'Axmed Madoobe si nabad ah oo la isla ogyahay ayuu ku baxay, wax hadda dhuumasha ahna ma ahan'

Описание: Xubin ka tirsan Golaha Mustaqbalka Soomaaliya, Maxamed Aadan Koofi, ayaa sheegay in Madaxweyne Axmed Madoobe uu Muqdisho uga baxay si nabad ah, islamarkaana arrintaasi ay ahayd mid la ogyahay oo aan ahayn dhuumasho.

Hadalkan ayaa imanaya kaddib markii Golaha Mustaqbalka uu shaaciyay in wadaxaajoodkii ay la lahaayeen dowladda federaalka uu ku dhammaaday natiijo la’aan. Koofi wuxuu caddeeyay in bixitaanka Madaxweynaha uu ahaa mid caadi ah oo aan qarsoodi ku dhisnayn.

----------------------------------------------------------------------------------------------

Golaha Mustaqbalka Soomaaliya ayaa sheegay in wadaxaajoodkii uu la lahaa dowladda federaalka uu ku dhammaaday natiijo la’aan.

Golaha wuxuu ku eedeeyay dowladda in ay dhinac ka wax ka beddeshay dastuurka, iyadoo xubno ka tirsan baarlamaanka aan loo oggolaan ka qaybgalka, sidoo kale cadaadis amni iyo siyaasadeed ayaa la saaray.

Goluhu wuxuu ku adkaystay in dastuurka 2012-ka uu yahay asaaska sharciga ah, islamarkaana doorashooyinka dawlad-goboleedyadu ay tahay in lagu qabto habraac heshiis lagu yahay oo daahfuran.

Dhanka kale, dowladda federaalka ayay ku eedeeyeen inay rabto in awoodda la ururiyo, doorashooyinka la maamulo, iyo in natiijadu ay iyadu go’aamiso.

Goluhu wuxuu sheegay inuusan u oggolaanin in dastuur la bedelo ama dalka la kala diro, islamarkaana weli diyaar u yahay wadahadal dhab ah oo horseedi kara doorasho heshiis lagu yahay.