മർകസ് യുനാനി മെഡിക്കൽ കോളേജിന് എയ്ഡഡ് പദവി; കുരു പൊട്ടിയൊലിച്ച് ഏഷ്യാനെറ്റ്‌ ഷാജഹാൻ | Unani College

Описание: ഇനിമുതൽ മർകസ് യുനാനി മെഡിക്കൽ കോളേജിലെ അധ്യാപകർക്ക് സർക്കാർ ശമ്പളം നൽകേണ്ടി വരില്ലേ എന്നാണ് ഒരു കൂട്ടരുടെ ആധി. അർഹത ഇല്ലാത്ത ആളുകളെ സ്ഥിരപ്പെടുത്തേണ്ടി വരും എന്നുമുണ്ട് അവരുടെ പരിഭവം. അർഹതയുടെ സർട്ടിഫിക്കറ്റ് വിതരണം ചെയ്യുന്നത് എവിടെ നിന്നാണാവോ.
2015 ലാണ് മർകസ് യുനാനി മെഡിക്കൽ കോളേജ് ആരംഭിക്കുന്നത്. അഞ്ച് ബാച്ചുകൾ പഠനം പൂർത്തിയാക്കി പുറത്തിറങ്ങി. അവിടെ പഠിച്ചിറങ്ങിയ 262 യുനാനി ഡോക്ടർമാർ ഇപ്പോൾ സേവന രംഗത്തുണ്ട്. അവർ പലയിടങ്ങളിലായി ചികിൽസിക്കുന്നുണ്ട്. അർഹതയുള്ളവർ പഠിപ്പിച്ചു തന്നെയാണ് അവരെ പുറത്തേക്ക് വിട്ടത്.
Neet യോഗ്യത നേടിയ 60 വിദ്യാർത്ഥികൾക്കാണ് ഒരു വർഷം യുനാനി മെഡിക്കൽ കോളേജിൽ പ്രവേശനം നൽകുന്നത്. National Council for Indian system of medicine (NCISM) ന്റെ അംഗീകാരമുള്ള സ്ഥാപനമാണിത്. കേരള ആരോഗ്യ സർവകലാശാലയുടെ അംഗീകാരവുമുണ്ട്.
മർകസ് യുനാനി മെഡിക്കൽ കോളേജിലെ അധ്യാപകർക്ക് സർക്കാർ സ്കെയിൽ ശമ്പളം ലഭിക്കുന്നതിൽ എന്തിനാണ് വേവലാതി. രാജ്യത്തെ നിയമവ്യവസ്ഥക്ക് കീഴിൽ, കേന്ദ്ര, സംസ്ഥാന സർക്കാരുകളുടെ എല്ലാ മാനദണ്ഡങ്ങളും പാലിച്ചു കൊണ്ട് പ്രവർത്തിക്കുന്ന ഒരു സ്ഥാപനത്തിന് അതും കേരളത്തിലെ ഒരേയൊരു യുനാനി മെഡിക്കൽ കോളേജിന് എയ്ഡഡ് പദവി ലഭിക്കുന്നത് അർഹത ഉണ്ടായിട്ടു തന്നെയാണ്.
തിരഞ്ഞെടുപ്പിൽ കാന്തപുരം വിഭാഗത്തെ ഒപ്പം നിർത്താൻ വേണ്ടിയാണ് എന്ന് തലക്കെട്ട് എഴുതുന്നവർ അർഹത ഇല്ലാത്ത ഏതോ സ്ഥാപനത്തിന് തിരഞ്ഞെടുപ്പ് മുന്നിൽ കണ്ട് എയ്ഡഡ് പദവി നൽകി എന്ന് കൂടിയാണ് പറയാതെ പറയുന്നത്. പാരമ്പര്യ ചികിത്സാ മേഖലയെ പ്രോത്സാഹിപ്പിക്കുന്ന സർക്കാർ നിലപാടിന്റെ ഭാഗമായാണ് ഈ പദവി കിട്ടിയിരിക്കുന്നത്. അത് കിട്ടാനുള്ള എല്ലാ അർഹതയും മർകസ് യുനാനി മെഡിക്കൽ കോളേജിനുണ്ട്.
എയ്ഡഡ് സ്ഥാപനങ്ങളിലെ അധ്യാപകർക്ക് സർക്കാർ ശമ്പളം നൽകുന്നതിലെ 'നൈതികത' ആണ് വിമർശകരുടെ പ്രശ്നമെങ്കിൽ അത് മർകസിലേക്ക് മാത്രം ബാധകമാകില്ലല്ലോ. അതിനുള്ള പരിഹാരം ഉസ്താദിന്റെ കേരള യാത്രയിൽ നേതൃത്വം അവതരിപ്പിച്ചിട്ടുണ്ട്: എയ്ഡഡ് സ്ഥാപനങ്ങളിലെ നിയമനം പി എസ് സിക്ക് വിടണം എന്നതാണ് കേരള യാത്ര മുന്നോട്ടുവെച്ച പ്രമേയം. എല്ലാ സമുദായ സംഘടനകളും ആ ആവശ്യം ഉയർത്തട്ടെ. അതല്ലേ ശരിയായ രീതി. അല്ലാതെ മർകസ് യുനാനി മെഡിക്കൽ കോളേജിന് എയ്ഡഡ് പദവി കിട്ടുമ്പോൾ മാത്രം സർക്കാർ ശമ്പളത്തിന്റെ പേരിൽ വേവലാതിപ്പെടുന്നവരുടെ ശരിയായ പ്രശ്നം വേറെയാണ്.
©മുഹമ്മദലി കിനാലൂർ