Magtymguly Pyragy - Gana geldim/Ynsan omri barada/Goshgy/Туркмен гошгы

Описание: Magtymguly Pyragy - Gana geldim/Ynsan omri barada/Goshgy/Туркмен гошгы #turkmengosgy #magtymguly

#ene #kabam #pyragy #walide #magtymguly #turkmengosgy #pyragy #turkmen #turkmendili #ganageldim #nahanageldim

Magtymguly Pyragy "GANA GELDIM"

Ata bilinden düşdüm, ene rehmine geldim,
Kyrk köwn bilen çykyp, bir zerre gana geldim.
Bir mahyýy-bijanam, derýa-ummana geldim,
Dört aý, on dört sagatda dirildim, jana geldim,
Dokuz aý tamam oldy, şonda jahana geldim.

Atam-enem söýdüler, göterdiler gujaga,
Geýimlerim geýdirip, buladylar gundaga,
Gähi emedeklärdim, gäh turardym aýaga,
Ene süýdün emerdim, dönerdim sola-saga,
Iki ýaşa ýetemde, iýmäge nana geldim.

Üç ýaşyma ýetemde, oýnaýyban gülerdim,
Bäş ýaşyma baramda, eneden zat dilärdim,
Ýedi ýaşa ýetemde, dost-duşmanym bilerdim,
Dokuz ýaşa ýetemde, bäş wagt namaz kylardym,
On ýaşyma ýetemde, edep-ekrana geldim.

On ikide her kime gyňralyp söz gatardym,
On üç ýaşa ýetemde, agyr mejlis tutardym,
On bäşime ýetemde, tiri-tüpeň atardym,
On ýedige baramda, yşk söwdasyn göterdim,
Yşkyň söwdasy bilen sürüp, meýdana geldim.

On ýediden geçen soň, şöhrat öýüne girdim,
Aldym bir näzenini, zowk ile sapa sürdüm,
Bu gunçaýy-gülzaryň elwan gülüni tirdim,
Ýigrimiýe ýetende, pelek jebrini gördüm,
Pelek aldy ýarymy, ejel gamhana geldim.

Otuza girdi ömrüm, girdim tir-u kemana,
Köňül hyruç eýledi, boldum däli-diwana,
At münüp, ýarag baglap, sürüp girdim meýdana,
Rüstemi-Destan kimin söweş kyldym merdana,
Kyrka ýetende ömrüm, okyp, Gurhana geldim.

Kyrkdan öter bolanda, gitdim elli ýaşyma,
Geldi ölüm nyşany, rehne girdi dişime,
Her kim garry diýerdi, haýran galdym işime,
Gojaldym, düşgün oldum, gowga geldi başyma,
Ele hasa göterip, dogry mekana geldim.

Altmyşa gitdi ömrüm, görmez oldy gözlerim,
Gojaldym, düşgün oldy, gyşa döndi ýazlarym,
Meniň sözüm etmesler hem ogul, hem gyzlarym,
Äleme hoş gelmedi meniň şirin sözlerim,
Äleme ýalbarmakdan düşdüm, amana geldim.

Ýetmişe bardy ömrüm, aglar idim zary-zar,
Gözümden ýaş giderdi misli ebri-nowbahar,
Gulaklarym gapylyp, gözlerim tutdy gubar,
Daşyma ýygyldylar kowum-gardaş, her ne bar,
Geýimlerim soýuldy, tagty-rowana geldim.

Ýatyr erdim bisterde, nägäh Ezraýyl geldi,
Bilbil dilim baglanyp, gyzyl ýüzlerim soldy,
Ýüz müň jepa-jebr ilen jismimden janym aldy,
Dünýäni puç geçirdim, barça armanym galdy,
Geldi ölüm nyşany, ajal gamhana geldim.

Gassal golun çyzganyp, meýdimi ýuwdular päk,
Agaç ata mündürip, eltdiler ol suýy-häk,
Ezraýylnyň jeňinden ruhum oldy çäk-çäk,
Iki gürzli topuldy, sehmnäk-u gazapnäk,
Ruhum teslim etdiler, dirildim, jana geldim.

Soradylar: «Eý adam, diý, görem, halyň nedir,
Dünýäde haýr etmediň, bu kyl-u kalyň nedir,
Gitdiň şeýtan raýyna, jowap-sowalyň nedir,
Imdi toprak astynda, ylmy-kemalyň nedir»,
Gürzi saldy depämden, çäki-hemana geldim.

Jandan diýdim: «Ýa, Aly!» tapyldy Şahymerdan,
Agaýy-müşgil güşat, ol emiri-möminan,
Magtymguly diýr, janym diýme sen oňa gurban,
Ol Münkeri-Nekirler durmadylar bir zaman,
Şol ýerde Repbim görüp, dogry mekana geldim.