ŻIEDA FIL-FIDUĊJA F’ABELA U L-PL - ŻEWĠ SONDAĠĠI FL-ISTESS JUM

Описание: ONE.COM.MT • Żewġ sondaġġi ppubblikati llum juru żieda fil-fiduċja fil-Prim Ministru Robert Abela u fil-Partit Laburista.

KITBA: TRISCHIA FALZON
FILMAT: ARKIVJI

Żewġ sondaġġi ippubblikati l-Ħadd mill-gazzetti t-Torċa u l-Maltatoday urew żieda fil-fiduċja fil-Prim Ministru Robert Abela u l-Partit Laburista kontra l-Kap tal-Oppożizzjoni Bernard Grech u l-Partit Nazzjonalista.

Id-distakk dwar fiduċja bejn iż-żewġ Mexxejja ivarja minn kważi 21% fit-Torċa għal madwar 15% fil-Maltatoday filwaqt li bejn il-partiti ivarja minn 8.4% fis-sondaġġ tal-Maltatoday għal 10.7% fl-istħarriġ ta’ Dr Vincent Marmarà ippubblikat fit-Torċa.

Dan ifisser distakk ta’ bejn 21,500 vot u 26,500 fiż-żewġ sondaġġi li b’mod komuni jgħidu li l-Partit Laburista u l-Mexxej tiegħu żied il-fiduċja.

Iż-żewġ sondaġġi b’mod identitiku jbassru turnout ta’ kważi 70%, b’persentaġġ mill-elettorat jgħid li mhux se jivvota.

Skont il-Maltatoday, Abela hu fdat minn 38% tal-elettorat kontra t-23.3% li jikseb Grech, differenza ta’ 15%.

Hawn l-istħarriġ jgħid li filwaqt li l-Prim Ministru żied il-fiduċja b’1.2%, Grech naqqas il-fiduċja bi 2.8%.

Is-sondaġġ tal-Maltatoday jgħid li l-Prim Ministru huwa fdat aktar minn Grech fost il-kategoriji kollha tal-età u f’ħames minn sitt reġjuni madwar il-pajjiż kollu.

Skont it-Torċa mbagħad 45% tal-votanti jafdaw lill-Prim Ministru, jiġifieri kważi 21% iżjed mill-Kap tal-Oppożizzjoni.

It-Torċa tgħid li 81% ta’ dawk li vvutaw lill-Partit Laburista fl-aħħar elezzjoni ġenerali għandhom fiduċja fil-Mexxej Laburista għal kontra tal-votanti Nazzjonalisti sentejn ilu, li aktar minn terz minnhom ma jafdawx lil Bernard Grech bħala Kap tal-Partit Nazzjonalista.

Is-sondaġġ tal-Maltatoday sar bejn it-13 u l-21 ta’ Mejju filwaqt li dak tat-Torċa minn Dr Marmarà sar bejn l-20 u l-24 ta’ Mejju b’kampjun ta’ elf persuna.