ထောက်ခံသံရော ကန့်ကွက်ရှုတ်ချမှုကိုပါကြုံရတဲ့ ထရမ့် ရဲ့မိန့်ခွန်း | People's Spring

Описание: ထောက်ခံသံရော ကန့်ကွက်ရှုတ်ချမှုကိုပါကြုံရတဲ့ ထရမ့် ရဲ့မိန့်ခွန်း

အမေရိကန် သမ္မတ ဒေါ်နယ်လ်ထရမ့်ရဲ့ နိုင်ငံတော် အခြေပြ မိန့်ခွန်းဟာ ထောက်ခံတဲ့ ဩဘာသံတွေရော၊ ရှုတ်ချတဲ့ ဝေဖန်သံတွေနဲ့ပါ ကြုံခဲ့ရပါတယ်။

ထရမ့်ရဲ့ မိန့်ခွန်းကို အာဏာရ ရီပတ်ဘလစ်ကန် ပါတီ အမတ်တွေက သောင်းသောင်းဖြဖြ လက်ခုပ်တီး ကြိုဆိုခဲ့သလို ဒီမိုကရက်တစ် ပါတီဝင် အမတ်နှစ်ဦးဖြစ်တဲ့ အီလ်ဟန် အိုမာနဲ့ ရာရှီဒါ တလိဘ်တို့ကတော့ ဆန့်ကျင်ခဲ့ကြတာပါ။

ဖေဖော်ဝါရီ ၂၄ ရက်နေ့တုန်းက ထရမ့်က အမေရိကန် အစိုးရရဲ့ ဦးစားပေး တာဝန်ဟာ အမေရိကန် နိုင်ငံသားတွေကို ကာကွယ်ဖို့သာဖြစ်ပြီး တရားမဝင် ရွှေ့ပြောင်း အခြေချသူတွေကို စောင့်ရှောက်စရာ မလိုကြောင်း ပြောကြားခဲ့ပြီး သူ့စကားကို ထောက်ခံသူတွေ မတ်တပ်ထဖို့ ပြောခဲ့ပါတယ်။

အဲဒီအခါ ရီပတ်ဘလစ်ကန်တွေက မတ်တပ်ရပ်ပြီး လက်ခုပ်ဩဘာ ပေးခဲ့ပေမယ့် ဒီမိုကရက်တစ် ပါတီဝင်တွေကတော့ ထိုင်ရာက မထဘဲ ဆန့်ကျင်ကြောင်း ပြသခဲ့ပါတယ်။

အဲဒီနောက် ထရမ့်က မတ်တပ် မထခဲ့တဲ့ ဒီမိုကရက်တစ် ပါတီဝင်တွေကို မရှက်ဘူးလားလို့ လှမ်းမေးခဲ့ပြီး ကိုယ့်ကိုယ်ကိုယ် ရှက်သင့်တယ်လို့ ဝေဖန်ခဲ့ပါတယ်။ ပြီးတော့ ထရမ့်က မိန့်ခွန်း ဆက်ပြောတဲ့ အခါမှာ မင်နီဆိုးတား ပြည်နယ် ကိုယ်စားပြု အောက်လွှတ်တော် အမတ် အိုမာနဲ့ မစ်ချီဂန် ပြည်နယ် ကိုယ်စားပြု အမတ်တလိဘ်တို့က ထရမ့်ကို တုံ့ပြန်ပြောဆိုပြီး ရှုတ်ချခဲ့ကြတာ ဖြစ်ပါတယ်။

