قصيدة رائعة ومؤثرة وأداء أكثر من رائع

Описание: #قصيدة_جميلة #كلمات_الشاعرة_ماجدة_الشارف #قصيدة #مؤثرة #متابعة #أناشيد_هادفة #اكسبلور #لايك #الشعر_الملحون #المنشد_الطاهر_بركات #تيك_توك #أداء_المنشد_الطاهر_بركات #اناشيد #بوسعادة_المسيلة__الجلفة_الاغواط #تونس #المغرب #الجزائر
القصيدة لماجدة الشارف حفظها الله :
___________________

ما سلتك عن عاهدك من كان متين ..
ورشّــــاتو ليــــام بعــــدن وفّــــــاها

حيطك ظالــم شڨني ضربة سكــين ..
ها يســمع لخــبار منــــي وشــــراها

حيطك والف ذالفراڨ وعشــى شين ..
وعدنا نعت اغراب من البعد نســاها

ظني كُثر الشوق خلى الحيط حزين ..
مــاهــــو بالحيــــين ولى بمــــوتــاها

بعد الجملة واه عُــــدنا مفروڨــــين ..
ولى العهــــــدة فاللحــــود قبــــرناها

يا ذالدار الخالية ما صُــبت منيــــن ..
عينــــيا شــــوق المــــراسم رشّاها

وڨلبي من فــــــراڨ لحباب الزينين ..
فَــرْڨ حيوطــــك ياالدار وخــــلاّها

عشى ضيف غريب وسط حيوط أخرين ..
ويامسمط حالو الــفُرڨة مڨســــاها

ماهو بيك آدارنا والوقت الزيــــن
ماهو باللي عاشر اللحد خطــــــاها

ماهو باللي كان بيهم مجموليــــن ..
كل لاخر ڨفى على الدار انـــــساها

بيه يولــــي والمراســــم خاليــــين ..
ويبقى يبكي على المراسم وهواها

يتفكر لحباب مــــن كانــو حيــــين ..
فالدنيا وفي لاخرة ڨــاع ســــواها

يامن لاتراه بعــــد الفرڨــــة عيــــن ..
أڨسى ماللــــي فارڨــــت كفــــنّاها

نڨول نحدث فالحيوط اللي صمين ..
وفي جوفي نار شوقــك مــــڨداها

نتفكر صُغري وغطا كــــان حنــــين ..
اغطا جمــلة غابــــت توحشــــناها

ونتفكــــــر خاوتــــي والوالــــدين ..
وبعد شتاتي وين ضــــــــرك نلڨاها

تصويرة فيها حبابي مرســــومين ..
منقوشة في خاطري ما ينســــاها

ليت يوليلي صغري نا فالحــــــين ..
ونودع من غاب العــز معــــــــاها

ونڨوللها في غيابك كُبري شــــين ..
هاويــن دعاويــــك ڨُولــــي ورّاها

ديريني وسط الحجر يا ضي العين ..
وخليني ننسى همومي معتــــــاها

وضُميني وسط الصدر دفيني زين ..
برد غيابك في عضــــايا رشـّـــاها

اما يا مفتاح بابي غبتــــي ويــــن ..
بعدك غاب الحب ذالدار جفــــــاها

ونحدث من كان ظهري بيه متين ..
وسيسانــي بيــــه كانت مقــــواها

يا نعاري كنعــــودوا مظلومــــين
يازهايــــي كالفرحــــة ننســــــاها

ماللي رحتوا صد عزي يا زينــــين ..
والدنــــــيا مـُـــرّة ومانسحــــلاها

ابقاو على خير يا عز من العيــــن ..
نرجع لعيــــالي وداري نصــــــفاها

ماطڨت لشواق فــــيا مشرْكيــــن ..
المرسم وأحباب صُغر عشــــرناها

وابقى في لمان ياذا الوكر الزيــن ..
مابياش القــــــش لڨلــــوب ملاها

بيا شوق مهلّك الڨلــب والعــــين ..
رشّاني هَــــدْ الفريســــة عــــيّاها

يجددلو عاهــــد مخلــــيه سنيــن ..
وحكايات الصغر يسمع مبــــداها

وتڨول عيوني تهذري بسكاكيــــن ..
والڨلــــب يتوجــــع ويتــــرجاها

حني عاللي راه دخلاني مسكين ..
طير مڨصب ضايڨ عليــه هواها

بين ضلوعي ياك الهــــربة لا وين ..
يلقــاها مَــــرّة ومَــــرّة يهــــداها

ديري فيا ماهوالك يا ذالعــــــين ..
الشوق اللي داخلي حَــــرّك ماها.

ــــــــــــــــــــــــــــــــــــــــ
عن ديوان اعلام واشعار الشارف