Historia e vrasjes së Azem Hajdarit dhe procesi gjyqësor i autoreve të saj - (12 Shtator 2002)

Описание: Lajme Arkiva - TV Klan 2002

Vrasja e deputetit të PD Azem Hajdari, në 12 Shtator të vitit ’98, u hetua për më shumë se një vit dhe si autorë të saj u dënuan pak muaj më parë Jaho Mulosmni, dhe vëllezërit Ismet dhe Izet Haxhia, ky i fundit një nga truprojat më të besuar të udhëheqësit të PD Sali Berisha.

Mbrëmjen e 12 Shtatorit, rreth orës 21 e 15 minuta, para selisë së PD u qëllua me armë zjarri nga disa persona Azem Hajdari, i cili u lajmërua nga një person i kësaj partie, se dikush e kërkonte jashtë. Bashkë me të vritet një nga truprojat Besim Çerja dhe plagoset Zenel Neza. Partia Demokratike qe e para që fajësoi përmes një deklarate për shtyp Jaho Mulosmanin, Fatmir Haklaj, atëherë me detyrë në komisariatin e Tropojës, Naim Çangun dhe Fatmir Metën edhe ky shef i këtij komisariati, si autorë të ekzekutimit, sipas demokratëve, për arsye politike.

Autorët sipas zyrtarëve të kësaj partie, kishin përdorur makina policie, por atë natë asnjë postbllok policie nuk ndaloi vrasësit, që sipas deklarimeve zyrtare u larguan menjëherë drejt Tropojës. Hetuesit e ngjarjes më vonë pranuan se në vendin ku ajo ndodhi u gjendën disa armë, por shiu i rrëmbyeshëm që ra atë natë zhduku gjurmët e gishtave dhe as sot nuk është arritur të vërtetohet nëse këto armë zjarri i përkasin viktimave apo autorëve të vrasjes.

Më shumë sesa prokuroria, ishte Partia Demokratike ajo që siguroi të dhëna, qoftë të deklaratave për shtyp dhe qoftë me anë të raporteve dërguar Ambasadës Amerikane, lidhur me hollësi për këtë atentat. Në një raport zyrtar, drejtuar Ambasadës Amerikane dhe ambasadorit të OSBE-së, deklaratë e cila është paraqitur si provë gjatë seancave gjyqësore të çështjes, përshkruhet me hollësi, se atentatorët kanë komunikuar para dhe pas ngjarjes me celularë në formë radiosh, si dhe të dhëna të tjera lidhur me llojin e armëve të përdorura.

Tre vjet pas vrasjes, në Prill të vitit 2001 dhe pas hetimeve të kryera nga Prokuroria e Përgjithshme, me mbështetjen edhe të prokurorëve norvegjezë, dosja prej më shumë se një mijë faqesh, për të ashtuquajturën vrasje e shekullit, u depozitua në Gjykatën e Shkallës së Parë. Fatmir Meta, Ismet Haxhia dhe Isamedin Haxhia, u akuzuan për vrasje në bashkëpunim për shkak të cilësive të veçanta të viktimës. Një muaj më vonë u ul në të njëjtën bankë të të akuzuarve Jaho Mulosmani, që fshihej deri në atë Kohë në Kosovë.

Në listën prej më shumë se 100 dëshmitarësh prokuroria kishte përfshirë edhe të afërm të autorëve të ngjarjes dhe viktimave. Muharrem Haklaj, babai i Fatmir Haklaj, ky i fundit pjesëmarrës në atentat dhe i ekzekutuar më vonë në Tropojë, akuzoi gjatë dëshmisë së tij në gjykatën e Tiranës, se Azem Hajdari është vrarë nga qarqe brenda PD. Dëshmitarët që munguan në këtë proces të drejtuar nga gjyqtari Arben Micko, qenë edhe gruaja e Azem Hajdarit, lideri i PD Berisha dhe zyrtarë të tjerë të kësaj partie.

Vendimi i Gjykatës së Apelit shpalli përfundimisht Jaho Mulosmanin 26 vjeç, autor të vrasjes dhe e dënoi atë me burg të përjetshëm. Ismet Haxhia u dënua me 20 vjet burg, ndërsa ish-truproja që ende kërkohet nga policia Izet Haxhia u dënua me 25 vjet heqje lirie, si njeriu i besuar i PD pa ndihmën e të cilit atentati ndaj Azem Hajdarit do të ishte thuajse i pamundur të kryhej. Fatmir Meta shpallet i pafajshëm dhe po ashtu dhe Isamedin Haxhia.

Për opinionin e gjerë, për të cilin për më shumë se tre vjet zyrtarët shpallën vetëm arsye politike lidhur me vrasjen, qe i papritur vendimi që e hodhi poshtë këtë version. Të gjithë mundën që ta argumentonin shkaqet politike të këtij atentati, ndërsa tani askush nuk mundet apo nuk guxon të jap argumente, që të vërtetojnë atë që gjykata e quajti, përfundimisht ekzekutimi për motive të dobëta dhe hakmarrje ndaj deputetit Azem Hajdari./tvklan.al


SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook:   / tvklan  
Follow Tvklan on Instagram:   / rtvklan  
Programet e Tv Klan mund t’i ndiqni edhe në faqen https://tvklan.al/programe/