L-GĦAŻLA F’IDEJN IL-POPLU FIS-26 TA’ MARZU

Описание: ONE.COM.MT • L-attività politika tal-Ħadd fil-Floriana serviet biex il-Prim Ministru Robert Abela ħabbar id-data tal-elezzjoni ġenerali.

Nhar is-Sibt sitta u għoxrin ta’ Marzu li ġej il-poplu għandu l-għażla f’idejn min irid jafda l-pajjiż għall-ħames snin li ġejjin.

L-għajta tal-Partit Laburista se tkun Malta Flimkien.

KITBA: STEFAN BAJADA
FILMAT: ONE / BJORN BONELLO

ROBERT ABELA
PRIM MINISTRU
“Għalhekk, nemmen li wasal il-mument li niġi għandkom bħala Prim Ministru, u nitlobkom il-fiduċja għall-ewwel mandat tiegħi mingħand il-Maltin u l-Għawdxin kollha. Fil-ħin li ġej se nkun qed immur għand il-President tar-Repubblika biex nagħtih parir ixolji l-Parlament u tissejjaħ elezzjoni ġenerali fis-26 ta’ Marzu.”

Kien b’dan il-kliem li l-Prim Ministru u Mexxej Laburista Robert Abela talab lil poplu Malti u Għawdxi biex jagħżel.

F’attività politika fil-Floriana huwa ħabbar id-data tal-elezzjoni ġenerali u fi sfond ta’ ċapċip minn folla kbira u sabiħa, Robert Abela qal kif l-għajta tal-Partit Laburista se tkun Malta Flimkien.

F’diskors b’saħħtu u b’messaġġ pożittiv, il-Prim Ministru wera biċ-ċar li l-Partit Laburista se jibqa’ jkun il-bidla, li huwa ambuzzjuż u ottimist għal futur isbaħ.
Hawnhekk huwa semma ħemel ta’ riformi u miżuri li wettaq Gvern Laburista favur il-Maltin u l-Għawdxin.

Dr Robert Abela qal li dak li ġa twettaq minn Gvern Laburista wera kredibbilità, konsistenza u l-ħila li nmexxu lil Malta ’l quddiem anke f’mumenti ta’ sfida, bħall-pandemija.

Saħaq li dak li l-Partit Laburista se jippreżenta mil-lum ’il quddiem huwa l-pjan għall-futur.

Hawnhekk huwa ddikjara li dawn il-fatturi pożittivi wasslu sabiex bħala Prim Ministru jitlob il-poplu jagħżel Gvern li jieħdu ’l quddiem b’rasu mistrieħa.

ROBERT ABELA
PRIM MINISTRU
“Irrid Malta li tgħix bis-sħiħ kif inħobbuha U kif irriduha. U aqwa milli dejjem għexet. Malta kuntenta, vibranti u kkulurita. U ladarba nkunu tlaqna f’dik id-direzzjoni, m’għandu jidħol xejn fin-nofs. Le, lanqas il-kampanji tal-partiti politiċi. Dak irid ikun żmien fejn niffukaw biss fuq it-tmun tal-pajjiż. Il-pjan għall-ġejjieni jrid ikun issiġġilat u lest biex it-tmexxija tal-pajjiż timplimentah, u l-poplu jimxi ’l quddiem b’rasu mistrieħa.”