Homazhe për Azem Hajdarin dhe trazirat përpara Kryeministrisë (13 Shtator 1999)

Описание: Arkiva - Tv Klan 1998-2012; Pamje të trupit të vrarë të deputetit demokrat Azem Hajdari para Pallatit të Kulturës dhe familjarë, miq, simpatizantë të shumtë që bëjnë homazhe.

Një vit më parë Sheshi "Skënderbej" nderonte për herë të fundit liderin e Dhjetorit 90, Azem Hajdari. Trupi i tij i vdekur i shtrirë para Pallatit të Kulturës dhe familja, miq, shokët por dhe mijëra simpatizantët e tij të cilët e kishin ndjekur që nga revoltat studentore, i japin atij lamtumirën e fundit.
Por vetëm pak kohë pasi i dhanë lamtumirën e fundit qindra njerëz vërshuan në bulevardin kryesor dhe para Kryeministrisë qëllojnë me gurë e më pas me armë. Mësohet se ka dhe të plagosur. Në spital kanë mbërritur të parët, mes tyre ushtarë dhe oficerë të Gardës dhe qytetarë. Skënder Kalenja ndodhej mes njerëzve dhe nuk dihet nga kush goditet e më pas vdes në spital.
Pasdite protestuesit tërhiqen nga Kryeministria duke e lënë atë të djegur. Zjarrfikësit futen në godinën e shkatërruar për të shuar zjarrin. Të tronditur ishin dhe qytetarët e Tiranës. Familjarët e Azemit mundohen të gjejnë forcë. Pas intervistës për TV Klan, Ambasadori i OSBE Dan Everts dha një konferencë për shtyp ku bëri përsëri thirrje për të ruajtur qetësinë.
Vëllai i Azem Hajdarit: S'ka rëndësi kush është vrasësi. Ne e dimë që vrasja është bërë nga shteti e organizuar.
Gazetarja: Ska motive të hakmarrjes politike?
Vëllai i Azem Hajdarit: Ne s'kena pas probleme me asnjë njeri. Dihet për atë shqiptar që është shqiptar i ndershëm dhe shqiptar puro, e dinë që kjo është një vrasje politike. Nuk ka koment ma tepër. S'ka pse mendon kush që ka një problem me hakmarrjen. Azemi është vëllai im por ishte dhe i gjithë popullit shqiptar, i shqiptarëve të ndershëm, ishte … kombëtar, ishte popullor. Gjithë ata njerëz që kanë dëgjuar që janë shqiptarë të ndershëm e kanë ndarë hidhërimin me familjen tonë.
Gazetari: Zoti Everts ju keni qënë një vëzhgues i përhershëm i ngjarjeve politike që ndodhnin në Tiranë. Ç'mendoni për situatën e sotme?
Dan Everts: Siç shihet situata është tepër serioze. Parësore tani është të ruhet qetësia. Duhet që njerëzit të pushojnë pakt sepse duhet që fillimisht të gjendet vrasësi i mbrëmshëm. Nuk është e pranueshme apo nuk mund të merret si shenjë kurajo një akt hakmarrje pa pasur fakte. Pra shkatërrimi i godinave nuk është një ide e mirë. Inkurajimi i dhunës nuk është ajo që populli shqiptar kërkon.
Gazetari: Pak më parë po flisnit me zotin Berisha çfarë i thatë?
Dan Everts: Po është e vërtetë, fola me liderin e PD dhe i kërkova të qetësojë situatën, të mos nxisë masat sepse nuk ka vend për sulme ndaj ndërtesave apo ministrive. Duhet që procesi ligjor juridik të bëhet shpejt dhe shpresoj që Qeveria do të bëje të gjitha përpjekjet për kapjen e vrasësit. Duhet siguruar seriozisht edhe popullsia për këtë gjë dhe për çuarjen në vend të drejtësisë.
Pasdite Presidenti i Republikës zoti Rexhep Mejdani ka mbledhur partitë politike për një konsultim në lidhje me situatën më të fundit politike në vend. Para pak çastesh Presidenti foli para gazetarëve dhe tha që situata është tepër e tensionuar dhe për këtëarsye duhet gjetur një zgjidhje politike.
Në këto momente brenda janë partitë e koalicionit qeveritar dhe pas pak çastesh atje do të vijnë dhe parti të tjera politike. Gjithashtu është planifikuar që në orën 19.50 Presidenti i Republikës të dalë me një mesazh drejtuar kombit. Pas takimit me politikanët Mejdani nga zyra e tij i drejtohet popullit shqiptar.

Gazetar: Eduart Frangaj