Jizzaxda mahallalarni ixtisoslashtirish masalasi ko‘rib chiqildi

Описание: Jizzaxda mahallalarni ixtisoslashtirish masalasi ko‘rib chiqildi

Jizzax viloyati hokimi Ulug‘bek Mustafoyev rahbarligida mahallalarni ixtisoslashtirish masalalariga bag‘ishlangan tanqidiy-tahliliy yig‘ilish o‘tkazildi.

Unda sohadagi ishlar holati, erishilgan natijalar hamda yo‘l qo‘yilgan kamchiliklar atroflicha muhokama qilindi.

Yig‘ilishda, Davlatimiz rahbarining 2025-yil 2 dekabrdagi tashrifi chog‘ida “Jizzax tajribasi” asosida barcha mahallalarni ixtisoslashtirish bo‘yicha tashabbus ilgari surilgan edi.

Shuningdek, 2026-yil 30 yanvardagi 35-sonli qarorda ham bu borada aniq vazifalar belgilab berilgan.

Avvalgi uchrashuvlarda ishlarni tashkil etish, mas’ullarni belgilash, banklar, tashkilotlar va mahallalarning vazifalari yuzasidan topshiriqlar berilganiga qaramasdan, ayrim yo‘nalishlarda ishlar sust kechayotgani qayd etildi.

Xususan, viloyat bo‘yicha 96 ta mahallada 5000 gektar maydonga sertifikatlangan ko‘chat ekish,79 ta hududda 4571 gektar sanoatlashgan plantatsiyalar tashkil etish, 136 ta mahallada 101 ming bosh chorva mollarining naslini yaxshilash vazifalari belgilangan.

Ushbu topshiriqlarni bajarish uchun 267 nafar mas’ul biriktirilib, kunlik monitoring tizimi yo‘lga qo‘yilgan. Ayrim tuman va mahallalarda ishlar yaxshi tashkil etilgan bo‘lsa-da, ko‘plab hududlarda topshiriqlar ijrosi sustligi tanqid qilindi.

Jumladan, ayrim mahallalarda ko‘chat ekish, plantatsiyalar tashkil qilish va chorvachilikni rivojlantirish ishlari umuman boshlanmagan.

Yig‘ilishda hokimlar va mahallalarga biriktirilgan bank xodimlari faoliyati ham keskin tanqid ostiga olindi. Qayd etilganidek, ba’zi mas’ullar biriktirilgan mahallalariga bormagani, amaliy ish tashkil etmagani holatlari aniqlangan.

Belgilangan vazifalar to‘liq bajarilsa 90 ming tonna qishloq xo‘jaligi mahsuloti yetishtirilib, 716 mlrd so‘mlik qo‘shimcha qiymat yaratiladi va chorvachilikni rivojlantirish hisobiga 1,5 trln so‘mlik mahsulot, jumladan 110 ming tonna sut va 14,8 ming tonna go‘sht ishlab chiqarish imkoniyati paydo bo‘ladi.

Yig‘ilishda bugungi global sharoitda oziq-ovqat xavfsizligi masalasi dolzarb ekani alohida ta’kidlanib, har bir rahbar o‘z mas’uliyatini chuqur his qilishi lozimligi qayd etildi.

Shuningdek, sabzavot va polizchilik, sanoat, turizm va xizmat ko‘rsatish yo‘nalishlarida ham ishlar qoniqarli emasligi ko‘rsatib o‘tildi. Ayniqsa, bir qator mahallalarda mikroloyihalar umuman amalga oshirilmagani aytib o‘tildi.

Yig‘ilish yakunida mutasaddilarga aniq topshiriqlar berildi. Jumladan mahallalarda amaliy ishlarni kuchaytirish, sertifikatlangan ko‘chatlar savdo nuqtalarini tashkil etish, loyihalarni shakllantirish va moliyalashtirishni jadallashtirish va banklar va mas’ullarning joylardagi ishtirokini ta’minlash vazifalari yuklatildi.