Dewpura Athun ( උතුම් දළදා වහන්සේ වඩම්මන දළදා පෙරහැරේ නැදුන්ගමුවේ රාජා ඇත් රජු )

Описание: ඇසල මස උදාවෙත්ම අප මතකයට නැගෙනුයේ සිරි දළදා පෙරහැරයි. අපේ රටේ අති උතුම් බෞද්ධ ආගමික හා සංස්කෘතික පෙළහැරය මෙම සිරි දළදා පෙරහරින් ලොවට විදහා පානවා. ඒ නිසාම අප රටවැසි සේම විදෙශ් ජාතීන්ද මෙම උතුම් දළදා වඩම්මන මහ පෙරහැර දැකීමට මහත් ආශාවකින් පසුවෙයි.

මෙම සුන්දර මෙන්ම ගාම්බීර සංස්කෘතික දැක්ම තුළින් අපේ රටේ අභිමානියත්වයට ඇති කරනුයේ විශල් ආඩම්බරයකි. ඒ මහ අභිමානයේ ආනන්දයට ගම්පහ නැදුන්ගමුව ගමත් එකතු වීම අප සියනෑ පුරවරයටම ඇති කරනුයේ මහත් අභිනන්දයකි.

නැදුන්ගමුව ගමට මෙම අභිමානය කැඳවන්නේ වෙන කිසිවෙකු නොව නැදුන්ගමුවේ රාජා නම් වූ හස්ති රාජයායි. මෙම පින්බර ඇත් රජුගේ හිමිකරුවා වන්නේ වෙද්‍යාචාර්ය හර්ෂ ධර්ම විජය මහතායි. එතුමා අපේ රටේ මහ වෙදදුරෙක් වූ වෙද්‍ය ශිරෝමණී පණ්ඩිත නැදුන්ගමුව රාළහාමිගේ පුතාය. තම පියාගේ වෙදකම මෙන්ම රාජා හස්තියාගේ උරුමයද දායාද කරගත් වෛද්‍ය හර්ෂ ධර්ම විජය මහතා තම පණ සේම රාජා ඇතා බලා ගනිමින් සිටි.

නැදුන්ගමුවේ රාජා ඇත් පැටියා සමග තවත් ඇත් පැටියෙකු ලංකාවට පැමිණියේ ඉන්දියාවෙන්ය. මාහරගම නීලම්මහර වෙද හාමුදරුවෝ තමයි ඇත් පැටවුන්ගේ මුල්ම භාරකරු. ඉන්දියාවේ මයිසූර්වල මහ රාජා කෙනෙකුගේ නෑයෙක්ට වෙදකම් කිරීම නිසා ත්‍යගයක් ලෙස එම මහරාජා විසින් මෙම ඇත් පැටවු දෙදනා උන්වහන්සේට ප‍්‍රධානය කර තිබෙනවා.

පසු කලෙක නීලම්මහර වෙද හාමුදුරුවෝ මෙම ඇත් පැටවුන්ගේ භාරකාරත්වය වෙනත් දෙදෙනෙකුට පවරා තිබෙනවා. එක් පැටියෙක් ඇඹිලිපිටියට ගිහින් පසු කළෙක ගංඟාරාම විහාරස්ථානයේ හැදී වැඞී මීට ටික කලකට පෙර මිය ගියා. ඒ ඇතාගේ නම නවම් රජා විය.

අනෙක් ඇත් පැටියා හොරණ උඩුව පාළාතට ගියමුත් වසර විසිපහකට පමණ පසු නැදුන්ගමුවේ පණ්ඩිත වෙද රාළහාමිගේ දයාබර කැදැල්ලට පිවිසෙන්නේ නැදුන්ගමුවේ රාජා ලෙසින්ය. වෛද්‍ය හර්ෂ ධර්ම විජය මහතාට ඒ වන විට වසර දහ හතක් පමණ විය. දැන් නැදුන්ගමුවේ ඇත් රජුට වසර හැටක් පමණ වේ. මේ වන විට නැදුන්ගමුවේ මේ පින්බර ඇත් රජු වසර අටක් උතුම් දලදා කරඬුව වැඩම කර තිබෙනවා.