დიმა ტატიშვილი - არა ინტელექტის ოკუპაციას!

Описание: არა ინტელექტის ოკუპაციას! - ასოციაციის კამპანია საავტორო უფლებებში რუსული საფრთხის წინააღმდეგ.

2017 წლის აგვისტოში, რუსეთის ავტორთა საზოგადოებამ (RAO) დააფუძნა ევრაზიის უფლების მფლობელთა საზოგადოებების კონფედერაცია (EACOP) სადაც შეიყვანა ხუთი ქვეყანა: აზერბაიჯანი, სომხეთი, ხაზახეთი, ყირგიზეთი და ბელორუსი. პარალელურ რეჟიმში, იგივე RAO-მ შექმნა ინტელექტუალური საკუთრების ობიექტებთან დაკავშირებული ტრანზაქციების საკოორდინაციო ცენტრი (IP CHAIN) რომელმაც დაიწყო კონფედერაციის წევრ წვეყნებში შეგროვებული ჰონორარის და ამ ჰონორარის მფლობელთა შესახებ ინფორმაციის გაკონტროლება.

EACOP-ი, დაფუძნდა ავტორთა და კომპოზიტორთა საზოგადოებების საერთაშორისო კონფედერაციის (CISAC) საპირწონედ და კონკურენტად. CISAC-ი წარმოადგენს მუსიკის სფეროში მსოფლიო გაერთიანებას, რომელშიც გაწევრიანებულია მსოფლიოს 239 ორგანიზაცია და საქართველოც მისი წევრია.

EACOP-ის დაფუძნების შემდეგ, რუსეთმა, მასში გაწევრიანების მიზნით, დაიწყო ზეწოლა საქართველოს საავტორო უფლებათა ასოციაციზეც (GCA). რუსეთის ინტერესს წარმოადგენდა საქართველოს, როგორც რეგიონში ლიდერი პოზიციის მქონე ქვეყნის ამ კავშირში შეყვანა, რითაც ერთი მხრივ შესუსტდებოდა საქართველოს როლი მსოფლიო არენაზე და მეორე მხრივ მოხდებოდა განვითარების არსებული დინამიკის შეფერხება და უკუსვლა.

არაერთი მცდელობის მიუხედავად, რუსეთმა მიზანს ვერ მიაღწია და GCA არ გახდა ევრაზიული კავშირის წევრი, რამაც, ბუნებრივია, მისი გაღიზიანება გამოიწვია, რის შემდეგაც მან მიმართა უკვე მრავალგზის ნაცად, ციხის შიგნიდან გატეხვის მეთოდს. დასაყრდენად გამოიყენა რუსეთის მიმართ სენტიმენტალურად განწყობილი მომღერლები, დავით ხუჯაძე და აჩი ფურცელაძე და ასევე მათთან ბიზნეს ინტერესებით დაკავშირებული ვინმე ალექსანდრე (ბაკუნა) გვარიშვილი, რომელთა მეშვეობითაც ცდილობს საქართველოს საავტორო უფლებათა ასოციაციის დისკრედიტაციას, ქართველი ხელოვანების თვალში მისი იმიჯის შელახვას და ამ გზით საავტორო უფლებების სფეროში არეულობის შეტანას.

დასახელებული მომღერლების მიერ შეიქმნა საინიციატივო ჯგუფი და დაფუძნდა ორგანიზაცია, რომელმაც თითქოს უნდა უზრუნველყოს ქართველი მუსიკოსების საავტორო უფლებების მართვა და მათთვის ჰონორარის გადახდა. რაც, სხვა მიზეზებს რომ თავი დავანებოთ, შეუძლებელია თუნდაც იმ მარტივი მიზეზის გამო, რომ ამ ორგანიზაციას ამის იურიდიული უფლებამოსილება არ აქვს. „საავტორო და მომიჯნავე უფლებების შესახებ“ საქართველოს კანონის 63-ე მუხლი მკაფიოდ განსაზღვრავს კრიტერიუმებს, რომელსაც უნდა აკმაყოფილებდეს კოლექტიური მართვის სტატუსის მქონე ორგანიაზცია. პირველი, ასეთი სტატუსისთვის ორგანიზაციას გაფორმებული უნდა ჰქონდეს ურთიერთწარმომადგენლობის ხელშეკრულებები მსოფლიოში მოქმედი ორგანიზაციების უმრავლესობასთან. მუსიკის სფეროში მოქმედებს 239 ორგანიზაცია. საიდანაც 202 უკვე ასოციაციას პარტნიორია. და მეორე, სფეროში დასაშვებია მხოლოდ ერთი ასეთი ორგანიზაციის შექმნა და ასეთი ორგანიზაცია ასოციაციის სახით უკვე არსებობს.

