2017-ci il Cəlilabadda bir sıra uğurlarla yadda qaldı

Описание: Bir neçə gündən sonra tarixə qovuşacaq 2017-ci il Cəlilabadda bir sıra sosial yönümlü yeni obyektlərin açılışı ilə yadda qaldı. Prezident İlham Əliyevin xeyir-duası ilə istifadəyə verilən yeni müsəssisələrin açılışlarını sadə cəlilbabadlılar heç bir zaman unutmayacaq. Bununla yanaşı 2017-ci il rayonda təhsil və səhiyyə sahələri üçün də uğurlu il kimi yadda qalacaq.

Bir həftədən sonra yola salacağımız 2017-ci il cəlilabadlıların yaddaşında yeni infrastruktur layihələrinin açılışı ilə yadda qalacaq. Həllini çoxdan gözləyən Cəlilabad-Astanlı-Cəngan-Soltankənd avtomobil yolu və Rayon Telekommunikasiya Qovşağının bu il əsaslı şəkildə yenidən qurulan binası sakinlərin istifadəsinə verildi. Eyni zamanda bu il “Cəlilabad şəhərinin içməli su təchizatı sisteminin yenidən qurulması və kanalizasiya infrastrukturunun yaradılması” layihəsinin icrasına başlanıldı. Bu il üçün ən əlamətdar hadisə isə dövlət başçısının Cəlailabada səfəri olub.

Heydər Əliyev Mərkəzinin metodisti Ofeliya Qəhrəmanova: “10 may Ümummilli Liderimiz Heydər Əliyevin ad günü münasibəti ilə burada möhtəşəm konsert keçirildi. Daha sonra prezidentimiz İlham Əliyevin Cəlilabada səfəri keçirildi.”

2017-ci il təhsil işçiləri üçün də uğurlu il kimi yadda qalıb. Cəlilabadda bu il ümumilikdə 449 nəfər abutiriyent ali və orta ixtisas məktəblərinə daxil olaraq tələbə adını qazanıblar. Onlardan 12 nəfəri 600-dən yuxarı bal toplayıb.

Cəlilabad Rayon Təhsil Şöbəsinin kadrlar məsələsi üzrə aparıcı məsləhətçisi Ələkbər Niftiyev: “2017-ci ildə İncillikənd ümumi orta məktəbi, Cəfərxanlı kənd ümumi orta məktəbi Təhsil Nazirliyinin təşəbbüsü ilə tam əsaslı təmir olunaraq istifadəyə verilmişdir. Bundan başqa 2017/2018-ci tədris ilində diaqnostikanın nəticəsinə görə müəllimlər dərs yükü ilə təmin olunmuşdur.”

2017-ci il rayonda səhiyyə sahəsində də uğurlu il olub.

Səhiyyə işçisi Gülər İsgəndərova: “2017-ci ildə olduğu kimi 2018-ci ildə də yeni səhiyyə ocaqları insan amilini nəzərə alan, insanın ən mühüm tələblərini yerinə yetirməyə xidmət edən yeni obyektlərin yeni müəssisələrin yenədə açılması istifadəyə verilməsi davam etsin.”

Bu il həmçinin Cəlilabadda kənd təsərrüfatı sahəsində də məqsədyönlü addımlar atılıb. Rayonda 500 hektar sahədə pambıq əkilib. Həmçinin rayon fermerləri bu il kartofun satışından da yüksək gəlir əldə ediblər.