Ե՞րբ Հայաստանի քաղաքացիները կկարողանան առանց վիզայի եվրոպական երկրներ մեկնել

Описание: Վիզաների ազատականացման գործողությունների ծրագիրը բանակցվող փաստաթուղթ չէ՝ «Ռադիոլուրի» հետ զրույցում ասել է Ներքին գործերի նախարարի տեղակալ Արմեն Ղազարյանը։ Նրա խոսքով՝ Եվրոպական հանձնաժողովը փաստաթուղթը ներկայացնում է գործընկեր կողմին իրականացման համար։ Հայաստանը, փոխնախարարի խոսքով, պետք է կատարի  տնային աշխատանքը, կազմի գործողությունների ճանապարհային քարտեզը։

Եվրոպական միության և Հայաստանի Հանրապետության միջև վիզաների ազատականացման շուրջ  երկխոսությունը մեկնարկել է 2024 թ․-ին։

Այս ընթացքում տեղի են ունեցել  բարձրաստիճան հանդիպումներ, Հայաստան են այցելել  ԵՄ փորձագիտական առաքելություններ, ազդարարվել է բանակցությունների պրակտիկ փուլի մեկնարկը։

Եվրոպական միության հետ նման ճանապարհ անցել է 8 պետություն, որոնցից 3-ն Արևելյան գործընկերության պետություններ են՝ Մոլդովան, Վրաստանը և Ուկրաինան։ 

Հարցին, թե գործնականում երբ ՀՀ քաղաքացիները առանց վիզայի եվրոպական երկրներ այցելելու հնարավորություն կունենան, Ղազարյանը պատասխանել է․

«Այն ժամանակ, երբ  մենք կիրականացնենք վիզաների ազատականացման գործողությունների ծրագիրն ամբողջությամբ, և Եվրոպական միության խորհուրդը կկայացնի համապատասխան որոշումը վիզաները ազատականացնելու մասին։ Դա է ժամկետը»։

Վիզաների ազատականացման գործընթացը համակարգում է  Ներքին գործերի նախարարությանը,  Հայաստանի կողմից գլխավոր բանակցողը ՆԳ նախարարն է։