Transforming Trivandrum’s connectivity with cutting-edge roads! TVM SmartCity road | ULCCS Ltd.

Описание: കേരളത്തിലെ സ്മാർട്ട് റോഡുകൾ ഉൾപ്പെടെ 60-ൽപ്പരം റോഡുകൾ മുഖ്യമന്ത്രി ഇന്നു നാടിനു സമർപ്പിക്കുമ്പോൾ അതിൽ ഭാഗമാകാനും സംഭാവന നല്കാനും കഴിഞ്ഞതിലെ അനല്പമായ സന്തോഷം ഊരാളുങ്കൽ സൊസൈറ്റിയും പങ്കുവയ്ക്കുന്നു. തിരുവനന്തപുരത്ത് ഇന്നു നാടിനു സമർപ്പിക്കുന്ന തലസ്ഥാനറോഡുകളിൽ ഏറ്റവും വലുതും പ്രധാനപ്പെട്ടതുമായ സി. വി. രാമൻ പിള്ള റോഡ് സ്മാർട്ടാക്കി നിർമ്മിച്ചത് സൊസൈറ്റിയാണ്. ഇത് രാജ്യത്തെ ഏറ്റവും നീളമുള്ള സ്മാർട്ട് റോഡാണ്. നീളം 3.275 കിലോമീറ്റർ. ഈ റെക്കോഡ് ഇതുവരെ ആന്ധ്രപ്രദേശിലെ വിജയവാഡയിലെ മൂന്നു കിലോമീറ്റ ദൈഘ്യമുള്ള ‘ഗോൾഡൻ മൈൽ’ എന്ന റോഡിനായിരുന്നു.
നിർമ്മാണമികവിന്റെ പേരിൽ മാദ്ധ്യമങ്ങളും സമൂഹമാദ്ധ്യമങ്ങളും ഏറെ പ്രശംസ ചൊരിഞ്ഞ ഈ റോഡ് വെള്ളയമ്പലം മുതൽ ചെന്തിട്ട വരെയാണ്. വികസിതലോകത്തെ റോഡുകളുടെ നിലവാരത്തിൽ നാലുവരിപ്പാതയും സൈക്കിൾ പാത്തുമുള്ള റോഡിന് ഇരുപുറവും വീതിയേറിയതും കാഴ്ചാപരിമിതർക്കു സഹായകമായ ടോക് ടൈലുകൾ പാകിയതും കൈവരി പിടിപ്പിച്ചതുമായ ഫൂട് പാത്തും നിർമ്മിച്ചിട്ടുണ്ട്. റോഡിനു നടുവിൽ മീഡിയനും എതിരെ വരുന്ന വാഹനത്തിന്റെ ലൈറ്റു തടയാൻ മീഡിയനിലുടനീളം ആന്റി ഗ്ലെയർ ബാരിയറും അപകടം ഒഴിവാക്കാൻ മീഡിയന്റെ അരികുകളിൽ മീഡിയൻ മാർക്കറും ഡെലിയെനേറ്ററുകളും എല്ലാമുണ്ട്. ആൽത്തറ മുതൽ ഭാരത് ഭവൻ മണ്ണരങ്ങുവരെ 1.7 കിലോമീറ്ററിലാണ് സൈക്കിൾ ട്രാക്. നടുവിലും ഇരുവശങ്ങളിലുമുള്ള വൈദ്യുതവിളക്കുകൾ രാത്രിയിലും റോഡിനെ പ്രകാശപൂരിതമാക്കും.
ഇരുവശത്തെയും മരങ്ങൾ സംരക്ഷിക്കാൻ കെട്ടിയ തറ കാൽനടയാത്രികർക്കു വിശ്രമിക്കാവുന്ന ഇരിപ്പിടങ്ങൾ ആകുന്നതോടൊപ്പം ഭംഗിയും പകരുന്നു. അഭംഗിയായി നിന്ന വൈദ്യുതിലൈനുകളും പലതരം കേബിളുകളുമെല്ലാം മണ്ണിനടിയിലൂടെയാക്കി. കുടിവെള്ളം, ഡ്രെയിനേജ് എന്നിവയ്ക്കൊപ്പം ഇവയും ഡക്റ്റുകളിലൂടെ ആക്കി. കണക്‌ഷനുകൾ എടുക്കുന്നതുൾപ്പെടെ ഒരു കാര്യത്തിനും ഇനി ഈ റോഡ് വെട്ടിപ്പൊളിക്കേണ്ടിവരില്ല. മേട്ടുക്കട മുതൽ തൈക്കാട് ആശുപത്രിവരെ റോഡിനു വീതി കൂട്ടുകയും ചെയ്തു. തിരുവനന്തപുരം നഗരത്തിന്റെ പുതിയ വിവരങ്ങളും പരിപാടികളൂം ജനങ്ങൾക്ക് അറിയാൻ നാലിടത്ത് വി‌എം‌എസ് ഡിസ്പ്ലേകളും സ്ഥാപിക്കുന്നുണ്ട്.
നഗരത്തിലെ സാംസ്ക്കാരികയിടനാഴി എന്നു വിശേഷിപ്പിക്കാവുന്ന റോഡാണിത്. മാനവീയം വീഥി, ടഗോർ തീയറ്റർ, ഭാരത് ഭവനും അതിന്റെ മണ്ണരങ്ങും, ഗവ. വിമൻസ് കോളെജ്, അതിന്റെ ഓഡിറ്റോറിയം, ഗവ. ഗസ്റ്റ് ഹൗസ്, ഗവ. റെസ്റ്റ് ഹൗസ്, ട്രിവാൻഡ്രം ക്ലബ്ബ്, ശ്രീമൂലം ക്ലബ്ബ്, പൊലീസ് ഗ്രൗണ്ട്, വനം വകുപ്പിന്റെയും നോർക്കയുടെയും ആസ്ഥാനങ്ങൾ, പൊലീസ് കമ്മിഷണറേറ്റ്, പൊലീസ് ട്രയിനിങ് കോളെജ്, ഹോട്ടൽ ഹയാത്ത്, സ്ത്രീകളുടെയും കുട്ടികളുടെയും ആശുപത്രി എന്നിവയെല്ലാം ഈ റോഡിന്റെ വശങ്ങളിലാണ്.
തിരുവനന്തപുരം കോർപ്പറേഷന്റെ സ്മാർട് സിറ്റി പദ്ധതിയുടെ ഫണ്ട് ഉപയോഗിച്ച് കേരള റോഡ് ഫണ്ട് ബോർഡിന്റെ മേൽനോട്ടത്തിൽ കെ-റെയിൽ കൺസൾട്ടൻസിയുടെ സഹകരണത്തോടെ റോഡ് പൂർത്തിയാക്കിയത് 77.82 കോടി രൂപ വിനിയോഗിച്ചാണ്. ഈ നിർമ്മാണത്തിൽ സഹകരിച്ച എല്ലാവരെയും നന്ദിപൂർവ്വം സ്മരിക്കുന്നു.
#ulccsltd #smartcity #road #construction #exellence #trivandrum #engineering