Marathi kirtan - Ye re krishna tirichya vasanarya ये रे कृष्णातिरीच्या वसणाऱ्या | dattadasbuva ghag

Описание: 'कृष्णातिरीचा कीर्तनसूर्य'

ये रे कृष्णातिरीच्या वसणाऱ्या म्हटलं की कीर्तनपरंपरेतलं एक नाव डोळ्यासमोर येतं ते म्हणजे सांगलीतले नरसोबावाडीचे ह.भ.प. दत्तदास बुवा घाग.

कीर्तनाची परंपरा अनादी काळापासून आपल्याकडे आहे. कीर्तन हे माझ्यासाठी एक अभ्यास आणि सतत कुतूहल निर्माण करणार आहे. आमच्या भिवंडी शहरात गणपती मंदीर किंवा भीमेश्वर मंदीर असो, इथे थोरामोठ्या कीर्तनकार मंडळींकडून कीर्तन सेवा झाली आहे.

त्यातलं एक नाव म्हणजे ह.भ.प. दत्तदास बुवा घाग यांचं. मला प्रत्यक्षात कीर्तन ऐकायची संधी मिळाली नाही. फक्त एकदा ते दोनदा भेट झाली होती. परंतू त्यांचे चिरंजीव ह.भ.प शरदबुवा घाग यांचा सहवास लाभला. त्यांच्याच आचरणावरून मोठ्या बुवांच्या विषयी कुतूहल वाढत राहिलं. मग युटूबवर असलेली बुवांची कीर्तनं ऐकली बरेचदा.

महाराष्ट्रात कीर्तनकार घागबुवांना न ओळखणारा कीर्तनप्रेमी हा विरळाच म्हणावा लागेल. सावळा वर्ण, डोळ्यांना जाड भिंगाचा चष्मा, सडपातळ बांधा. पण मृदू वाणी आणि स्वभाव साखरेहूनही गोड आणि नम्र, आर्जवी, निगर्वी. अगदी साधेसुधे व्यक्तिमत्त्व. ह.भ.प रामभाऊ कऱ्हाडकरबुवा हे बुवांचे गुरु.

नरसोबावाडीच्या घाग बुवांचं कीर्तन ऐकणं ही एक पर्वणी असायची असं ज्येष्ठ मंडळी सांगतात. केवळ महाराष्ट्रातच नाही तर गोवा, मध्यप्रदेश, कर्नाटक, गुजरातेतही कीर्तन रंगात रंगणारे श्रोते बुवांना अनुभवायला मिळाले. अनेक पूरस्कारही बुवांना मिळाले, पण बुवा केवळ रमले ते कीर्तनात.

बुवांसारखे अनेक कीर्तनकार आजही आपल्याकडे आहेत. ज्यांच्यामुळे भागवत धर्माची पताका आजही डौलाने फडकते आहे. कीर्तन ऐकायला लागल्यापासून मोरोपंत-वामन पंडित-ज्ञानेश्वर-तुकाराम-नामदेव-एकनाथ-रामदास हे तर जिव्हाळ्याचे जिवलग झाले. शिवाय जोडीला कबीर-सूरदास-मीराबाई यांचाही अधूनमधून परामर्श मिळत राहतो आणि तुमच्यातला माणूस ही सगळी मंडळी घडवत असतात..

बुवांच्या बद्दल सांगायचं झालं तर एक सशक्त कलावंत आणि सुजाण विकसनशील व्यक्तिमत्त्व या दोन्हीच्या अभिव्यक्तीचं ते एक अत्यंत प्रभावी साधन होतं. त्यामुळे त्यांचं कीर्तन ऐकणं आणि पाहणंही हा एक समृद्ध अनुभव... !!

आज हे लिखाणाचं कारण म्हणजे सध्या निवडणुका आणि ऑक्टोबरमुळे वातावरणसह डोकंही गरम होतं. त्यामुळे मनशांतीसाठी ओलावा शोधायचा प्रयत्न असतो. मग कीर्तन, गाणं ऐकण्यासारखा साधासा मार्ग असताना, दुसरं आणखी काय हवं ना ! .

-