီးခဲ့ပါတယ်။
 
မနှစ်တုန်းကလည်း ကာရိုလာ တံတားနားက ဆောက်လုပ်ရေး လုပ်ငန်းခွင်မှာ စစ်လက်ကျန် ဗုံးဟောင်း လေးလုံးကို ရှာတွေ့ခဲ့ပါတယ်။
 
ဒရက်စ်ဒန်ကို ဗုံးကြဲခြင်းဟာ ဒုတိယ ကမ္ဘာစစ်အတွင်း မဟာမိတ်တပ်တွေ လုပ်ဆောင်ခဲ့တဲ့ အငြင်းပွားစရာ အဖြစ်ဆုံး စစ်ဆင်ရေး တစ်ခုအနေနဲ့လည်း မှတ်တမ်းဝင်ခဲ့ပါတယ်။
 
မြို့ကို အင်အားအလုံးအရင်းနဲ့ ဗုံးကြဲဖို့က စစ်ရေးအရ တကယ်ပဲ လိုအပ်ခဲ့သလား ဆိုတာကို ငြင်းခုံမှုတွေ ရှိနေပြီး အဲဒီတိုက်ခိုက်မှုဟာ စစ်ရာဇဝတ်မှုမြောက်ကြောင်း စွပ်စွဲမှုတွေလည်း ထွက်ပေါ်ခဲ့ဖူးပါတယ်။
 
ကိုးကား: BBC