Bənəfşə - Səid Rüstəmov, Aşıq Qurbani

Описание: İfa edir Naxçıvan musiqi kollecinin xalq çalğı alətləri orkestri. Solist: Sərxan Bünyadzadə. Drijor Naxçıvan Muxtar Respublikasının Əməkdar artisti Təranə Qurbanova.
Naxçıvan Muxtar Respublikasının Əməkdar artisti Qurbanova Təranə Əbülfəz qızı Naxçıvan şəhərində anadan olub. İlk musiqi təhsilini Şəhər Mədəniyyət Evində alıb, sonra Naxçıvan Musiqi Kollecinin “Xalq Çalğı Alətləri” Şöbəsinin tar ixtisasına daxil olub Arif Quliyevin tələbəsi olur. Burda olarkən Gülnarə Rzayeva (kamança) və Sədiyyə Qasımova (solist) ilə birlikdə “qızlar üçlüyü”nü yaradırlar. 1980-ci ildə münsiflər heyətində Əbülfət Əliyev, Süleyman Ələsgərov və Nazim Əliverdibəyov kimi simaların yer aldığı Ümumrespublika Müsabiqəsində həm solo ifalar həm də “qızlar üçlüyü” ilə nömrələr nümaiş etdirir və 3-cü yerlə təltif olunur. Daha sonra isə Təranə Qurbanova Bakı Musiqi Akademiyasına daxil olur və oranı iki ixtisas “Tar” və “Xalq Çalğı Alətləri Orkestrinin” “drijorluq” ixtisası üzrə bitirir. O burda, Həmid Vəkilovdan tar, Süleyman Ələsgərovdan isə dirjorluq sənətinin incəliklərini öyrənib. Bu müddət ərzində 1986-cı ildə Opera və Balet teatrında keçirilən Muslüm Maqomayevin 100 illik yubiley konsertində xalq artistləri ilə səhnəni bölüşür. Ali təhsilini başa vurduqdan sonra o, Naxçıvan Musiqi Kollecində pedaqoji fəaliyyətə başlayıb və işlədiyi uzun müddət ərzində ixtisaslı kadrların yetişməsində fədakar müəllim kimi seçilib və sevilib. 12 ildən artıq bir müddətə Kollecin Xalq Çalğı Alətləri Orkestrinə rəhbərlik edən Təranə müəllimə tez-tez müxtəlif tədbirlərdə, konsertlərdə uğurla çıxış edir.