الرادود باسم الكربلائي | يوليدي يألاكبر

Описание: الرادود: باسم الكربلائي
الشاعر: الدكتور عباس الترجمان
السنة: 1415هـ 1994م
..................................
يالأكبر يالأكبر ... يوليدي يالأكبر
عاين أمك .... تنحب يمك
يالأكبر يالأكبر ... يوليدي يالأكبر

****
ساهرت بالليالي الشته
بس كون تبقى سالم
ردتك تظل يمدللي
محروس بالعز دايم
أسم الله اعله طولك ياعلي
عالأرض يبني نايم
ماي الملح راح التعب
والعگل لجلك هايم

يمطبر يمطبر .... بالميدان امطبر
عاين أمك .... تنحب يمك
يالأكبر يالأكبر ... يوليدي يالأكبر
****
هذا الصدگ يولا جذب
ابني تسل أجروحه
هذا أبني يولا عالأرض
آمـالـي المذبوحه
روحي اوليدي ومهجتي
فارگت جسمه روحه
هذا الگلب يمك يون
أسمع يالأكبر نوحه

ومعفر ومعفر ....مثلك گلبي امعفر
عاين أمك .... تنحب يمك
يالأكبر يالأكبر ... يوليدي يالأكبر
****
يا وردتي وريحانتي
والجنت دوم أشتمها
متناثره فوگ التُرب
والگلب طايح يمها
مصّفره صارت ذابله
وحُمّرتها حُمّرة دمها
وگلبي نعصر يمها وذبل
ماگدر يحّمل همها

وتناثر وتناثر .... يمك يبني اتناثر
عاين أمك .... تنحب يمك
يالأكبر يالأكبر ... يوليدي يالأكبر
****
يمّك يالأكبر أشتِكي
واعرض إلك موضوعي
شَيَّدت بيتك بالگلب
أوسگّفته من اضلوعي
بوجودك أزرعت الأمل
وأزگيتك امن دموعي
ونورت دربك يا علي
من العّيون اشموعي

وتنور وتنور .... دربك يبني تنور
عاين أمك .... تنحب يمك
يالأكبر يالأكبر ... يوليدي يالأكبر
****
تاليها مرمي اعله الارض
يا علي امضرّج بالدم
جسمك موذر بالطبر
ومن السيوف امخذم
حيلي مثل جسمك غده
هيهات يبني يلتم
أنته أرحلت وانه اظل
سهمِي النياحه والهم

بالكوثر بالكوثر .... تتروه من الكوثر
عاين أمك .... تنحب يمك
يالأكبر يالأكبر ... يوليدي يالأكبر
****

يا ريت عميه ولا شفت
جسمك امترب عالگاع
ياريت ميته من گبل
يُومك يَحِلوا الأطباع
ياريت أندل لو صرت
لا أظل بعدك ألتاع
فراگك علي يبني صعب
چنَّه ابدليلي لساع
وتحسر وتحسر .... من فراگك وتحسر
عاين أمك .... تنحب يمك
يالأكبر يالأكبر ... يوليدي يالأكبر
****

ردتك ذخر يَبني تظل
وبشيبتي تباريني
اوتذكر أتعابي والربه
واعله التعب توفيني
لآچن عفتني ابشِدِتي
اوبعدك زجر يوليني
لشام امشي اعله الهزل
ترضه العده تسبيني

وتيسر وتيسر ..... لرض الشام اتيسر
عاين أمك .... تنحب يمك
يالأكبر يالأكبر ... يوليدي يالأكبر
****