ထိုင်းရဲ့သဘောထားက မြန်မာ့အရေး ဘယ်လိုသက်ရောက်နိုင်လဲ (ရုပ်/သံ)

Описание: ထိုင်းနိုင်ငံခြားရေးဝန်ကြီး ဆီဟာဆက်နဲ့ စစ်ကော်မရှင်နိုင်ငံခြားရေးဝန်ကြီး ဦးသန်းဆွေတို့ဟာ ပြီးခဲ့တဲ့ ဖေဖော်ဝါရီ ၁၈ ရက်နေ့က ဖူးခက်မြို့မှာ အလွတ်သဘော တွေ့ဆုံခဲ့ကြပြီး၊ မြန်မာနိုင်ငံကို အာဆီယံအသိုက်အဝန်းမှာ ပြန်လည်ပါဝင်လာနိုင်အောင် ထိုင်းနိုင်ငံက "ပေါင်းကူးတံတား" အဖြစ် ဆောင်ရွက်ပေးမယ်လို့ မစ္စတာ ဆီဟာဆက်က ဆိုပါတယ်။

ထိုင်းနိုင်ငံခြားရေးဝန်ကြီးက မြန်မာ့ငြိမ်းချမ်းရေးဟာ ထိုင်းနိုင်ငံရဲ့ အမျိုးသားအကျိုးစီးပွားအတွက် အလွန်အရေးကြီးသလို၊ ပိတ်ထားတဲ့ နယ်စပ်ကုန်သွယ်ရေးဂိတ်တွေ ပြန်ဖွင့်နိုင်ဖို့အတွက် စစ်ကော်မရှင်ရဲ့ ရွေးကောက်ပွဲအလွန် ပေါ်လာမယ့်အစိုးရနဲ့ တိုင်းရင်းသားအဖွဲ့တွေကြား ဆွေးနွေးမှုတွေဖြစ်လာအောင် ဒေသတွင်းအဆင့်ကနေ စတင်ကူညီပေးသွားမယ်လို့ ဆိုပါတယ်။

ဒါပေမဲ့ အာဆီယံအတွင်းမှာတော့ မြန်မာ့အရေးအပေါ် သဘောထားကွဲလွဲမှုတွေ ရှိနေဆဲဖြစ်ကြောင်း အာဆီယံရေးရာကျွမ်းကျင်သူ ဦးဝင်းမင်းက ထောက်ပြထားပါတယ်။ ထိုင်း၊ လာအိုနဲ့ ကမ္ဘောဒီးယားနိုင်ငံတွေက စစ်ကော်မရှင်ရဲ့ ရွေးကောက်ပွဲရလဒ်ကို အသိအမှတ်ပြုနိုင်ခြေရှိပေမယ့်၊ မလေးရှား၊ ဖိလစ်ပိုင်နဲ့ စင်ကာပူနိုင်ငံတွေကတော့ စစ်တပ်ကလုပ်တဲ့ ရွေးကောက်ပွဲကို လက်မခံကြောင်း ပြတ်ပြတ်သားသား ရပ်တည်နေကြတာပါ။

အထူးသဖြင့် စစ်အာဏာရှင်ရဲ့ စစ်ရာဇဝတ်မှုတွေကို အရေးယူဖို့ ကြိုးပမ်းနေတဲ့ တီမောလက်စ်တေးနိုင်ငံနဲ့ တော်လှန်ရေးအင်အားစုတွေနဲ့ ထိတွေ့ဆက်ဆံနေတဲ့ မလေးရှား၊ ဖိလစ်ပိုင်တို့ကြောင့် အာဆီယံအနေနဲ့ စစ်ကောင်စီအစိုးရသစ်ကို နေရာပေးဖို့ ခဲယဉ်းဦးမှာ ဖြစ်ပါတယ်။

တဘက်မှာလည်း ကရင်နီအမျိုးသားတိုးတက်ရေးပါတီ (KNPP) အပါအဝင် တော်လှန်ရေးအင်အားစုတွေကတော့ ၂၀၀၈ ဖွဲ့စည်းပုံကို အခြေခံထားတဲ့ ဘယ်လိုနိုင်ငံရေးဆွေးနွေးမှုကိုမဆို လက်ခံမှာမဟုတ်ကြောင်း တုံ့ပြန်ထားပါတယ်။

စစ်တပ်အနေနဲ့ နိုင်ငံရေးကနေ လုံးဝထွက်ခွာရမယ်ဆိုတဲ့ မူဝါဒကို တော်လှန်ရေးအဖွဲ့တွေက ဆုပ်ကိုင်ထားသလို၊ ထိုင်းနိုင်ငံဘက်က ဒေါ်အောင်ဆန်းစုကြည်ကို လွှတ်ပေးဖို့ တောင်းဆိုချက်တွေ ရှိနေပေမယ့် လက်ရှိစစ်ကောင်စီဘက်က ကမ်းလှမ်းနေတဲ့ ဆွေးနွေးပွဲပုံစံတွေဟာ မြေပြင်အရှိတရားနဲ့ ဝေးကွာနေပြီး ငြိမ်းချမ်းရေးလမ်းစဟာ ဆက်လက်ပိတ်ဆို့နေဆဲ ဖြစ်ပါတယ်။

#မြန်မာ #ဧရာဝတီ #အာဆီယံ #ဆီဟာဆက် #ဦးသန်းဆွေ #နိုင်ငံခြားရေးဝန်ကြီး #ငြိမ်းချမ်းရေး #WhathappensInMyanmar