Mond Bega i akuzuar nga PD per lidhjet me mazhorancen, duhet te justifikoje pasurine|ABCNews Albania

Описание: Biznesmeni Mond Bega, i njohur edhe me emrin Edmon Bego dhe i dënuar me 11 vite burg në Itali për pjesëmarrje në organizata kriminale me qëllim trafik droge, është subjekti i rradhës që Operacioni Forca e Ligjit i ka dërguar formularin e që brenda 48 orësh duhet të justifikojë pasurinë e të deklarojnë krijimin e burimit të saj.

Bega është një emër i njohur jo vetëm nga drejtesia, pasi PD e ka akuzuar publikisht për lidhje të ngushta me kreun e grupit parlamentar të Partisë Socialiste, Taulant Ballën dhe mazhorancën.

Në akuzat e bëra publike nga opozita, thuhej se Bega po shpërngulte një numër të madh banorësh nga zona e Unazës së Re për të ndërtuar një kompleks të tijin në këtë zonë që sipas PD kushtonte rreth 60 miliona euro.
Në vitin 2018, në dokumentet e publikuara nga Partia Demokratike tregonin se tenderi i OST-së me vlerë 100 milionë lekë i është dhënë Begës në zonën e Librazhdin, aty ku kishte edhe zonën elektorale Taulant Balla.

Ndërkohë, vitin e kaluar Prokuroria për Krime të Rënda njoftoi zyrtarisht se ndaj Begës do të niste hetimi pasuror i bazuar në ligjin anti-mafia, por asnjëherë nuk ka pasur rezultate konkrete për sekuestrimin e pasurisë së tij.

Biznesmeni Mond Bega, njihet ndryshe edhe me emrin Manoli Bega, Saimir Sina dhe Belul Gjahtari.

Fillimisht, në prill të 2007 ai u dënua me 27 vjet e 9 muaj burg nga Gjykata e Torinos, dënim ky që më pas iu ul në 18 vjet e 5 muaj, e ndërsa në 2009-ën, si pasojë e amnistisë së përgjithshme në Itali, Bega u dënua me 11 vite heqje lirie.

Emri i tij është përfolur edhe si një nga anëtarët e ish-bandës së Aldo Bares në Lushnjë.

Në listën e OFL për të justifikuar pasurinë është edhe Eduart Nazari i arrestuar në vitin 2013 për veprën penale “Trafikimi i lëndëve narkotike” kryer në bashkëpunim.

Nazari u arrestua në Pikën Kufitare të Kakavijës, ku në mjetin që ai drejtonte u sekuestrua 3.5 kg heroinë.

Brenda 48 orësh, pasurinë duhet ta justifikojë edhe Gentian Çako, i dënuar me 20 vite burg nga gjykata e Korçës për veprën penale “Vrasja në rrethana cilësuese, e kryer në bashkëpunim”./abcnew.al