DELIA JATTAKKA LILL-ESTABLISHMENT GĦAT-TRATTAMENT TIEGĦU

Описание: ONE.COM.MT • L-eks Kap Nazzjonalista Adrian Delia fetħilha kontra l-establishment tal-Partit Nazzjonalista li sena ilu rnexxielu jqaċċtu minn Kap.

Dan f’intervista mal-gazzetta MaltaToday.

F’intervista fejn spara kemm felaħ lejn dawk li qatt ma aċċettawh fil-Partit, Delia saħansitra jitkellem dwar Bernard Grech u kif dan tpoġġa Kap, possibilment bħala kompromess mal-establishment tal-Partit Nazzjonalista.

KITBA: SAMUEL LUCAS
FILMAT: ARKIVJI

“Il-Partit Nazzjonalista ma ċċaqlaqx ’il quddiem u dak li verament jimporta.”

Dan kien il-kliem li għażel juża l-eks Kap Nazzjonalista Adrian Delia waqt intervista li kellu mal-MaltaToday, sena wara li tneħħa minn Kap tal-Partit Nazzjonalista.

F’intervista mimlija botti lejn it-tmexxija attwali tal-establishment li qaċċtitu mit-tmexxija, Adrian Delia kien mistoqsi dwar l-aħħar stħarriġ tal-istess gazzetta li juri kif il-Partit Nazzjonalista mhux jagħmel progress mal-elettorat.

Raġuni ewlenija għaliex huwa nnifsu kien tqaċċat minn Kap.

Adrian Delia b’mod skjett mal-MaltaToday qal li l-Partit ma ċċaqlaqx ’il quddiem u dak li verament jgħodd.

Skont Delia, ir-raġuni wara dan hija l-fatt li sa issa l-Partit Nazzjonalista għadu jħaddan mentalità antika flok ikun umli.

Filwaqt li Delia, bħala kandidat Nazzjonalista qagħad attent li ma jattakkax direttament lil Bernard Grech, huwa aċċenna għat-trattament tiegħu meta kien fit-tmexxija u kif din ġabet magħha skumdità ma’ tal-qalba.

Dan sempliċiment għax skontu ma kienx wieħed mill-uċuħ l-antiki.

B’riżultat ta’ dan, Delia b’referenza għal Bernard Grech, tenna li l-establishment spiċċa għażel xi ħadd minn barra madankollu li huwa aktar aċċettabbli għall-establishment.

Saħansitra jgħid li dan sar wara li possibiltment inħema kompromess bejn Grech u l-establishment.

Hawnhekk Delia kompla jiftħilha fil-konfront tal-establishment tal-Partit Nazzjonalista li ma ħallewhx jaħdem għal terminu sħiħ.

Fil-fatt Delia hawn irrefera għall-partitarji Nazzjonalisti li vvutawlu sabiex imexxi lill-Partit Nazzjonalista.

Fi kliemu stess huwa jiddekrivihom bħala traduti.

Dan hekk kif jgħid li huma ma eleġġewx Kap għal sentejn jew tlieta iżda għal terminu sħiħ u għalhekk illum huma mweġġgħin.