ກອງປະຊຸມສະຫລຸບ ຜົນດໍາເນີນທຸລະກິດ ປະຈໍາໄຕມາດທີ II

Описание: ກອງປະຊຸມສະຫລຸບ ຜົນດໍາເນີນທຸລະກິດ ປະຈໍາໄຕມາດທີ II ແລະ ການວາງທິດທາງແຜນການດໍາເນີນທຸລະກິດ ປະຈໍາໄຕມາດທີ III ປີ 2022 ຂອງ ທະນາຄານ ພັດທະນາລາວ
ໃນວັນທີ 06 ກໍລະກົດ 2022 ທະນາຄານ ພັດທະນາລາວ (ທພລ) ໄດ້ເປີດກອງປະຊຸມ ສະຫຼຸບຜົນການດໍາເນີນທຸລະກິດ ປະຈໍາໄຕມາດທີ II ແລະ ການວາງທິດທາງແຜນດໍາເນີນທຸລະກິດ ໄຕມາດທີ III ປີ 2022 ທີ່ ໂຮງແຮມຈໍາປາສັກ ແກຣນ, ນະຄອນປາກເຊ ພາຍໃຕ້ການເປັນປະທານຮ່ວມ ຂອງທ່ານ ສິດທິສອນ ເທບພາສີ ປະທານສະພາບໍລິຫານ ທະນາຄານ ພັດທະນາລາວ ແລະ ທ່ານ ຈັນທະໜອມ ພົມມະນີ ປະທານຄະນະຜູ້ບໍລິຫານງານ ທະນາຄານພັດທະນາລາວ ໂດຍມີ ບັນດາຄະນະອຳນວຍການ, ຄະນະທີ່ປຶກສາ, ຄະນະພະແນກ, ຄະນະສາຂາພາກ, ສາຂານ້ອຍ ແລະ ບັນດາພະນັກງານ ຂອງ ທະນາຄານ ພັດທະນາລາວ ທົ່ວລະບົບ ເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ ທະນາຄານ ພັດທະນາລາວ ໄດ້ມີການປັບປຸງ ແລະ ປະກາດໂຄງຮ່າງການຈັດຕັ້ງ ຂັ້ນຄະນະຜູ້ບໍລິຫານລະດັບສູງ ເຊັ່ນ: ສະພາບໍລິຫານ, ຄະນະ ຜອ ຝ່າຍ ແລະ ຄະນະຝ່າຍ. ພ້ອມດຽວກັນນັ້ນ ກໍ່ໄດ້ປະເມີນ ແລະ ຕີລາຄາຄືນ ການຈັດຕັ້ງຜັນຂະຫຍາຍ ແຜນການດໍາເນີນທຸລະກິດຂອງ ທພລ ປະຈໍາໄຕມາດທີ II ໂດຍໄດ້ຍົກໃຫ້ເຫັນຜົນງານອັນສໍາຄັນ ທີ່ຊັດເຈນ ແລະ ເຫັນໄດ້ເຖິງບັນຫາ ເພື່ອນໍາໄປປັບປຸງແກ້ໄຂ ແລະ ຖອດຖອນບົດຮຽນ ລະຫວ່າງຄະນະຜູ້ບໍລິຫານ ຮ່ວມກັບ ຄະນະຝ່າຍ ຄະນະສາຂາພາກ ແລະ ສາຂານ້ອຍ ເພື່ອກຳນົດແຜນດຳເນີນທຸລະກິດ ສໍາລັບໄຕມາດ ທີ III ຢ່າງມີປະສິດທິຜົນ ແລະ ສາມາດບັນລຸໄດ້ ຕາມເປົ້າຫມາຍທີ່ກໍານົດ. ທັງນີ້ ກໍ່ເພື່ອສ້າງໃຫ້ອົງກອນ ທພລ ກາຍເປັນທະນາຄານທີ່ເຂັ້ມແຂງ ຢູ່ໃນແຖວຫນ້າ ແລະ ສ້າງຜົນກຳໄລເພີ່ມຂື້ນ ເປັນກ້າວໆ.
ນອກຈາກນັ້ນ ພາຍໃນກອງປະຊຸມ ກໍ່ຍັງໄດ້ປະກາດ ແລະ ແຈ້ງຜົນປະກອບການທຸລະກິດ ປະຈໍາໄຕມາດທີ II ປະຈໍາປີ 2022, ເຊິ່ງ ທະນາຄານ ພັດທະນາລາວ ສາມາດບັນລຸ ຜົນກໍາໄລໃນໄຕມາດນີ້ ໄດ້ເຖິງ 200,12 ຕື້ກີບ ແລະ ຈະໄດ້ມີການມອບພັນທະອາກອນກໍາໄລ 06 ເດືອນຕົ້ນປີ 2022 ໃຫ້ແກ່ລັດຖະບານ ເປັນຈໍານວນທັງຫມົດ 27 ກວ່າຕື້ກີບ.
ເພື່ອບັນລຸເປົ້າໝາຍທີ່ວາງໄວ້, ທພລ ໄດ້ໃຫ້ຄວາມສໍາຄັນໃນການຍົກສູງ ຄວາມຮູ້ຄວາມສາມາດຂອງພະນັກງານ ໂດຍການຝຶກອົບຮົມ ໃຫ້ຄວາມຮູ້ກ່ຽວກັບ ການພັດທະນາຂີດຄວາມສາມາດ ເພື່ອເພີ່ມທັກສະໃນການໃຫ້ບໍລິການທີ່ເປັນເລີດ ເປັນຕົ້ນແມ່ນ ແບບແຜນວິທີການໃຫ້ບໍລິການ, ໄຫວພິບໃນການເຈລະຈາຕໍ່ລອງ ເພື່ອໃຫ້ເກີດຄວາມເຊື່ອໝັ້ນ ລະຫວ່າງລູກຄ້າ ແລະ ທະນາຄານພັດທະນາລາວ. ຄຽງຄູ່ກັນນັ້ນ ກໍ່ໄດ້ມີການພັດທະນາ ດ້ານເຕັກໂນໂລຊີຂໍ້ມູນຂ່າວສານ (IT) ໂດຍການປັບປຸງ ລະບົບ Application Mobile Banking ເປັນຕົ້ນ: LDB Trust ແລະ LDB BIZ ໃຫ້ມີຄວາມທັນສະໄໝ, ສະດວກ, ວ່ອງໄວ, ປອດໄພ ເຂົ້າກັບວິຖີຊີວິດ ຂອງຄົນລາວໃນປັດຈຸບັນ ກໍ່ຄືໃນອະນາຄົດ ແລະ ໃຫ້ທັນກັບການປ່ຽນຜ່ານສູ່ຍຸກ Digital, ຕອບສະຫນອງຄຸນນະພາບ ທາງດ້ານການບໍລິການ ທາງການເງິນ ຢ່າງເປັນລະບົບ ແລະ ເປັນມາດຕະຖານ ໃຫ້ແກ່ລູກຄ້າ ທພລ ກໍ່ຄືສັງຄົມໂດຍລວມ ຕາມຄໍາຂວັນທີ່ວ່າ “ມິດທີ່ດີ ຢູ່ຄຽງຂ້າງທ່ານ ການຮ່ວມທຶນແບບຍືນຍົງ”.
#ທະນາຄານພັດທະນາລາວ
#LDBBank
#ມິດທີ່ດີຢູ່ຄຽງຂ້າງທ່ານ_ການຮ່ວມທຶນແບບຍືນຍົງ
--------------------------
ສອບຖາມຂໍ້ມູນເພີ່ມຕື່ມ:
☎️ Call Center: 1698
🌐 www.ldblao.la