‘အမေရိကန်တွေကို ရှင်ပဲ သတ်ပစ်ခဲ့တာ’လို့ အမျိုးသမီးအမတ် အိုမာက အကြိမ်ကြိမ် အော်ပြောတာကို ကြားရပါတယ်။ ဒါဟာ ထရမ့်ရဲ့ အမိန့်နဲ့ ဖြန့်ကျက်ခဲ့တဲ့ ဖက်ဒရယ် အေးဂျင့်တွေက မင်နီယာပိုလစ်မြို့ခံ နှစ်ဦးကို ပစ်သတ်ခဲ့တဲ့ ကိစ္စကို ရည်ညွှန်းခြင်းလို့ ယူဆရပါတယ်။ အိုမာက ထရမ့်အနေနဲ့ ကိုယ့်ကိုယ်ကိုယ် ရှက်သင့်ကြောင်းလည်း တုံ့ပြန်ပါတယ်။

တလိဘ်ကတော့ အမေရိကန် လူဝင်မှုကြီးကြပ်ရေးနဲ့ အကောက်ခွန်ဌာန (ICE)ကို ဆဲရေးထားတဲ့ စာတမ်းပါတဲ့ အင်္ကျီကို ဝတ်ဆင်လာခဲ့သလို ထရမ့် မိန့်ခွန်းပြောနေတုန်းမှာ ‘ညာနေတာ’လို့ ခဏခဏ လှမ်းအော်နေခဲ့ပါတယ်။ ICEဟာ ရွှေ့ပြောင်း အခြေချမှုတွေကို ဖြိုခွင်းတဲ့ ထရမ့်ရဲ့ မူဝါဒတွေကို အဓိက အကောင်အထည် ဖော်ပေးနေတဲ့ ဌာနဖြစ်ပါတယ်။

တရားမဝင် ရွှေ့ပြောင်း အခြေချမှုတွေကို တိုက်ဖျက်ရေး ဆိုတာဟာ ထရမ့်ရဲ့ ရွေးကောက်ပွဲကြို မဟာဗျူဟာ မဲဆွယ်ကတိတစ်ခု ဖြစ်ခဲ့ပေမယ့်လည်း အဲဒီကိစ္စကို ကိုင်တွယ်တဲ့ လုပ်ပုံကိုင်ပုံတွေအပေါ် လူထုထောက်ခံမှုက ကျဆင်းလာတယ်လို့ သဘောထားအမြင် စစ်တမ်းတွေက ညွှန်ပြနေပါတယ်။ ဖေဖော်ဝါရီလမှာ Quinnipiacက ကောက်ယူတဲ့ လူထုအမြင် စစ်တမ်းမှာ ဖြေဆိုသူ ၆၃ ရာခိုင်နှုန်းက ICEရဲ့ လုပ်ပုံကိုင်ပုံတွေကို လက်မခံချင်ကြောင်း ပြောကြားခဲ့ပါတယ်။

အမေရိကန် သမ္မတက နိုင်ငံတော် အခြေပြ မိန့်ခွန်းပြောနေချိန် လွှတ်တော် အမတ်တွေ ရဲ့ ကန့်ကွက် တုံ့ပြန်တာမျိုး အရင်ကလည်း ရှိခဲ့ဖူးပါတယ်။ ၂၀၂၃ ခုနှစ်တုန်းက သမ္မတ ဂျိုးဘိုင်ဒန်လည်း အလားတူ မိန့်ခွန်းပြောနေချိန်မှာ ရီပတ်ဘလစ်ကန် အမတ်တစ်ဦးဖြစ်တဲ့ မာဂျရီ တေလာ ဂရင်းက ဘိုင်ဒန်ကို ‘လူလိမ်’လို့ အော်ဟစ်ခဲ့ပါတယ်။

၂၀၀၉ ခုနှစ်တုန်းကလည်း သမ္မတ ဘာရတ် အိုဘားမားက ကျန်းမာရေး စောင့်ရှောက်မှု အစီအမံ ပြုပြင်ပြောင်းလဲရေး ကိစ္စတွေ ပြောနေတုန်းမှာ ရီပတ်ဘလစ်ကန် အမတ် ဂျိုးဝီလ်ဆန်က ‘လိမ်နေတာ’လို့ အော်ပြီး နှောင့်ယှက်ခဲ့ဖူးပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA