Bishe umukobwa witwaga Tasiyana barangije baramusambanya ngo akiri muzima yarabimye"

Описание: ISHYIRWAMUBIKORWA RYA JENOSIDE YAKOREWE ABATUTSI KU MA TARIKI YA 13;14/4/1994
Nkuko byateguwe n’Abahutu babahezanguni bo muri Hutu Power Umugambi wa Jenoside wari uwo gutsemba abatutsi b’Ingeri zose kuva ku bana bari bakiri mu nda zababyeyi babo;Impinja ;ibisekeramwanzi n’Ibitambabuga;Abana bakiri batoya;Ingimbi n’abangavu;abagabo bibikwerere n’abagore bamajigija ndetse n’abasaza n’abakecuru rukukuri badasize n’abatutsi bafite ubumuga bwaba Ubwo ku mubiri no mu mutwe.Umututsi wese aho ava akagera yagombaga gupfa niko abateguye Jenoside n’abayishyize mu bikorwa bari barabipanze.Muri uwo mugambi rero wo gutsemba abatutsi gutyo byakorwaga umunsi ku munsi kuva tariki 7/4/1994 n’iminsi 100 yakurikiyeho.buri munsi abatutsi baricwaga rero niyo mpamvu mu kiganiro cyacu cyuyu munsi mu biganiro byacu byuruhererekane bigaruka mu buryo bwihariye ku ishyirwamubikorwa rya Jenoside yakorewe abatutsi tugiye kuvuga ibyaranze ama tariki ya 13 na 14 z’ukwa kane mu 1994.iki ni igice cya 4 kuri iyi ngingo .mu gutegura iki kiganiro nifashije Igitabo cyashyizwe hanze n’icyahoze ari Komisiyo y’Igihugu yo kurwanya Jenoside CNLG kitwa “RWANDA 1991-1994:ITEGURWA N’ISHYIRWA MU BIKORWA RY’UMUGAMBI WA JENOSIDE YAKOREWE ABATUTSI MU RWANDA” kikaba cyaragiye hanze mu kwezi kwa gatatu mu 2021. iyi ni Intsinzi Tv.Uwaguteguriye Iki kiganiro ni BIZIMANA Christian.naho jye ugiye kukikugezaho ndi ERIC SAFARI.Mbahaye Ikaze.
Ku itariki ya 13 Mata 1994 Jenoside yakorewe abatutsi yarakomeje mu gihugu cyose kandi mu ntego imwe ihambaye kandi rukumbi yo gutsemba abatutsi ntihasigare nuwo kubara inkuru.muri uwo murongo uwo munsi habayeho bumwe mu bwicanyi bwakorewe abatutsi mu zahoze ari Perefegitura za KIGALI Y’UMUGI, KIGALI NGARI, GISENYI, KIBUNGO, CYANGUGU, KIBUYE NA GIKONGORO

Uwo munsi habayeho Iyicwa ry’Abatutsi Mu murenge wa Nyamirambo mu kigo cy’ishuri rya St André no muri Kiriziya
yitiriwe Mutagatifu Karoli Lwanga ahiciwe Abatutsi benshi bari bahahungiye baturuka mu bice bya Butamwa, Nyamirambo mu duce twa Kivugiza, Mumena, Nyakabanda,Rwezamenyo, Kabusunzu, Nyarugenge mu Biryogo. Bamwe muribo bagiye mu Kiriziya abandi bajya muri St André, abandi bajya mu kigo cy’abafurere cya St Joseph kiri i Nyamirambo. Muri Kiriziya ya Karoli Lwanga hiciwe Abatutsi bake ugereranije n’abiciwe muri St André n’ubwo nabo bari bake ugereranije n’abiciwe mu kigo cya St Joseph kuko

abari aho hose bavuzwe haruguru bumvaga amakuru y’uko St Joseph hari benshi kandi abihaye Imana babafashe neza ntawabakoraho bose bagahita bagerageza kuba ariho bajya. Nyuma yo kwica abari bahungiye muri St André no muri Karoli
Lwanga, bagiye kwica abari muri St Joseph kugeza n’aho bishemo bamwe mu bafurere bari banze ko abo Batutsi bicwa. Abaharokokeye bahamya ko Abatutsi bari bahahungiye barengaga 2,000 kuko na nyuma yo kubica imirambo yari myinshi cyane igerekeranye.

Uwo munsi nanone wa tariki 13/4/1994 habaye Iyicwa ry’Abatutsi i Kanyinya, muri Komini Nyarugenge.Mu 1994 ku Murenge wa Kanyinya Abatutsi benshi baho n’abahahungiye baturukaga mu Murenge wa Jali, Akarere ka Gasabo bahungiye ku Murenge wa Kanyinya. Uwari konseye Nzabamwita Joseph abasaba ko babwira n’abandi bataricwa bakaza kugirango babarindire umutekano.Ku wa 13/4/1994, abicanyi bamaze kubona ko nta bandi batutsi basigaye, konseye yababwiye ko agiye kubazanira abajandarume bakabashakira aho babashyira ababeshya ko ari ukugirango bacungirwe umutekano. Baraza bababwira ko babajyanye ahitwa mu Kana mu gakombe kari hagati y’imisozi bakabarindiramo kuko nta nterahamwe yahamenya.