სატელევიზიო ინტერვიუებში ეს ბატონები არც მალავენ ამ ორგანიზაციის რუსულ ფესვებს, უფრო მეტიც, მიიჩნევენ რომ რუსეთი უკეთ შეძლებს ქართველთა ჰონორარის შეგროვებას. დაიწყო ინფორმაციის გავრცელება, რომ თითქოს არსებული ასოციაცია არ მუშაობს გამართულად, არ არის გამჭვირვალე და ასე შემდეგ. არადა, სწორედ გამჭვირვალობაა ერთ-ერთი ძირითადი კომპონენტი, რის გამოც ასოციაცია დღესდღეობით პოსტ საბჭოთა ქვეყნებს შორის იკავებს ლიდერის პოზიციას და ბევრი კომპონენტით არ ჩამოუვარდება ევროპის მრავალ ქვეყანასაც.

სიტუაციის სიმძაფრიდან გამომდინარე, საჭიროდ მივიჩნევთ რეალური ინფორმაცია მივაწოდოთ საზოგადოებას და განსაკუთრებით ხელოვან ადამიანებს, ვინც შეიძლება აღმოჩნდეს რუსული პროპაგანდის მსხვერპლი და შეეხოს ეს პროცესი. საავტორო უფლებების სფეროში რუსული ინტერესების გატარება ნიშნავს უკვე არსებული სისტემისთვის გამოუსწორებელი დარტყმის მიყენებას და პირველ რიგში ქვეყნის იმიჯის შელახვას როგორს CISAC-ის, ასვე მთლიანად ევროპული თანამეგობრობის თვალში, განსაკუთრებით იმ პირობებში, როდესაც ევროკავშირთან ასოცირების ხელშეკრულების მიხედვით ინტელექტუალური საკუთრების დაცვა ჩვენი სახელმწიფოს ერთ-ერთ მნიშვნელოვან პრიორიტეტს წარმოადგენს. გარდა ამისა, ეს ყველაფერი უარყოფითად აისახება ჰონორარის შეგროვების პროცესზე და ამ ჰონორარის დრამატულად შემცირებას გამოიწვევს. რუსეთმა ეს, 2013 წელს, უკვე გააკეთა უკრაინაში, რაც სამწუხაროდ გამოუვიდა და უკრაინა დღემდე იმკის ამის შედეგებს. უკრაინის საავტორო უფლებების ორგანიზაცია (UACRR) 2013 წლამდე რეგიონში ლიდერის პოზიციაზე იყო. რუსეთმა, ზუსტად იგივე მეთოდების გამოყენებით, უკვე არსებული ორგანიზაციის დასუსტების მიზნით, შეძლო შეექმნა თავდაპირველად ორი, ხოლო საბოლოო ჯამში 19 დამატებითი ორგანიზაცია, რომლებმაც ხელოვნურად შეამცირეს ტარიფები და რასაც სიტუაციის უკიდურესად გაუარესება და შეგროვებული ჰონორარის ათჯერ შემცირება მოჰყვა. შედეგად, უკრაინამ არათუ დაკარგა ლიდერის პოზიცია, არამედ აღმოჩნდა ყველაზე ჩამორჩენილ ქვეყანათა შორის.

ასოციაცია, ამ სფეროს მთავარ მოთამაშეებთან, ბრავო რექორდსთან და GMI Rights Management-თან ერთად გრძნობს პასუხისმგებლობას საზოგადოების წინაშე და სწორედ ამიტომ, იწყებს საინფორმაციო კამპანიას: არა ინტელექტის ოკუპაციას!

გვჯერა, რომ კამპანია წარმატებული იქნება, გვეყოფა გონიერება გავითვალისწინოთ უკრაინის მაგალითი და თავიდან ავიცილოთ ინტელექტუალური საკუთრების ოკუპაცია.

ჩვენ აუცილებლად გავიმარჯვებთ, ერთად შევაკავოთ რუსული საფრთხე!