နောင်ချိုမှာ TNLA နဲ့ ပူးပေါင်းတပ်တိုက်ခိုက်မှုကြောင့် စစ်ကောင်စီတပ် ဆုတ်ခွာရ | People's Spring

Описание: နောင်ချိုမှာ TNLA နဲ့ ပူးပေါင်းတပ်တိုက်ခိုက်မှုကြောင့် စစ်ကောင်စီတပ် ဆုတ်ခွာရ

ဇွန်-၉၊ ၂၀၂၅ / People's Spring

ရှမ်းပြည်နယ်မြောက်ပိုင်း၊ နောင်ချိုမြို့အနီးက ကံကြီးကျေးရွာကိုရောက်လာတဲ့ စစ်ကောင်စီတပ်ဟာ တအာင်းတပ်မတော်(TNLA)ပူးပေါင်းတပ်တွေရဲ့ တိုက်ခိုက်မှုကြောင့် ပြန်လည်ဆုတ်ခွာသွားရတယ်လို့ နောင်ချိုမြို့ခံတွေက ပြောပါတယ်။

ကံကြီးရွာကနေ သုံး မိုင်နီးပါးဝေးတဲ့ ရွှေမုဋ္ဌောကျေးရွာဆီ တပ်ပြန်ဆုတ်သွားတယ်လို့ ဒေသခံတွေက အသိပေးပါတယ်။

ကံကြီးရွာနဲ့ ရွှေမုဋ္ဌောကျေးရွာတွေဟာ နောင်ချိုကနေ တောင်းခမ်းရွာသွားတဲ့ လမ်းပိုင်းပေါ်မှာ ရှိနေတာပါ။

TNLA နဲ့ တော်လှန်ရေးပူးပေါင်းတွေရဲ့ တိုက်ခိုက်မှုကြောင့် စစ်ကောင်စီတပ်ဟာ ဇွန်လ ၇ရက်ညပိုင်းမှာ ပြန်ဆုတ်သွားတယ်လို့ နောင်ချိုဒေသခံတစ်ဦးကလည်း People’s Spring ကို ပြောပါတယ်။

စစ်ကောင်စီတပ်ဟာ ဇွန်လ ၇ရက်မှာပဲ ကံကြီးရွာကို သိမ်းပိုက်ခဲ့ပြီး ညပိုင်းမှာ တပ်ပြန်ဆုတ်သွားရတဲ့ အခြေအနေဖြစ်ပါတယ်။ စစ်ရေး အခြေအနေနဲ့ပတ်သက်လို့ TNLAဆီ ဆက်သွယ်မေးမြန်းနေဆဲဖြစ်ပါတယ်။

နောင်ချိုမြို့နဲ့ ရှစ်မိုင်ခန့် ပဲကွာတဲ့ ကံကြီးရွာ ဆီ စစ်ကောင်စီတပ် ရောက်လာချိန်မှာ တော့မြို့နဲ့တဖြည်းဖြည်းနီးကပ်လာတာရယ်၊ စစ်တပ်က ကံကြီးရွာနားကနေ လက်နက်ကြီးတွေနဲ့ လှမ်းပစ်နေတာကြောင့် နောင်ချိုမြို့ခံတွေဟာ ဇွန်လဆန်းစပြီး နီးစပ်ရာမြို့ရွာတွေဆီကို ထွက်ပြေးတိမ်းရှောင်ခဲ့ရပါတယ်။

ဇွန်လ ၆ရက် ညမှာ စစ်ကောင်စီတပ်က ကံကြီးရွာနားကနေ လက်နက်ကြီးတွေနဲ့ နောင်ချိုမြို့ ပေါ်ကို လှမ်းပစ်ရာ ၁၀လုံးကျရောက်ပေါက်ကွဲခဲ့တယ်လို့ နောင်ချိုဒေသခံတွေက ပြောပါတယ်။

နောက်နေ့ ဇွန်လ ၇ရက်ညပိုင်းမှာလည်း နောင်ချိုမြို့ပေါ်ကို လက်နက်ကြီးနှစ်လုံး ပစ်ခတ်ခဲ့သေးတယ်လို့ နောင်ချိုမြို့ခံက ပြောပါတယ်။

၁၀၂၇ စစ်ဆင်ရေးအပိုင်း(၂) စတင်ခဲ့တဲ့ ၂၀၂၄ ဇွန်လ ၂၅ရက်မှာပဲ တအာင်းတပ်မတော်(TNLA)နဲ့ PDFပူးပေါင်းတပ်တွေက နောင်ချိုမြို့ကို စတင်သိမ်းပိုက်ခဲ့ပါတယ်။

ဒါပေမယ့် မြို့ရဲ့ တောင်ဘက်က အမြောက်တပ်ရင်းတွေရှိနေတဲ့ တောင်းခမ်းရွာကို တစ်နှစ်ကြာထိုးစစ်ဆင်တိုက်ခိုက်ခဲ့ပေမယ့် အပြီးသတ်မသိမ်းပိုက်နိုင်ခဲ့ပါဘူး။

စစ်ကောင်စီတပ်ဟာ တောင်ခမ်းဒေသနဲ့ နောင်ချိုကို ပြန်လည်စိုးမိုးနိုင်ဖို့ ၂၀၂၄ နှစ်ကုန်ပိုင်းလောက်ကစပြီး အင်အားအလုံးအရင်းတိုးသလို တိုက်ခိုက်နေတဲ့ တပ်တွေကို ချိန်းပြီး ထိုးဆင်မှုတွေ စတင်လုပ်လာပါတယ်။

ပြီးခဲ့တဲ့ မတ်လအတွင်းမှာ စစ်ကောင်စီတပ်ဟာ တောင်းခမ်းရွာနားက မဲပုတ်ရွာကို စတင်သိမ်းပိုက်ခဲ့ပါတယ်။ အဲဒီကနေ တဖြည်းဖြည်း နောင်လင်ရွာကို ထပ်မံသိမ်းပိုက်ပြီးနောက် နောင်ချိုမြို့နားက ကံကြီးရွာအထိ ရောက်လာခဲ့တာပဲဖြစ်ပါတယ်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring