નડિયાદ : CCTV : કોન્ટ્રાક્ટરને ચપ્પુ બતાવી ધમકી:ચકલાસી નગરપાલિકાના સીસી રોડ ટેન્ડર પાછું ખેંચવા દબાણ

Описание: નડિયાદ: ચકલાસી નગરપાલિકાના સીસી રોડના કામના ટેન્ડર મુદ્દે નડિયાદના એક કોન્ટ્રાક્ટરને ચપ્પુ બતાવી જાનથી મારી નાખવાની ધમકી આપવાનો બનાવ સામે આવ્યો છે. આ મામલે નડિયાદ રૂરલ પોલીસ મથકે ફરિયાદ નોંધવામાં આવી છે.

પ્રાપ્ત માહિતી અનુસાર, નડિયાદ તાલુકાના ડુમરાલ ગામની ગોકુલધામ સોસાયટીમાં રહેતા કોન્ટ્રાક્ટર કાર્તિકભાઈ પંડ્યાએ ચકલાસી નગરપાલિકાના સીસી રોડના વિકાસના કામો માટે દેસાઈ કન્સ્ટ્રક્શન અમદાવાદના નામે ઓનલાઈન ટેન્ડર ભર્યું હતું. આ ટેન્ડર ભર્યાના આશરે પંદરેક દિવસ બાદ ચકલાસી નગરપાલિકાના સભ્ય શૈલેષભાઈ વાઘેલાએ કાર્તિકભાઈને જણાવ્યું હતું કે આ કામ તેમના સગા લક્ષ્મણસિંહ રાઠોડને આપવાનું છે. જોકે, ટેન્ડર ઓનલાઈન ભરાઈ ગયું હોવાથી કાર્તિકભાઈએ તે પાછું ખેંચવાનો ઇનકાર કરતા મામલો ગરમાયો હતો.

ગત 28 ફેબ્રુઆરીના રોજ રાત્રિના આશરે 11 વાગ્યાના સુમારે નડિયાદના સંતોષ પાર્કમાં રહેતો મનોજભાઈ હિમંતસિંહ ઝાલા પોતાની ગાડી લઈને કોન્ટ્રાક્ટર કાર્તિકભાઈના ઘરે પહોંચ્યો હતો. તે સમયે કાર્તિકભાઈ અને તેમનો પરિવાર ઘરે હાજર હતો. આરોપી મનોજ ઝાલાએ ઘર પાસે આવીને હાથમાં ચપ્પુ બતાવી ગાળાગાળી કરી હતી અને ધમકાવવાનું શરૂ કર્યું હતું. તેણે પોતે ચકલાસીનો "દાદા" હોવાનું કહી પોતાના ગુનાહિત ઇતિહાસનો ડર બતાવ્યો હતો.

મનોજ ઝાલાએ કાર્તિકભાઈને ધમકાવતા કહ્યું હતું કે તેને પૂછ્યા વગર ચકલાસી નગરપાલિકામાં ટેન્ડર કેમ ભર્યું છે. તેણે વોર્ડ નંબર 07 ના નગરપાલિકા સભ્ય શૈલેષભાઈ વાઘેલાના સગા લક્ષ્મણસિંહ રાઠોડને જ આ ટેન્ડર આપવાનું હોવાથી બે દિવસમાં ટેન્ડર પાછું ખેંચી લેવા દબાણ કર્યું હતું. જો ટેન્ડર પાછું ખેંચવામાં નહીં આવે તો કોન્ટ્રાક્ટરને જાનથી મારી નાખવાની અને તેની લાશ જ ઘરે આવશે તેવી ગંભીર ધમકી આપી હતી.

આ ઘટના દરમિયાન આરોપીએ ફરિયાદી અને તેમના પરિવાર સામે બિભત્સ ગાળો બોલી આતંક મચાવ્યો હતો. ફરિયાદીની દીકરીની ધોરણ 12 ની બોર્ડની પરીક્ષાઓ ચાલતી હોવાથી આ ઘટનાને કારણે આખો પરિવાર ભારે માનસિક તણાવમાં આવી ગયો હતો. આરોપીના ડર અને ધમકીના પગલે અંતે કાર્તિકભાઈ પંડ્યાએ નડિયાદ રૂરલ પોલીસનો સંપર્ક સાધ્યો હતો. પોલીસે મનોજભાઈ હિમંતસિંહ ઝાલા વિરુદ્ધ ગુનો નોંધી કાયદેસરની કાર્યવાહી હાથ ધરી છે.