Kaffirun surasi | Каффирун сураси (Манолар таржимаси)

Описание: «Саҳиҳ Муслим»да келган Жобир розияллоҳу анҳудан қилинган ривоятда айтилишича, Расулуллоҳ соллаллоҳу алайҳи васаллам бу сура ва «Қул ҳуваллоҳу аҳад…»ни икки ракатли тавоф намозида ўқирдилар.

Яна Имом Муслимнинг Абу Ҳурайра розияллоҳу анҳудан қилган ривоятларида келтирилишича, Расулуллоҳ соллаллоҳу алайҳи васаллам Кафирун ва Ихлос сураларини бомдоднинг икки ракатида ўқир эдилар. Бу ҳадисни Имом Аҳмад, Термизий, Насаий ва Ибн Можалар ҳам Ибн Умар розияллоҳу анҳудан ривоят қилишган.
Залзала сурасида келганидек, Имом Термизий Ибн Аббос розияллоҳу анҳудан қилган ривоятларида «Албатта, бу ва Залзала сураси Қуръоннинг тўртдан бирига тўғри келади», дейилган.

Абулқосим Табароний Зайд ибн Ҳорисанинг инилари Жабала ибн Ҳорисадан қилган ривоятларида айтилишича, Расулуллоҳ соллаллоҳу алайҳи васаллам: «Агар тўшагингга ётсанг, «Қул йа айюҳал кафирун»ни охиригача ўқи, чунки у ширкдан сақловчидир», деганлар. Имом Аҳмад ҳам Ҳорис ибн Жабаладан худди шу каби ҳадис ривоят қилдилар.
Хулоса шуки, Расулуллоҳ соллаллоҳу алайҳи васаллам Кафирун ва Ихлос сураларини икки ракатли тавофда, бомдоднинг икки ракатида, шомдан кейинги икки ракатда ҳамда витрда Аъло сурасидан сўнг ўқиганлари собит бўлган.